Amuzumanane Kubikka Bwami Mubusena Bwakusaanguna
1 Ikubikka Bwami bwa Leza mubusena bwakusaanguna mubuumi bwesu alimwi akuzumanana kucita boobo tacili cuuba-uba pe ciindi notulaa penzi lyamali naa mapenzi aambi. Ino mbuti mbotukonzya kuzumanana kubikka Bwami mubusena bwakusaanguna ciindi notulaa penzi? Ino mbuti kuti twapegwa mulimo uutatupi ciindi cakujanika kumiswaangano antela ooyo uunyonganya ciindi cesu camumulimo wamumuunda? Izintu nozili boobo, sena caamba kuti Bwami bweelede kubikkwa mubusena bwabili mubuumi?
2 Lusyomo Luyumu Lulayandika: Iciindi lusyomo lwesu nolusunkwa munzila iili boobu, tatweelede kuluba zisyomezyo zya Jehova alimwi a Jesu zyakuti, ikuti twabikka Bwami bwakwe mubusena bwakusaanguna, tuyoogwasyigwa a Leza. (Int. 37:25; Mt. 6:31-34) Mapenzi aacitika munyika alakonzya kutunyonganya akutulesya kubona Bwami kuti ncecintu cipati kwiinda zyoonse mubuumi. Ibamwi bayanda kuti kabalaa mpuwo akaambo kacuuno ncobajisi mumulimo ngobabeleka antela kubona buvwubi kuti nzyezintu ziyandika kapati mubuumi bwabo. Nokuba boobo, tweelede kubikkila maano kapati kuzintu zilaampindu mubuumi bwesu mbubona mbuli Paulo mbwaakali kucita.—Flp. 3:7, 8.
3 Sena Kuyandika Kucinca? Sikumwaya umwi wakati: “Makwebo aangu cakali cintu ncindakali kubikkila maanu kapati—ncecintu ncindakali kuyandisisya. Ndakali kuyeeya kuti inga ndazumanana kandili Kamboni kumwi ciindi cinji kandicimanina kumakwebo aangu.” Pele mwanakazi ooyu wakazumanana kuyeeya kuti wakali kukonzya kumubelekala Jehova kwiinda waawo. Nokwakainda ciindi wakacileka kucita makwebo aakali kumupa kuti atayi ambele munzila yakumuuya. Eelyo naakatalika kubeleka cabusungu kumulimo wa Bwami, wakakonzya kwaamba kuti: “Lino ndilimvwa kuti ndibubelesya kabotu buumi bwangu munzila iimukkomanisya Jehova, calo cili ncecintu cipati kwiinda zyoonse.”
4 Cikondelezya ncakuti, ibanji baileka milimo yakumubili alimwi anzila zyakujana mali manji nzyobali kulangila, baubya-ubya bukkale bwabo akutalika mulimo waciindi coonse. Ibakutausi ibacili bakubusi alimwi abaalu ibatanakwata ibakajanika ku Cikolo Cakwiiya Mulimo bazicita eezyi alimwi balakkomana azyoolwe zitaliboteli mumulimo. Kabaiya cikozyano ca Paulo cibotu, balakkutilaa zintu zisyoonto buyo nzyobajisi.—1 Kor. 11:1; 1 Tim. 6:6-8; Heb. 13:5.
5 Nokuba kuti ibantu bakunyika balakonzya kutufwubaazya akaambo kabuumi mbotupona, tulijisi zilongezyo zya Jehova. (1 Kor. 1:26-31) Sena tacikulwaizyi kuzyiba kuti uyootubelesya kusikila mpotugolela alimwi akuti uyootugwasya kumanizya mulimo wakwe? Icoolwe ncotujisi lino cakwaambilizya Bwami Leza mbwaakatalisya, kunyina nociya kwiindulukwa alimwi pe. Aboobo ecino nceciindi cakuti tuzumanane kubikka Bwami mubusena bwakusaanguna mubuumi bwesu.