Kunyina Muntu Uukonzya Kulutija Lufwu

AMWEEZYEEZYE kuti mweebelela vidiyo imwi iitondezya muntu uuzyibidwe kapati, ambweni mwiimbi uulaampuwo walo ngomuyandisya. Vidiyo eeyo yatalika kwiinda mukumutondezya naakacili muniini, ciindi naakali kwiiya kulizya ziimbyo zyanyimbo alimwi akuzilizya cakwiinduluka-induluka kwaziindi zili mbozibede. Mpoonya mwamubona kasobana munkosaadi, kayabweenda mumasi manji mpoonya akuba muntu uuzyibidwe kapati munyika yoonse. Pele kalitanalampa, wacembaala mpoonya wafwa.

Vidiyo eeyi tacili caano buyo pe, pele yaamba makani aakacitika ncobeni kujatikizya muntu wini, walo uufwide lino. Kufwumbwa naa muntu ooyo wakali mwiimbi, syaazibwene mumakani aasayaansi naa muntu umwi buyo uuzyibidwe kapati, icakacitika kumamanino ncimwi buyo. Muntu ooyo wakacikonzya kucita zintu zinji, pele amuyeeye buyo kuvwula kwazintu nzyaakali kukonzya kucita ikuti naatakacembaala alimwi akufwa.

Tulakonzya kuusa akaambo kamakani aali boobu, pele eeci nceciyootucitikila toonse. (Mukambausi 9:5) Nokuba kuti twasolekesya buti, tatukonzyi kukweeleba kucembaala alimwi akufwa. Alimwi buumi bwesu bulakonzya kufwiinsyigwa akaambo kantenda naa kuciswa. Kweelana ambolyaamba Bbaibbele, tuli mbuli sikunku “uulibonya buyo kwakaindi kaniini mpoonya ulazimaana.”—Jakobo 4:14.

Akaambo kakuti tulakonzya kufwa kufwumbwa ciindi, bantu bajisi cilengwa cakwaamba kuti, “atulye akunywa, nkaambo kayi juunza tuyoofwa.” (1 Bakorinto 15:32) Bantu balapona munzila eeyi nkaambo balizyi kuti balakonzya kufwa kufwumbwa ciindi alimwi tabajisi bulangizi bwakumbele. Zimwi ziindi mubuumi, kwaambisya ciindi muntu nali mubuyumuyumu, ulakonzya kulibuzya kuti, ‘Sena buumi oobu mbobuliko bulikke?’ Ino nkookuli nkomukonzya kujana bwiinguzi?

Bantu banji bayeeya kuti basyaazibwene mumakani aasayaansi bayoobujana bwiinguzi. Basayaansi alimwi abamadokota bakajana nzila zikonzya kupa kuti bantu kabapona myaka minji. Mane buya basayaansi bamwi baciyandaula nzila yakuti bantu kabapona myaka minji kapati kwiinda mazuba aano. Kufwumbwa naa basayaansi bazwidilila naa pe, mubuzyo ulacaala ngomunya wakuti: Nkaambo nzi ncotucembaalila akufwa? Sena kuli bulangizi buliko bwakuti sinkondoma lufwu uyoozundwa? Zibalo zitobela zilaabandika makani aaya mpoonya akwiingula mubuzyo wakuti: Sena buumi oobu mbobuliko bulikke?