Ibamwi Basyoma Ndinywe
1 “Liso talikonzyi kwaambila ijanza kuti, Nsikuyandi.” Ikuti lyaamba boobo, ino ncinzi cikonzya kukwabilila liso kuntenda? Nkakaambo kaako imwaapostolo Paulo ncaakabelesya mubili wamuntu ujisi zizyo zisiyene-siyene ikutondezya masimpe aakuti umwi aumwi wesu ulayandika kumweenzinyina mumbungano. Mane wakalemba akuti “ezyo zizo zyamubili nzituyeeya kuti zilikompeme, azyalo zilayandika.” Inzya, tulagwasigwaa bamwi alimwi abamwi bayandika kugwasigwa andiswe mbwaanga tuyanda kuti toonse ‘tugwasyanye’ nkaambo “toonse tuli basizizonyina mumubili omwe.” (1 Kor. 12:21-27; Ef. 4:25) Amuyeeye nzila zimwi mbomubagwasya bamwi kwiinda mumilimo yanu.
2 Mumukwasyi: Baalumi abamakaintu balayumizyanya-yumizyanya kwiinda mulusyomo, busicamba alimwi abusungu mbobajisi ciindi nobabikka zintu zyakumuuya mubusena bwakusaanguna. Mbubwenya buyo, ikulanga kwazintu nkobajisi bazyali alimwi acikozyanyo cabo cibotu zilakonzya kubagwasya kapati bana babo kujatikizya kuyeeya kwabo alimwi akutola lubazu mumulimo kubikkilizyaa miswaangano ya Bunakristo.
3 Mumulimo: Ibusungu bwanu mukukambauka makani mabotu aa Bwami bulabakulwaizya abalo basikumwayanyoko ikubeleka canguzu mumulimo. Cikozyanyo canu cibotu cilagwasya kapati mbubwenya buyo mbomubagwasya bamwi munzila iigaminide ikutola lubazu mumulimo. (2 Tes. 3:9) Bapainiya balalumba kapati kulugwasyo ndomubapa kwiinda mukubasangana mumulimo wabo. Masimpe, aabo ibalaa luyandisyo mbomujana mumuunda balangila kuti mukapilukile akuya kubagwasya kujana nzila iisololela kubuumi. Mutabatyompyi pe.
4 Mu Mbungano: Ikujanika alimwi akutola lubazu kwanu mumiswaangano yambungano kulabakulwaizya kapati ibakwesu abacizi. Ikuti tamujaniki, tamuli buyo nyolikke nomukozya kwiindwa zintu. Ibamwi tabakooyoogwasigwa akujanika kwanu amiswaangano. Masimpe, ibaalu balamusyoma mbubwenya buyo mbomubasyoma nywebo. Ibulangizi bubotu bwazintu mbomujisi alimwi akulisungula kwanu kulaubya-ubya mulimo wabo wakweembela butanga.
5 Kwiinda mukwaambaula alimwi amumicito, ‘atubusyanye-busyanye mukuyandana akucita milimo mibotu.’ (Heb. 10:24) Jehova uyootulongezya akaambo kakusyomeka kwanu.