Zyakwaambilizya
◼ Mabbuku aakumwaya mu December: The Greatest Man Who Ever Lived. January: Kufwumbwa mabbuku aamapeeji aali 192 aakamwaigwa kautanasika mwaka wa 1985 imbungano ngoijisi. Imbungano zitajisi mabbuku aaya zilakonzya kooda mabbuku aaya aatobela ku Sosaiti: Worldwide Security Under the “Prince of Peace” mu Cingisi. Mabbuku aaya ajisi muulo waalubazu wa K400.00 kubapainiya awa K500.00 kuli basikumwaya abantu buyo. Mabbuku aa Luzibo Lutola Kubuumi Butamani, Inzila Yakujana Lukkomano Mumukwasyi alimwi abbuku pya lya Is there a Creator Who Cares About Us? taabikkilizidwe pe. February: Inzila Yakujana Lukkomano Mumukwasyi.
March: Luzibo Lutola Kubuumi Butamani. Kuyoocitwa bubambe bwaalubazu bwakutalisya ziiyo zya Bbaibbele.
◼ Maoda aamamagazini aakuyungizya aamyezi ya March a May ayelede kutumwa ku Sosaiti mpoona-mpoona. Amwaambilizye kumbungano mubuzye boonse bakanza kucita bupainiya kuti babonene limwi naa ngangaye mamagazini aakuyungizya ngobanga bayanda kubaawo mumwezi omwe naa yobile. Mwaasanganya antoomwe oonse mamagazini aaya aalombwa mulaziba mweelwe wamamagazini aakuyungizya aakooda. Amubelesye foomu ya M-202 mutondezye kabotu-kabotu mweelwe wamamagazini aakuyungizya kumagazini yomwe-yomwe ngomuyanda. Amwaambe kuti eeyi oda njaalubazu. Amuyeeye kuti aaya mamagazini ngakuyungizya, pele mbungano yanu iyootambula oda yalyoonse yamamagazini.
◼ Mbungano zyeelede kutalika kooda mabbuku aa Ngazi Yamulindizi a Awake! aamu 1998 aoda yabo yamabbuku yamu December. Aaya mabbuku anoojanika buyo mu Cingisi. Kusikila mane mabbuku aaya asika alimwi akutuminwa, anootondezegwa kuti “Back Ordered” aamilongo yambungano yamabbuku aatuminwa. Aaya mabbuku aodwa buyo naalombwa elyo maoda oonse ayelede kubbadelelwa limwi kakutondezedwe kuti C.W.O aamafoomu oonse obile aa S-14 a S-20.
◼ Mulangizi weendelezya naa umwi ngwayootuma weelede kulingula maakkaunti aambungano mu December 1 naa cakufwambaana mbuli mbocikonzyeka bwainda buzuba obo. Amukaambilizye kumbungano ciindi kwaakubalwa lipooti yamaakkaunti.
◼ Ciibalusyo camumwaka wa 2000 ciyooba muli Bwatatu, mu April 19, lyaakubbila zuba. Mwazibisigilwa limwi kutegwa bakwesu batalikile limwi kulomba maanda aambi aakuswaanganina kuti naa mbungano zibelesya Ŋanda ya Bwami kazili zinji. Ibaalu beelede kuzuminana abeendelezi babusena obo kucita kuti kutakabi manyongwe kuzwa kuzintu zimwi zilangilwa kutola lubazu mumaandaayo kutegwa Ciibalusyo cikacitwe kabotu-kabotu caluumuno. Akaambo kakuti Ciibalusyo ncintu cipati kapati, ibaalu nobasala mwaambi wamakani aa Ciibalusyo beelede kusala umwi wabaalu weelela kapati muciindi buyo cakwiide kubanzaana naa kubelesya mukwesu omwe buyo mwaka amwaka. Ccita kuti kakuli mwaalu weelela wabananike uunga wakanana makani.
◼ Mwezi wa January mmwezi mubotu kubunji bwesu kucita bupainiya bwakugwasilizya nkaambo ujisi nsondo zyosanwe zizwide.
◼ Mabbuku Aaliko:
Amwiimbile Jehova Ntembauzyo (Nsaizi mpati alimwi asyoonto)—Cingisi
Ncinzi Leza Ncayanda Kulindiswe?—Ciluchazi
1997 Watchtower Publications Index—Cingisi