Atumulemye Jehova Kwiinda Mubukkale Bwesu—Cibeela 2
1 Ikubaa bana mbulumbu kuzwa kuli Jehova. (Int. 127:3) Ino bana tweelede kubalela munzila mbotu ili buti? Sena ncibotu kukatazya basazinyoko kuti bazyale bana? Ibana tacili ncecintu ciyandika kapati. Ikubelekela Jehova alimwi akusyomeka, nzezintu ziyandika kapati. Mubbuku lya Matayo 24:19, Jesu utondezya kuti kubaa bana kulakonzya kutusinkilila kukuyaambele munzila yakumuuya.—Amubone Ngazi Yamulindizi yamu Chichewa yamu August 1, 2000 amapeeji 20-23.
2 Kuzyala Bana. Ibazyali banji balazyala bana kakwiinaa kulibambila kabotu pe. Ibamwi balombelela buya zintu kuzwa kuli bamwi kutegwa bacikonzye kulanganya bana babo boonse. (1 Tim. 5:8) Ibamwi “balapa” bana babo kubasazinyina, eeci cilengwa ciliimpene abwaamba mulawo wa Jehova ku Ba-Efeso 6:4. Ibamwi balekela bana babo kumwananyina naa kumubelesi waaŋanda kuti abakomezyele. Ibazyali bamwi balakakilwa kubatondezya luyando ibana babo boonse, aboobo babikkila buyo maanu kumwana musyoonto akubaleka buyo bamwi kuti “balibonene.” (Tit. 2:4; Tus. 3:12) Kunze lyaboobo, kuli cilengwa cakwaambila bapainiya antela basikumwaya kuti babayiisyile bana babo muciindi cakuti bazyali lwabo beni bazuzikizye mukuli ooyu ngobapedwe a Leza. Ngazi Yamulindizi yamu Chichewa yamu June 1 1998, mucibalo cakuti “Kukwaniritsa Udindo wa Kusamalira Banja” apeeji 22 yaamba boobu, “Ibaalu basiluyando mumbungano bayoosola ikukulwaizya bazyali nobali mukulanganya bana babo. Balakonzya kupa muzeezo wakuti babe amubandi wamumukwasyi, mpoonya abalo baalu balakonzya kujanika kutegwa bape mizeezo imwi eeyo iigwasya yambokucitwa ciiyo antoomwe. Pele tabakabwezi mukuli wabazyali aabo ngobapedwe kuzwa mu Magwalo.”
3 Ino Nimbaakani nzi Nzyobajisi Bana Besu? Amubelekele akubagwasya kuti babe basikutobela Jesu basyomeka. Lwiiyo lwakumubili lulagwasya pele tamweelede kulubikka mubusena bwakusaanguna pe. Mutanikubatumi kuzikolo nkobakkala nkukonya bana ooko nkobatani kuciti aciiyo camukwasyi alimwi ankobatani kutoli lubazu mumulimo wamumuunda kubikkilizyaa kujanika kumiswaangano.—Amubone cibalo cakuti “Sena Mwanaanu Weelede Kuya—Kucikolo Nkobakkala Akoona Nkukonya?” mu Ngazi Yamulindizi yamu October 1 1997.
4 Nubamawisi, sena kuli ziindi nomutajaniki-janiki aŋanda? Ikuti kamutajaniki-janiki, ibana banu tabani kumuboni pe alimwi taakwe nobayoogwasigwa alulayo alimwi acikozyanyo canu. Cilayandika kapati kwaalanga-langa makani aaya kucita kuti kamumukomba Jehova amukwasyi wanu woonse. Amubabikkile mbaakani yakutola lubazu mumulimo wamumuunda alimwi amulimo wabupainiya bana banu. Mbanji bantu baciyandika kuziba kasimpe. Sena inga kwajanika mupainiya omwe mumukwasyi wanu? Mutanikuboni bana banu kuba “basikumuletela mali aaciko pe” naa “basikumugwasya mwaakucembaala”! Abrahamu wakalilisungwide ikupa Jehova mwanaakwe Izaka. Awalo Hana wakalongezegwa akaambo kakupa Samueli kuli Jehova.—1 Sam. 1:28.
5 Zintu Nzyomuyandika Kuyiisya Bana Banu. Amubayiisye bana banu kumvwisya zintu. Sena balizi kuti ikubeja ncibi? Nkaambo nzi ncobateelede kulwanaa bamwi? Nkaambo nzi zilengwa zimwi ncozitali zyabunakristo? Ibana bayandika kwiiya mbokusalwa zintu cabusongo. Amulibelesye Bbaibbele. Oolu ‘ndwiiyo lwa Jehova alimwi amilazyo yakwe.’—Ef. 6:4.
