Sena Inga Mwaakubeleka Kubusena Buyandika Lugwasyo?
1 Sena kuli nomwakayeeyede kulongela kubusena kuyandika bakambausi ba Bwami banji? Ikuti bamulomba ‘kuzubuka . . . kuyoogwasya,’ sena inga mwaingula mbubwenya mbwaakacita mwaapostolo Paulo? (Inc. 16:9, 10) Mumbungano zinji, kuyandika mikwasyi iisimide munzila yakumuuya, bapainiya kutegwa bagwasye kumanizya kubeleka mucilawo, naa baalu basimide alimwi abakutausi kutegwa babweze mukuli wabusolozi. Icilawo cilakonzya kacijisi tunzi twaandeene-andeene tutanteene koonse-koonse muminzi mipati. Ŋanda ya Bwami ilakonzya kaili kubusena bulampa makkilomita manji. Imulimo wakumubili ulakonzya kuutajaniki. Ibuzuba mbobuca tabukonzyi kuti kakuli kabotu lyoonse, kulakonzya kakutontola naa kupya. Sena muyoolisungula kuba mubuyumuyumu buli boobu? Ino mbuti mbocinga cakonzyeka kuzwiidilila?
2 Lusyomo Lulayandika: Abramu naakalaililwaa Leza, wakasiya munzi wakwabo wa Uri akweenda musinzo uulampa makkilomita aali 1,000 kuya ku Harani antoomwe amukaintu wakwe, mujwa wakwe alimwi awisi ucembeede, Tera. (Matl. 11:31, 32: Neh. 9:7) Naakafwa Tera, Jehova wakalailila Abramu wakalaa myaka yakuzyalwa iili 75 kusiya cisi ca Harani alimwi abasazinyina akuya kucisi ncaakali kuyoomutondezya Leza. Abramu, Sarai alimwi a-Loti bakatalika ‘kuunka.’ (Matl. 12:1, 4, 5) Masimpe, Abramu tanaakalonga kutegwa akabelekele kubusena bwakali kuyandika babelesi kapati. Pele kulonga kwakwe kwakali kuyandika cimwi cintu. Ino ncinzi?
3 Kwakali kuyandika lusyomo muli Leza kutegwa Abramu abweze mukuli ooyu. Miyeeyo alimwi abukkale bwakwe zyakeelede kucinca. Wakeelede kusiya lukwabililo ndwaakajisi kubasazinyina. Pele wakasyoma Jehova kuti ulamubamba kubikkilizyaa bamuŋanda yakwe. Ibanji sunu batondezya lusyomo lwabo muli Jehova munzila iikozyenye.
4 Milimo Yaciindi Cisyoonto: Sena kuli nomwakabotelwaa zilongezyo ziboola akaambo kakubelekela mucilawo citabelekwi-belekwi? Kuli bamwi, eeci cakali kujatikizya kweenda misinzo milamfwu. Sena cakabakagwasya ncobeni?
