Amupailile Lugwasyo lwa Jehova
1 Jesu wakaambila basikwiiya bakwe kuti cilongezyo ca Jehova cilayandika mumulimo wabo. (Mt. 9:37, 38) Ikupaila nkotupaila camoyo woonse akumutembaula Jehova akumulumba alimwi akumulilila kutondezya kuti tulamusyoma kapati kuti ulatugwasya. (Flp. 4:6, 7) Magwalo atukulwaizya kukomba lyoonse “azikombyo ankumbizyo zyoonse,” eci cilabikkilizya amipailo njotupailila mulimo.—Ef. 6:18.
2 Tulamutembaula Jehova mumipailo akaambo kaciimo cakwe cibotu kapati alimwi azintu nzyaacita. Alimwi tulamutembaula nkaambo nguutupa makani mabotu ngotukambauka. Uleelede kutembaulwa nkaambo ngonguwe alikke uupa kuti mulimo wesu uzwidilile.—Int. 127:1.
3 Mipailo yesu yakulumba njakulumba luzibo Jehova ndwaatupa kujatikizya luyando lwakwe amakanze. Sena tacili coolwe kukambaukila bantu makani aa Bwami aajatikizya kasimpe? Tulamulumba Jehova kuzintu zyoonse nzyotukonzya kucita mumulimo wamumuunda.—Int. 107:8; Ef. 5:20.
4 Aboobo cileelela notulomba Jehova kuti atugwasye kujana bantu banga bazumina kuyiisigwa Bbaibbele alimwi akulomba kuti kasimpe kabanjile. Kwiinda munkumbizyo ezi, tutondezya kuti ngu Leza alikke uukonzya kupa kuti mulimo wesu uzwidilile.—1 Kor. 3:5-7.
5 Umwi mucizi wakali kuyeeya kuti mukaintu ngwaakali kutolela mamagazini lyoonse taakali kubala Ngazi Yamulindizi alimwi a Awake? Akaambo kakuti taakali kuyanda kuti mamagazini aya kaaile kunyonyooka buyo, wakalomba Jehova kuti oyu mukaintu naa taakali kwaabala kaakaka kwaatambula. Ooyu mucizi naakaswaya ciindi cimbi, imulumi wamukaintu oyu wakati: “Ndamulumba kapati kumamagazini ngomuleta lyoonse. Ndaabala, elyo ndaayanda cini-cini.”
6 Cakulibombya alimwi amoyo woonse, inga twamulilila Jehova kuti atugwasye kulanganya penzi lyakutayanda kwabantu kumvwa mulumbe alimwi akusampaula nkobatusampaula akuti tutayoowi muntu pele tuzumanane cabusicamba kukambaukila bantu. (Inc. 4:31) Ikuti naa lyoonse katukomba “ankumbizyo zyoonse” twanoocita mulimo wesu uusetekene, Jehova unootugwasya.—1 Joh. 3:22.