6 Amubayiisye bana kwaamba zintu zyamasimpe. Amubaambile kuti taakwe caambwa kuti “ikubeja kubotu.” Mwanaanu uyandika kuziba kuti ciindi muntu umwi naamba kuti “tandizi” kakuli ulizi, ubeja buya. Amumutondezye sikubeja mutaanzi kuti wakali ni alimwi akaambo Jehova ncatakuyandili kubeja.—Joh. 8:44; Tus. 6:16-19; Dt. 32:4.
7 Ikuyiisya bana kuzwa mu Bbaibbele kuyoobagwasya kuba bana bali kabotu ibateelela mbobalimvwa bamwi. Ibana banji balaacilengwa cakubaseka bantu balemene, ibacembeede alimwi amuntu awa naa kuba muntenda. Pele sena tacili cibotu ku Munakristo ikumugwasya naa kumuumbulizya muntu uuli mumapenzi aliboobu? Amubayiisye bana banu kuti batanoofwubaazyi bantu bacete. Ino mbuti kuti umwi mumukwasyi naa umwi wabasimukoboma waciswa? Sena tacili cibotu ikumugwasya alimwi akutondezya lubomba?
8 Ino mbuti kujatikizya banyama? Amupandulule Jehova mbwazilanga zinyama. (Amubone Matalikilo 9:9-11; Jona 4:11) Muciindi cakukatyola mabbaba kayuni kakacili kazumi, amukajayile limwi kutegwa kacimvwide limwi kucisa. Zintu zinji zibyaabi zilacitika mukupenzya banyama buzubaa buzuba, pele kwiinda mukwiiya kubaa luse bana banu, tabakoyoomufwusa mabwe mubwa pe, kubaduda matwi banyama antela kubaanga mawaya munsingo.
9 Amubayiisye bana ikuba balondo alimwi akupona buumi bubotu. Cibalo cane mubbuku lya Mukwasyi cilijisi twaambo tubotu ntomukonzya kubandika. Amubatondezye kuti Jehova wakalailila bana Israyeli kuti bakeelede kusamba. Kunyina naakabaleka buyo kuti kabaile kusiya mafwuse abusena buli boonse. Wakabalailila kuti bakeelede kubaa zimbuzi zisalala. (Dt. 23:12-14) Mutalekeli bana kuti kabasobanaa zizyo zyabo zyabwaalumi naa zyabwanakazi. Amubasalazile kuti tabeelede kulekela zilengwa zitondwa eezyo zicitwa abasimukoboma naa bantu aabo batali banaleza kutupa kusampaula Jehova. Ibana tabeelede kusuba kufwumbwa mpobabede naa ikusiya tubi kufwumbwa mpobayanda kuti bakkale. Bana baniini balakonzya kubelesya eeco ncobati cisubilo naa incemba. Amubayiisye kulilemeka munzila ‘iisalala.’—1 Pet. 1:16; 1 Kor. 7:14.
10 Zyoonse eezi ziyanda ciindi alimwi akusolekesya, pele muyoocibelesya kabotu ciindi canu mwanoocita boobo. Ikuti kamucita zintu antoomwe abana, bayoomuyanda loko. Alimwi cilagwasya bazyali ikutaba beenzu kubana babo.—Muk. 2:24; 3:12, 13.
Sena Muli Bazike Kuzilengwa Izitali Zyabunakristo?
11 “Nkaambo kaako, nomuyandwa, mbumulangila zintu ezi, amusungwaale kujanwa mulikede muluumuno, mutakwe kabala, mutakwe kampenda mumeso aa-Leza.” (2 Pet. 3:14) Lugwalo oolu lutupa lulayo aciindi ceelede. Tweelede kucita mbuli mbotukonzya kutegwa tukajanike katutakwe kabala kuli Jehova.
12 Twakacinca kapati ciindi Jehova ‘naakatwiita kuzwa mumudima akutunjizya mumumuni wakwe uugambya.’ (1 Pet. 2:9) Ikusekelela Kkilisimasi, ikukomba mituni alimwi akusekelela mazuba aakuzyalwa, nzimwi zyaziyanza zitamukkomanisyi Jehova. Ikucinca kuzwa mumudima akuya mumumuni tacili cintu cuuba-uba pe. Zimwi ziindi tulakonzya kufwubaazigwa akaambo kakuti tatutoli lubazu muzilengwa eezi izitali zyabunakristo. Pele toonse tweelede kuzilangisya zilengwa zicitwa kubusena nkotubede akubona naa zileendelanaa mumuni naa amudima.
