Sena Mujisi Oda Iizumanana?
1 Akaambo kakuti lino tulaa bubambe bwakusanga buyo, ino mamagazini aali kumbungano tunooayendelezya buti? Ciyanza cakupa buyo kufwumbwa bafwambaana kusika akwiima baabo bamuka taceelede kubako abuniini aabusena bubwezelwa mamagazini. Tukulwaizigwa kuti “zintu zyoonse buyo zicitwe kabotu akucililana.” (1 Cor. 14:40) Aboobo, ninzila nzi njotweelede kutobela kutegwa kutabi manyongwe naa kutyompya bamwi? Amuyeeye makani aali mupepa lyamukati mu Mulimo Wesu Wabwami wamu Chichewa wamu September 1995 aamutwe wakuti “Atwaabelesye Kabotu Mamagazini Eesu.” Yakatwaambila kuti tweelede “kubaa oda yamamagazini iibikkilidwe limwi” alimwi yakati: “Amulembye oda yamamagazini ngomuyanda kumukwesu uulanga mamagazini kulembya kkopi yomwe-yomwe yamamagazini aliko. Munzila eeyi, ciyoopa kuti nywebo amukwasyi wanu kamunoojisi mamagazini aakkwene lyoonse.” Sena mwakacita kale obo?
2 Mbuti mbwaayelede kwaabanizigwa mamagazini kumbungano? Mubelesi uulanga mamagazini uyoopa sikumwaya umwi aumwi mamagazini ngakooda. Baalu beelede kubayiisya basikumwaya kuti kabatabwezi mamagazini manji kwiinda yaayo ngobakooda nkaambo eci ciyoopa kuti bamwi babulile. Pele ikuti umwi wabona kuti uyandika kuyungizya naa kucesya mweelwe wamamagazini ngaoda, ulakonzya kwaambila mubelesi wamamagazini kutegwa amuyungizizye naa kumucesezya oda yakwe. Aboobo mubelesi wamamagazini weelede kwiicinca oda yambungano njobakalembya ku Sosaiti. Amubone kuti citola myezi yotatwe kutegwa kucinca ooku kucitwe. Ikuti naa tamunooliko mumbungano kwaciindi cilamfwu, amumuzibye mubelesi wamamagazini naa muyanda kuti mamagazini aanu kaapegwa muntu umbi kusikila mukaboole.
3 Iba Sosaiti bayanda kuti sikumwaya umwi aumwi kubikkilizya abana bacizyi kubala, kalaa kkopi yamamagazini aa Ngazi Yamulindizi. Ikuti naa kamucikonzya kubala Chichewa naa Cingisi, mulakonzya kooda kkopi yomwe yamagazini ya Awake! yakubelesya mumukwasyi wanu. Kunze lyaboobo, mweelede kubikkila limwi mweelwe wamamagazini aakutola mumuunda ngomuyanda nywebo abamumukwasyi wanu. Munzila eeyi baalu tabakajani penzi lyakuyeeyela mweelwe wamamagazini aambungano ngobeelede kooda, pele ciyoobaubila ikusanganya buyo mweelwe waoda yasikumwaya omwe-omwe akujana mweelwe uuluzi. Nkaambo nzi ncomutalembesyeli oda yamamagazini Iizumanana? Mubelesi wamamagazini uyoolemba maoda oonse aaya, mpoonya uyooasanganya antoomwe akulemba mweelwe omwe. Mweelede kooda amamagazini masyoonto abikkidwe aambali kutegwa abo bapya batajisi oda iizumanana kabajana mamagazini. Eci ciyoogwasya kuti boonse kabajisi mamagazini ngobayandika kabatayoowi kuti ndiza umwi uyoobweza mamagazini oonse mpoonya balo bakabulile.