Sena Muli Bakamboni Baciindi Coonse?
1 Sena inga mwaingula kuti ee kumubuzyo oyu? Nokuba kuti tabali boonse babelesi ba Jehova balyaabide ibanga bakonzya kunjila mulimo wabukambausi bwaciindi coonse, sena tatweelede na toonse kulibona kuti tuli Bakamboni baciindi coonse? Masimpe tuleelede.
2 Taakwe muntu uukonzya kuba Munakristo muziindi zimwi buyo. Ikujatikizya Bawisi, Jesu wakati: “Ndacita lyoonse zintu izimubotela.” (Joh. 8:29) Walo Paulo iwakalimvwa boobo wakatulailila kuti ‘tucite zyoonse cakuti kube bulemu kwa-Leza.’ (1 Kor. 10:31) Aboobo ziyume zibe buti, toonse tweelede kulibona kuti tuli Bakamboni ba Jehova baciindi coonse. Ikulibona munzila eyi lyoonse kulatugwasya muzintu zyoonse nzyotucita.
3 Amubone Cisinizyo Eeci: Mbotulibonya, mbotwaambaula, alimwi ambotulilemeka inga caba citondezyo kubantu kuti tuli Bakamboni ba Jehova cini-cini. Notukambauka naa notuya kumiswaangano yambungano, tulalilemeka mukusama, mukwaambaula alimwi amubukkale boonse. Pele, nociba ciindi notuya kucikolo, notubeleka mumulimo wakunyika, nomuba mukusobana, zyoonse nzyotucita zyeelede kutondezya kuti tutobela nzila zya Jehova iziluleme.
4 Jesu wakati: “Munzi uuyakidwe atala acilundu tuukonzyi kusiswa. . . . Mbubonya obo mumuni wanu umunike kunembo lyabantu, kuti babone milimo yanu mibotu, balemeke Usowanu uuli kujulu.” (Mt. 5:14-16) Aaya majwi ayelede kutobelwa lyoonse muzintu nzyetucita. Ikuti naa twajana kuti twawayawaya kupa bukamboni akaambo kabusena mpotubede naa cintu ncotuli mukucita, tweelede kulibuzya kuti, ‘Sena ndibelekela Jehova muziindi zimwi naa ciindi coonse?’ Tatweelede kulekela ciindi cili coonse katutakambaukili bantu makani mabotu aa Bwami bwa Leza.
5 Mutalubi kuti, tulamulemeka akumukkomanisya Jehova kuti naa katukonzya kwiingula amoyo omwe kuti “Ee!” kumubuzyo wakuti, “Sena muli Bakamboni baciindi coonse?”