13 Sena zilengwa alimwi aziyanza zyoonse nzibi? Peepe. Nkozili zimwi ziyanza zili kabotu eezyo nzyotukonzya kuzumina, pesi kuli zimwi zitali kabotu eezyo zitamukkomanisyi Jehova. Ikusamausya beenzu, kulemeka bapati, ikugwasya bapengede nziyanza zyeendelanaa Magwalo. Iziyanza zimwi mbuli zyakwaanzyanya naa nsamino kanjikanji tazikazyanyi anjiisyo zyamu Bbaibbele. Pele kuli ziyanza zimwi Jehova nzyayanda kuti tuzintantamuke. Akati kazyeezyo kuli kusama zitumwa. Munyika, iciindi mwana naazyalwa kuli zintu zimwi zicitwa akaambo kakuyoowa mizimo. Kuli ziyanza zinji zidumide izitali zyabunakristo mbuli zijatikizya lufwu alimwi adilwe.
14 Cilengwa cakusama zitumwa akulicingilila kubulozi naa kumyuuya mibi cilidumide kapati. Eezi zintu ziliswaangene kapati akukomba mizimo, aboobo eeci cilakonzya kunyonyoona cilongwe ncotujisi a Leza. Zitumwa zilakonzya kubonwa mbuli kuti inga zyapa muntu inguzu ziindilila, pele inguzu eezi zizwa kumadaimona. Jehova ulizisulide kapati zitumwa mubbuku lya Deuteronomo 18:9-12; Ba-Galatiya 5:19-21 alimwi a Ciyubunuzyo 21:8. Ikubelesya zintu eezi ncimwi buyo akukomba mituni. Banakristo bakulwaizigwa kuti beelede ‘kuccija kukomba mituni.’—1 Kor. 10:14.
15 Kubakombi ba Jehova bansiku izitumwa zyakali “zisesemyo,” pele bana Egepita, bana Roma alimwi aba Giliki bakali kuzibelesya kazili zilikwabilizyo kumyuuya mibi. Tatweelede kuba mbuli basikukomba mituni aaba munzila iili yoonse! Kwiinda mukubelesya zitumwa, tulalitola tobeni kumadaimona kuti atupenzye naa kutusunka kuti tube basikukomba mizimo. Caantangalala alimwi anotuli tolikke, atutondezye kuti twakazisiila limwi buya zilengwa eezyo zijatikizya kukomba madaimona.
16 Mumyaambo imwi, kuli zilengwa zyakuti mukamufwu weelede kusalazigwa, izilengwa ezi zitali zyabunakristo. Akati kazeezi kuli kugela masusu, ikutasamba, ikutasama zisani zili kabotu, kupa zipaizyo azintu zimbi buyo. Ibamwi balamukasya mukamufwu ikuti akwatwe pele Bbaibbele lyaamba bumbi ku 1 Ba-Korinto 7:39. Ibamwi balamusinikizya ikukwatwa kumulamwaakwe kutegwa batamunyazyi lubono abana naa kumwaambila kuti boonane amulamwaakwe kutegwa “bamusalazye.” Ikukaka kucita zintu eezi cilakonzya kuba musunko mapati kuli mukamufwu Munakristo, pele kumwi weelede kuziba kuti mumakani aaya weelede kumvwida Jehova amulawo wakwe.—1 Kor. 6:9, 10; Heb. 13:4.
17 Ziyanza naa zilengwa eeyo zitakkomanisyi Leza ziitwa kuti ‘nkweenda kwabuyo.’ (1 Pet. 1:18) Jehova ulatucenjezya ku Ba-Kolose 2:8 kuti: “Amucenjele kuti kutabi muntu naba omwe uumuyunga . . . akukwaamba makani aatawo aazwa kutunsiyansiya twabantu . . . aatazwi kuli-Kristo pe.” Inzya, nkozili zilengwa zikonzya kutusololela mukakole.
18 Jesu wakaambila ba Juda bamwi kuti: “Mwaleka Mulao wa-Leza, mwajatisya tunsiyansiya twabantu. . . . Ncobeni mulasusya Mulao wa-Leza kuti mukayobole tunsiyansiya twanu.” (Mk. 7:8, 9) Luyando lwesu kuli Leza alimwi akasimpe zyeelede kutukulwaizya ikuleka tunsiyansiya twabantu akukakatila kumilawo ya Jehova. Jehova takamulongezyi pe ooyo ulyaamba kuti mmubelesi wakwe pele ulalinjizya muziyanza zitali zyabunakristo.