Kabbokesi Kamubuzyo

◼ Sena tatunoosangi ziindi zyobilo kumabbuku ikuti naa twasanga notwabweza mabbuku aleelyo notubikka mali asangwa mumuunda mutubokkesi twakusangila mali aamulimo wa Sosaiti wanyika yoonse?

Peepe. Ikusanga ikubikkwa mutubokkesi tujatikizya mulimo wa Sosaiti wanyika yoonse takuli buyo kwamabbuku pe. Basikumwaya alimwi abaabo bajanwa mumuunda ibatondezya luyandisisyo balapegwa mabbuku kakunyina kubbadala. Basikumwaya nobasanga mali bagwasilizya kubambulula maofesi aamitabi, minzi ya Beteli, zikolo zya kuyiila azyabamisyinali, kugwasilizya bamisyinali, balangizi beendeenda kubikkilizya amilimo imbi iiyandika kubbadelelwa kutegwa mulimo woonse Jesu ngwaakapa basikwiiya bakwe ucitwe kabotu. Ikusimba mabbuku nkabeela buyo kasyoonto kamulimo ooyu.

Aboobo notutambula mali mumuunda ngobasanga bantu batondezya luyandisisyo, tatweelede kubaambila kuti ikusanga nkobacita “nkwamabbuku” pe. Mbotubapandulwida bantu, aabo ibatondezya kuti balayandisisya kwaabala mabbuku balapegwa kakutakwe kubbadela. Kufwumbwa mali bantu abo ngobayoosanga ayoobelesyegwa kubbadelela zintu zijatikizidwe mumulimo wanyika yoonse. Ncimwi buyo akusanga ikucitwaa basikumwaya.

◼ Sena cileelela kukambilila nokwaambilizigwa kupilusigwa kwaumwi mumbungano?

Jehova Leza caluyando wapa nzila yamu Magwalo kuli baabo basikubisya beempwa kutegwa bajokele kulinguwe akupilusigwa mumbungano ya Bunakristo. (Int. 51:12, 17) Eci citukulwaizya kubatondezya luyando lwesu kuli baabo ibeempwa.—2 Kor. 2:6-8.

Nokuba kuti inga tulikkomene kapati akupilusigwa mumbungano kwamusazima naa mweenzuma, tatweelede kukambilila pe nokwaambilizigwa kupilusigwa kwamuntu oyo mumbungano. Ngazi Yamulindizi yamu October 1 1998, apeeji 29 yakaamba boobu: “Nokuba boobo, tweelede kuyeeya kuti ibunji bwabaabo bali mumbungano tabacizi cini-cini cakapa kuti muntu agwisigwe mumbungano naa capa kuti apilusigwe. Kunze lyaboobo, kulakonzya kakuli bamwi ibajatikizidwe naa bacimidwe—ambweni kwaciindi cili mbocibede—akaambo kukubisya kwayooyo weempwa. Aboobo akaambo katwaambo tuli boobo, iciindi nokwaambilizigwa kuti muntu oyo wapilusigwa mumbungano, inga calulama kuti twataambilizya kuti twamutambula muntu oyo kusikila mane zintu zyakkalikila”

Nokuba kuti inga tulikkomene kapati kubona umwi wajokela mukasimpe, takuyandiki kukambilila pe nokwaambilizigwa kuti muntu oyo wapilusigwa.