Atumulemye Jehova Kwiinda Mubukkale Bwesu—Cibeela 4
1 Kuli ziyanza zinji kapati zitali zyabunaleza zicitwa zijatikizya dilwe. Makani aaya tweelede kwaacenjelela kapati kutegwa tutasanganyi bukombi bwa Jehova aziyanza zyabantu batakombi Leza. Kweelanaa zintu nzyotucita tulakonzya kweeleba naa kulinjizya muziyanza zitali zyabunaleza.
2 Ncibotu kufwambaana kumuzikka mufwu. Eeci ciyookasya basazinyoko ibatasyomi kulindilizya mutumba masiku oonse noutanazikkwa. Pele ino kulindilizya caamba nzi? Ndeeliya ibantu nobabungana akubucesya masiku oonse kabalindilila mutumba. Pele taakwe kaambo kali koonse bantu ncobeelede kubucesya masiku oonse, kabaimba, kuomoka, kuyabila antela kunywa. Ikutegwa kutabi micito iili boobu, ncibotu kufwambaana kuzikka mufwu kabatanasika basazinyoko aabo batasyomi ibanga bayanda kuti kucitwe zintu eezi izitali zyabunakristo. Bakwesu bamwi balakazya ategwa kweelanaa kubusena nkobakkala icilengwa cakulindilizya mufwu inga tacikonzyi kweelebwa pe. Ibamwi mane basika nkobataunki akumiswaangano nokuba mumvwiki yakuswaya kwamulangizi wabbazu, akaambo kakuyanda buyo kuyoojanika kumadilwe nkobabucesya alo aatola ciindi cilamfwu. Ino inga twabagwasya buti basimukoboma ikuti baiye kasimpe naa katubasangana muziyanza zyabo zitali zyabunakristo?—2 Tim. 1:7.
3 Ikutabucesya adilwe tacaambi kuti tatuuside pe. Kulila takukasigwi pe mu Jwi lya Leza. Pele eeci ciliindene azilengwa zicitwaa dilwe, mucikozyanyo, bamakaintu basama zisani zilaatombe naa ziyawukide, tabakamuni masusu, basama buyo kucibuno, kuomoka buya kulila kutegwa bamvwugwe, balazemba oku akooku, balalila kumwi kabaimba ziimbo alimwi akulila caantoomwe kabali mukabunga buya. (Amweezyanisye Deuteronomo 14:1, 2.) Bulangizi bwabubuke bweelede kutugwasya ikutaciindizya kulila. Tulakonzya kuusa, pele tatweelede kuciindizya pe. (1 Tes. 4:13) Ikuciindizya kuusa kulakonzya kutupa kutabikkila maanu kuzintu zyakumuuya, mane akuyeeya kuti tatweelede kujanika kumiswaangano antela kukambauka kwaciindi cili mbocibede.—Lk. 22:45; Mk. 14:50; amubone Awake! yamu December 8, 1974 amapeeji 24-28.
4 Takuyandiki kutondezya buumba bwesu kwiinda muli zyakusama pe. Nokuba kuti Munakristo ulakonzya kusama zisani zisiya ciindi nalila, Magwalo takulwaizyi kusama zisani zisiya kwaciindi cilamfwu alimwi akubelesya zintu zitondezya buumba mbwajisi umwi akaambo kakusweekelwa. Nokuba kuti Jesu wakalila alimwi akweetela ciindi lyakafwa Lazaro, taakwe abuniini icitondezya kuti wakalisamika naa kulibikka zintu zimwi kutondezya buumba mbuli mbobakali kucita bama Juda. (Joh. 11) Nokuba boobo, Banakristo tabeelede kunyemya bamwi kwiinda mukuciindizya kusama zisani zyacipaale.—Joel. 2:12, 13.
