Balabona Kuti Tulaandeene
1 Imwakali, ibapya basika ku 300,000 bakatusangana kwiinda mukubbapatizigwa. Ino ncinzi bantu aaba ncobabona muli Bakamboni ba Jehova icibapa kuti bayande kuba mumbunga ya Leza? Nkaambo nzi ncotulibonya kwaandaana azikombelo zyoonse zimbi? Nzeezi zitwaandaanya izitadoonekwi:
—Tutobela Bbaibbele muciindi camizeezo yabantu: Tukomba Jehova Leza “mumuuya amubwini,” mbubonya Jesu Kristo mbwaakaamba kuti katukomba. Eeci capa kuti tukake njiisyo zyabukombi zyakubeja tutobele Jwi lya Leza lilembedwe.—Joh. 4:23, 24; 2 Tim. 3:15-17.
—Tulabaunkila bantu muciindi cakubalindila kuboola kulindiswe: Twauzumina mukuli ngwaakatupa Kristo wakukambauka akuyiisya, alimwi twiiya cikozyanyo cakwe cakuyandaula bantu basinizizye. Tulabayandaula mumaandaabo, mumigwagwa, naa mumasena kufwumbwa mobanga bajanika.—Mt. 9:35; 10:11; 28:19, 20; Inc. 10:42.
—Tuyiisya lwiiyo lwa Bbaibbele kubantu boonse cakutabbadelesya: Kakunyina kubbadelesya tubelesya mbono zyesu alimwi anguzu zyesu, tulabeleka mawoola aasika kuzyuulu zyatuulunzuma amwaka mumulimo wa Leza. Tatusali pe, tulayiisya bantu bamisyobo yoonse Bbaibbele.—Mt. 10:8; Inc. 10:34, 35; Ciy. 22:17.
—Tuliyiisidwe kabotu kugwasya bantu munzila yakumuuya: Ikwiinda mukuliyiisya Bbaibbele alimwi amalailile ngotupegwa kumiswaangano yambungano, miswaangano miniini amipati, tulapegwa lwiiyo lwateokrasi iluteelanisigwi ilutugwasya kumunikila bantu munzila yakumuuya.—Is. 54:13; 2 Tim. 2:15; 1 Pet. 3:15.
—Ikasimpe tulakasungwaalila, tulakatobela mubukkale bwesu bwabuzuba abuzuba: Akaambo kakuti tulamuyanda Leza, tulasanduka mubukkale bwesu tutobela luyando lwakwe. Iciimo cesu icili mbuli ca Kristo cikulwaizya bantu kuyanda kuziba kasimpe.—Kol. 3:9, 10; Jak. 1:22, 25; 1 Joh. 5:3.
—Tulasola kukkalaa bantu akubeleka ambabo caluumuno: Ikwiiya ciimo cabunaleza citugwasya kulangisya micito yesu aŋambawido. ‘Tuyandaula luumuno akulutobela’ kubantu boonse.—1 Pet. 3:10, 11; Ef. 4:1-3.
2 Akaambo kazikozyanyo zyabukkale bwa Bunakristo bantu nzyobabona mumbunga ya Jehova, balakulwaizigwa kuzumina kasimpe. Icikozyanyo caumwi aumwi wandiswe acibakulwaizye boobo aabo batuzi alimwi ibatulangilila.