Ikwiimba Kabotu Mumiswaangano Yambungano
1 Ikuzwa kaindi balanda ba Jehova bali kwiimba mumiswaangano yabo yakukomba. Myaka iitandila ku 3,500 yainda, bana Israyeli bakaimba ntembauzyo zya Jehova naakabafwutula ku Lwizi Lusalala. Kumbele, inyimbo zyakali kwiimbwa nokwakali kukombwa mutempele. (1 Mak. 23:3, 5) Kuli baabo bajisi mabbuku aanyimbo aa Chichewa, mwajalula kupeeji lyamamanino mulabona baimbi bana Levi kabaaseme, kabaimba cabusungu. Kuzoosikila ciindi Mwami Davida naakatalika kulela, ibantu bainda kucibeela cakkumi camweelwe wabaabo ibakali kubelekela mutempele bakapegwa mulimo wakutembaula Jehova munyimbo. Mumweelwe oyu, ibali 288 bakali baimbi bacibwene ncobeni, “bauya.”—1 Makani 25:7, BT.
2 Banakristo bakusaanguna abalo bakali kwiimba mubukombi bwabo. Mwaapostolo Paulo wakalailila babunyina kuti: “Amwiisyanye akucenjezyanya cabusongo bunji antembauzyo anyimbo zya-Leza amalelebu, akuya bwiimba lyoonse cakulumba Leza mumyoyo yanu.”_Kol. 3:16; amubone aku Ba-Efeso 5:18-20.
3 Bakamboni ba Jehova sunu balacibelesya kabotu cipego cakwiimba. Ibbuku ndyotubelesya lino ililaa mutwe wakuti Amwiimbile Jehova Ntembauzyo, lijisi nyimbo zyaandeene-andeene zibotu kapati nzyotunga twabelesya mukutembaula Jehova.
4 Ino inga twatondezya buti kulumba akaambo kanyimbo zyesu zya Bwami? Nkwiinda mukwiimbisya notuli kumiswaangano yambungano! Sintembauzyo wakalemba kuti: “Bamwiimbile intembauzyo akalumbu andandala. Nkaambo Jehova ulabotelwa kucisi cakwe.” (Int. 149:3, 4) Ee, Mulengi wesu ulaziswiilila nyimbo zyesu mbubonya mbwaswiilila mipailo yesu.
5 Sena cimwi ciindi cilamukatazya kwiimba nyimbo zya Bwami? Iba Sosaiti bagwasilizya kwiinda mukulekkooda nyimbo ezi zyakutobelezya. Imbungano zyeelede kubelesya mateepu aakalekkoodwa aba Sosaiti (ikutali mateepu aakalekkoodwa aabambi) noziimba lyamiswaangano yambungano. Ityuni yeelede kaili yeeyo iibelesegwa mubbuku lyanyimbo lya Sosaiti, kutaimbwi tyuni njomuyanda oko nkomuzwa. Izintu teezyali boobo pe lyoonse. Cimwi ciindi, ibakwesu baswaya kuzwa mumasena aambi bali kukakilwa kwiimba nyimbo zya Bwami abamwi bamumbungano njobaswaya nkaambo bakwesu bamumbungano eyo bali kuziimba bumbi nyimbo. Ibunji bwanyimbo zyakasandululwa mumyaambo yamucisi zilakonzya kwiimbwa amajwi one aasiyene-siyene (saprano, oto, tena, abbesi.) Mbwaanga bantu ba Jehova balikamantene mubukombi bwabo, alimwi mbwaanga kwiimba ncintu cijatikizya bukombi obu, kuleelede kuti katukamantene abakwesu nyika yoonse mbwiizulwa munzila njotwiimba nyimbo zyesu.
6 Nalizya mateepu, imukwesu uulanganya mincini yamajwi weelede kubona kuti imvwika kabotu. Ikuti naa nyimbo kazitamvwiki kabotu, imbungano inga yaalilwa kwiimba. Ikuti naa mukwesu uulanganya mincini yamajwi wabasangana boonse mumbungano mukwiimba nyimbo zya Bwami, inga camugwasya kumvwa naa nyimbo zilalimvwisya kabotu naa pe.
7 Kunze lyakwaambilizya namba yalwiimbo, imukwesu uujisi cibeela cabusicuuno mumiswaangano iindene-indene ulakonzya kwaambilizya mutwe walwiimbo kubikkilizya a Lugwalo moluzwa kuti kwayandika. Munzila eyi, imbungano ilateelela lwiimbo mbolweendelana amakani aayiigwa mumuswaangano.
8 Cilakonzya kutola ciindi kuti mwiiye kwiimba kutobelezya teepu ya Sosaiti. Ciindi bbuku lyanyimbo nolyakazwaa kumwaigwa, imbungano zimwi zyakajana kuti cilagwasya kulizya muzila omwe woonse walwiimbo luyanda kwiimbwa, kuzwawaawo teepu ilabweedezegwa munsi kutegwa mbungano iimbe mizila yoonse. Ambweni nzila eyi inga yabeleka akumbungano yanu kwakaindi-indi. Tusyoma kuti naa mwasola kubikkila maanu, talikoolampa andinywe munoolomya kwiimba nyimbo zya Bwami mbubonya mbuli mbobacita bakwesu mumasi aambi.
9 Acimbi ncomunga mwayanda nkulizya mateepu aapiyano aa Sosaiti nomuli kuŋanda. Aaya mateepu aakalekkoodwa mmabotu kuswiilila nomuli mukukutauka-kutauka alimwi agwasilizya kuleta muuya wateokrasi muŋanda. Alimwi eci cigwasya banamukwasyi kuzizibila nyimbo ezi.
10 Ikwiimba nyimbo zya Bwami ninzila mbotu yakutembaula Jehova. Notwiimba cakukkomana, Leza inga wakkomana kubikkilizya amuntu.— Int. 105:2