5 Ibamwi balaciindizya mukubamba mubili uyanda kuzikkwa. Bana Egepita bakali kunanika mutumba musamu utabozyi akuusamika zisani zidula kapati alimwi bakali kubikkilizyaa mpasya zinji zyakali kuyeeyelwa kuti muntu mufwu wakali kuyoozibelesya mulweendo lwakwe. Cilengwa eeci cakubikka zintu atala naa mukati kacuumbwe cakazwa kunjiisyo yakuti buumi bwamuntu tabufwi ciindi muntu nafwa. Nokuba kuti bamwi inga bayanda kuti bausanzye mutumba, takuyandiki pe ikubelesya zintu zidula buya mukuubamba.
6 Mumasenaamwi bantu balalikatazya ikulonzya mutumba kuya kubusena bumbi, ikanjikanji kuyoomuzikkila kooko kwakazikkilwa basikale babo. Muciindi cakulikatazya kweenda musinzo buya, ncibotu ikumuzikkila afwaafwi ankwaafwida.
7 Ikuti kamuli ndinywe mweendelezya dilwe, mutazumizyi kuvwelanya lusyomo, ooko baambi bacikombelo cakasimpe alimwi acakubeja nkobapegwa ciindi kuti baambaule, mucikozyanyo eelyo nomuli kunamaumbwe. Ikuti naa twalipedwe cibeela cakuti tukanane makani aamwi, tatweelede kutola lubazu mupulogilamu eeyo kwalo ibaambi bamwi nkobali mukubandika ziyanza zitali zya Bunakristo naa njiisyo zyabana Babuloni. Tatukatoli lubazu mucilengwa cakubikka maluba, kulamba naa kufwusa bulongo mucuumbwe. Alimwi takuyandiki pe kubamba nkomwe “yamali aamalila” mumbungano. Ilugwasyo ndobapa bakwesu ciindi nokwacitika zili boobo ndunji.
8 Ziindi zimwi ibasazima batasyomi balakakatila kuti kucitwe ziyanza zimwi adilwe alimwi aciindi cakuzikka. Pele ikuba Munakristo, mwiniŋanda naa uujisi nguzu zyakweendelezya dilwe, tweelede kubaambila cakusalazya kujatikizya ncotusyoma kweelana ncolyaamba Bbaibbele. Aabo bantu bakakatila kucita ziyanza zitali zyabunakristo tulankonzya kubaambila kuti bazwe alubuwa kutegwa zintu eezyo nzyobayanda bakazicitile kubusena bumbi. Ikuti naa Munakristo wakakilwa kweendelezya basazinyina batasyomi, uleelede kubasiya balikke, nkokuti weelede kulizandula kuti atatoli lubazu muziyanza zikazigwaa Jehova.—Mt. 10:21, 35, 36.
9 Ikulanganya Zyuumbwe: Kumasena aamwi bantu balakulwaizigwa kubikkila maanu kukulanganya cuumbwe. Bantu balakonzya kubikka mazuba boonse nobeelede kuunka kunamaumbwe akuyoosalazya cuumbwe alimwi akupa bulemu kumuntu wakafwa. Basikale bakali kubikkila maanu mukubamba zyuumbwe. (Matl. 35:20) Nokuba boobo, aaya mmakani aakulisalila kuli umwi aumwi naa uyanda kuyoobona cuumbwe akazikkwa musazinyina kutegwa aliyeekezye kujatikizya nguwe. Pele sena Munakristo uyandika mazuba aabikidwe buya kutegwa acite boobo? Zintu izili boobo zilakonzya kucitwa kufwumbwa buzuba. Luyando lwesu ndotujisi kuli Jehova lweelede kutugwasya kuba bantu baimvwi kabotu cakusalala. Tulakonzya kupenzyegwa akaambo kakusyomeka kwesu kuli Jehova, pele tulakonzya kuumbulizigwaa majwi aali kuli 1 Petro 2:19, 20. Bukkale bwesu bweendelezyegwaa kasimpe bweelede kutwaandaanya kuziyanza zitali zyabunakristo kutegwa tumukkomanisye Leza.—Rom. 1:25; 2 Kor. 6:17.
10 Kwiinda mukweeleba ziyanza zitali zyabunaleza kujatikizya kuzikka mufwu, tulasinizya kuti tatutoli lubazu mubukombi bwakubeja alimwi amumicito yamadaimona, aboobo tulazumanana kubaa bulongwe bubotu a Jehova.