5 Mubuzuba bwakusaanguna kabakambaukila kucilawo citabelekwi-belekwi kulampa makkilomita aali 80 kujwe lya Lusaka, banabukwetene bobile bakajana mudaala wakafwidwa mukaintu uutandila kumyaka iili makumi aali musanu aatatu. Iciiyo cakatalisigwa mubroshuwa ya Ncayanda alimwi ikuyaambele kubotu kwakalibonya. Nobakamanizya ciiyo 10, “Micito Njasulide Leza” imudaala ooyu wakabona kuti wakeelede kucinca bukkale bwakwe nkaambo tanaakali buyo sikufweba tombwe, pele alimwi wakali kusambala tombwe aŋanda yakwe. Imukwesu uulula kuti: “imakani ngondakabala akamunjila kapati. Ino wakalimvwa buti? . . . Wakandilanga alimwi akubuzya kuti, ‘ino ncinzi ncondeelede kucita kutegwa ndicileke cilengwa eeci cibyaabi?’ Twakamukulwaizya kupaila kuli Jehova kulomba lugwasyo buzubaa buzuba.” Nokuba kuti ciindi nobakali kwiinka kuyooyendelezya ciiyo bakali kujana mudaala talimvwide kabotu, wakali kubasungilizya kaamba kuti: “Amundiyiisye alimwi kwaciindi cisyoonto buyo kujatikizya nyika ya Paradaiso.” Nokwakayandika kuti basikumwaya bapilukile kucilawo cokwabo, mudaala wakazumanana kuyaambele. Wakaleka kuunka kucikombelo cakwe, kufweba tombwe alimwi tanaakacili kusambala tombwe aŋanda. Nokuba kuti mukubula coolwe mudaala wakaciswa alimwi akufwa, ikusoleka kwabasikumwaya kwakazumanana kuzyala micelo mibotu mbwaanga basazinyina bamwi kubikkilizyaa mwanaakwe musimbi bakazoozumina kubaa ciiyo ca Bbaibbele. Basikumwaya banji balazumina kuti kubeleka nokuba kwaciindi cisyoonto kubusena buyandika lugwasyo kwayungizya lukkomano mumulimo wabo. Amubandike abaabo bakacita kale boobo. Muyoojana kuti bakayumizigwa kumuuya alimwi balangilwa kuti bayoocita alimwi ikuti bapegwa coolwe.
6 Ikuzumina mukuli wakuyoobelekela kubusena kubulide nokuba kwaciindi cisyoonto kujisi mpindu iimbi alimwi. Aabo bacita boobo balakonzya kujana twaambo tuyandika twakubagwasya ‘kubala mali’ kutegwa balongele kubusena bumbi bwacisi.—Lk. 14:28.
7 Ikulongela Kubusena Kuyandika Lugwasyo: Jehova ulikanzide kubona kuti makani mabotu akambaukwa “munyika yoonse” mamanino kaatanasika. (Mt. 24:14) Mbwaanga mulizyi oobu, ikuti kamukonzya sena inga mwalisungula kulongela kubusena kuyandika lugwasyo? Ikubula nkokuli mumasena manji.
8 Sena mwakacileka kubeleka mulimo wakumubili? Sena mulaa mali aali mbwaabede? Ikuti kakutali boobo, sena inga mwalijanina mulimo wakucita uukonzya kumuletela mali? Sena inga mwacikonzya kukkala kufwumbwa kubusena kwiinda mukutobela bukkale mbomuyoojana? Ikuti kamutacikonzyi kulonga, sena inga mwagwasya umwi mumukwasyi kuyoobelekela kubusena kumbi?
9 Ikuti mwamana kubikka kaambo aka mumupailo mwalimvwa kuti inga mwacikonzya kulongela kubusena kuyandika lugwasyo, amukabandike abaalu banu mumbungano. Mwamana, amulembe lugwalo ku Sosaiti. Amupe baalu lugwalo kutegwa babikkilizye mizeezo yabo alimwi akulumbaizya kabatana lutumya kuofesi lyamutabi.
10 Ino ncinzi ncomweelede kubikkilizya mulugwalo lwanu? Myaka yakuzyalwa, deeti nomwakabbapatizigwa, mikuli njomujisi mumbungano, ikuti mulikwete naa kukwatwa alimwi naa mulijisi bana bacili basyoonto. Amulembe zina lyambungano nkomuyanda kuyoobelekela, kweelanaa zintu nzyomuyandika.
11 Ikuti sikumwaya kayanda kulongela kucilawo cilangwaa ofesi lyamutabi limbi, Kkomitii Yamulimo Yambungano yeelede kulomba akubikkilizyaa lugwalo lwakulumbaizya sikumwaya cacigaminina kumutabi ooyo uuyandika. Makkeyala aamaofesi amitabi alakonzya kujanwa kusule aa Yearbook yaino-ino.
12 Sena mulijisi busungu alimwi abupampu? Sena bukkale bwanu bulamuzumizya kuyoobelekela kubusena buyandika lugwasyo? Ikuti kakuli boobo, amulangilile mubone Jehova mbwazumanana kupa zilongezyo alibaabo bamusyoma nobatondezya muuya wakulyaaba!—Int. 34:8; Malk. 3:10.