Sena Ncobeni Mulazilumba Zilongezyo zya Jehova?
1 Tulijisi cintu cimwi ciyandika loko ncotweelede kulumba kapati. Ino ncinzi eeco? Ibbaibbele lilacaamba noliti: “Mulao wamulomo wako wandibotela kwiinda zyuulu zyangolida azyansiliva.” (Int. 119:72; Tus. 8:10) Nokuba kuti ingolida ncintu ciyandisi, imulawo wa Jehova ulayandika kapati kwiinda njiyo. Iluzyibo lwakasimpe kujatikizya milawo yakwe kubikkilizyaa busongo alimwi abupampu nzyapa Jehova kubabombe myoyo bayandaula kasimpe nzintu zyeelede kuyandwa kapati. Zilatugwasya kutegwa tulikwabilile, kuliyumya mubukkale bukatazya, kulwana mapenzi cakuzwidilila alimwi akukkwanaa zintu nzyotujisi cakukkomana.
2 Kutalikila mu January 1, 2000 Jehova wapa ‘mulao uyandika wamulomo wakwe’ kubantu boonse kwiinda mububambe bwakusanga. Ibubambe oobu bwaleta mpindu zibotu kubabelesi ba Leza, kunyina makani abukkale bwabo kumakani aamali, balakonzya kulijanina zintu zyakumuuya ziyandika. Imabbuku taali akupa buyo nkaambo kuyandika mali kutegwa asimbwe alimwi akutuminwa kumbungano. Nokuba boobo, nobaba bacete balakonzya kubweza mamagazini alimwi amabbuku ngobayanda, alimwi kusanga kwabo kusyoonto kumulimo wanyika yoonse kulalumbwa kapati.
3 Nokuba kuti bamwi batondezya kulumba kupati kuluzyalo lwa Jehova mumakani aaya, bamwi batondezya kulumba kusyoonto nokuba kutalumbila limwi buya nokuceya. Ino kutalumba ooku kutondezyegwa buti? Cakusaanguna, kwaba kuyaansi kapati kumweelwe wazyakusanga zituminwa ku Sosaiti. Ibantu bali kunze lyambungano balabonwa kabapa zyakusanga, aboobo sena caamba kuti ndiswe buya twaalilwa kutondezya kulumba kumabbuku aaya ayandika kapati ngotubweza kutegwa tubelesye? Cabili, ibamwi cakutalanganya booda zintu zinji zyoodwa buyo nokuli muntu uuziyanda nzyobatakali kukonzya kaindi. Bamwi cakutayeeya booda mateepu aamavidiyo, pele tabajisi azipekupeku pe! Cilamukkomanisya Jehova kwaabila umwi aumwi sikumwaya azintu nzyayandika, zibikkilizya kkopi yamagazini ya Ngazi Yamulindizi, bbuku liyiigwa aciiyo cabbuku alimwi a Bbaibbele. Ikuti naa kaindi tiitwakali kukonzya kujana zintu ezi zidula zyoodwa buyo nokuli muntu uuyanda, inga tacikooba kabotu kooda alimwi akuyobola zintu eezi lino. Icatatu, lyamuswaangano wacooko wa “Basikucita Zyaambwa mu Jwi lya Leza,” imabbuku mapya akapegwa kwaciindi cakusaanguna mububambe bwakusanga. Ibanakristo basimide bakaima kabotu mumulongo akulindila cakukkazyika moyo kutegwa batambule mabbuku mapya. Nokuba boobo, twakausa kapati kutambula malipooti aakuti bamwi cankazi bakali kwiinda kumbele kwiinda mukutonka beenzinyina munkamu alimwi bamwi nokuba buya ikutalika kubwesyanya nobakali kuyanda kujana ncobayanda cabulyatu.
4 Ikutalumba ncitondezyo cimwi cizibya kuti tupona “kumazuba aakumamanino.” Imwaapostolo Paulo wakacenjezya kuti: “Kumazuba aakumamanino kuyooba ziindi zikataazya. Nkaambo bantu bayooba basikuliyanda, . . . batalumbi.” (2 Tim. 3:1, 2) Mbotuli baluzubo lwa Adamu sizibi, ibantu boonse bazyalwaa kampenda kabulyatu alimwi acilengwa cakutalumba. (Rom. 5:12) Ikutalumba akwalo ncibeela camuuya wabulyatu uuli mukweendelezya bantu bali munyika eeyi. Mbubonya mbuli muya ngotuyoya, muuya ooyo wabulyatu uuli konse-konse alimwi ulatuyambukila. (Ef. 2:1, 2) Aboobo tweelede kutondezya muuya wakulumba. Mbuti mbotunga twacita boobu? Ikwiinda mukuyeeya cakuzinzibala kujatikizya zintu Jehova nzyaatucitila. Mucikozyanyo, Rahabu simamambe wakatondezya luzyalo kwiinda mukusisa basikutwela bana Israyeli. Aboobo, bana Israyeli bakatondezya luzyalo kwiinda mukumufwutula antoomwe amukwasyi wakwe nobakanyonyoona munzi wa Jeriko. (Jos. 2:1-21; 6:20-23) Elo kaka cabota cikozyanyo citondezya kuti lwesu kutugama tweelede kupilusya luzyalo kwiinda mukuba bantu balanganya alimwi akuba basiluse!
5 Sena mulatondezya luse kuli Jehova kwiinda mukumulumba alimwi ambunga yakwe akaambo kazintu zyoonse zibotu nzyomuli mukutambula? Jehova waamba kuti: “Uupaizya kulumba nguundilemeka, ayooyo uubamba inzila yakwe njoomubonya lufutuko.” Amujane lukkomano lujanika kwiinda mukutondezya kulumba camoyo woonse kulinguwe.—Int. 50:23; 100:2.
6 Lyamuswaangano wacooko wa “Bamayi ba Jwi lya Leza” ooyu uuboola, mbuti mbotweelede kuyoolilemeka twanootambula mabbuku mapya? “Umwi aumwi akati kesu akondezye mweenzinyina kukumucitila cibotu cakuyakana. Kuti camoyo omwe acamulomo omwe mulemeke Leza wisi Mwami wesu Jesu Kristo.” (Rom. 15:2, 6) Kulilemeka kwesu muziindi zili boobu kulakonzya kuleta bulemu naa masampu kuli Jehova, pele toonse atukanze kulilemeka munzila yeelede bantu bakomba Leza wakasimpe kwiinda mukubalanganya basimukoboma. Ibaalu abakutausi alimwi abana babo balakonzya kupa citondezyo cibotu kwiinda mukwiima munzila yabulemu mumulongo nobalindila kuti ciindi cabo cisike cakubweza mabbuku mapya. Taakwe weelede kwiindila mweenzinyina pe. Ibantu bamwi bakunyika bajanika kumuswaangano balakonzya kutalika kutonkana alimwi akulyaatikizya, pele kuti batubona mbotulilemeka “[ba]yoobona lwaandaano akati kabaluleme ababi, aakati kabaabo babelekela Leza abaabo batamubelekeli.”—Malaki. 3:18, BT.
7 Kunze lyaboobo, toonse atubikkile maanu lino mbuli mbotuyootondezya kulumba kuzintu ziyandisi nzyotuyootambula. Jehova ukulwaizya babelesi bakwe kuti, “Ziindi zyotatwe mumwaka amundicitile ipobwe. . . . Kutabi uuza kulindime acinkwamaanza.” (Kul. 23:14, 15) Toonse atukanze kutondezya kuti ncobeni tulalumba zintu Jehova nzyatwaabila kutegwa tumuzyibe alimwi akumuyanda.