“Ino Ndacita nzi?”
1 Naa uli mukubusi uuli mukukomena, inga walibuzya kuti, ‘Ino ndacita nzi mubuumi bwangu?’ Ibakubusi Banakristo beelede kuyaambele mumulimo ngobabelekela Jehova. Pele ino inga mwacita buti obo nomujisi bubi amikuli iiboola ciindi muntu naakomena, iijatikizya kuligwasya azintu ziyandika? Ikuziba cakucita tacili cintu cuuba-uba pe.
2 Bamwi bakubusi balalibilika nobalanga buumi mbobwadula alimwi nobayeeya zyakumbele. Balalibuzya kuti: ‘Sena ndisole kuyaambele mulwiiyo lwakunyika? Sena ndinjile mulimo waciindi coonse ndilyonya lino?’ Ikutegwa asale nzila iiluzi, muntu weelede kwiingula mubuzyo oyu amoyo omwe, ‘Ino ncintu nzi cipati mubuumi bwangu?’ Weelede kulingula moyo wakwe.
3 Nobakubusi ncinzi ncomwabikkila maanu kapati? Sena mukanza buyo kujana mali manji, naa muyanda cini-cini kubelekela zintu zya Bwami mubuumi bwanu? Ikubaa lwiiyo lwaambele lwakuyunivesiti tacisyomezyi kuti muntu uyoojana mulimo pe. Ibanji basala kucita tukkoosi itugwasya twamumakkoleji itutatoli ciindi cilamfwu.
4 Amusyome Ncaamba Jehova: Icintu cipati ncotweelede kuziba ncakuti Jehova Leza wakasyomezya kuti uyoobagwasya aabo babikkila maanu kuzintu zya Bwami kusaanguna mubuumi bwabo. (Mt. 6:33) Eeci tacili cisyomezyo buyo pe. Ibakwesu banji ibakali mu Cikolo Cakwiiya Mulimo (Ministerial Training School) bakajana lwiiyo lwakuyunivesiti kabatanaiya kasimpe. Pele ino mmulimo nzi ngobakali kucita kunyika? Mbasyoonto bakali kucita mulimo ngobakayiila. Ibanji balikucita tulimo-limo buyo tumwi itwabagwasya kapati kujana mali aayandika nobacita bupainiya. Akaambo kakubelekesya mumulimo wakukambauka, balalelekwa azileleko zipati kwiinda mali naavwula buti ngobanga bajana.
5 Nomusala cakucita mwaakumanizya cikolo, amuziyeeyesye zintu zyoonse, mulingule moyo wanu kabotu-kabotu. Ikutegwa musale camaanu, amubale makani aali mu Awake! ya March 8, 1998, amapeeji 19-21. Amukanane abazyali banu, ibaalu, mulangizi wanu wabbazu alimwi abapainiya ibacikonzezye mucilawo canu. Eci cilamugwasya kusala camaanu kujatikizya ncomweelede kucita mubuumi bwanu.—Muk. 12:1, 13.