Amubagwasye Bantu Kujana Inzila Iisololela Kubuumi Butamani
1 Nokuba kuti zikombelo zyoonse zilyaamba kuti zilapa busolozi bugwasya mukubelekela Leza, ikuyiisya kwanzizyo kuliindene. “Musinsimi” Jesu kunyina naakaisya kuti zikombelo zyoonse ninzila ziindene buyo, izisololela kubuumi butamani. (Joh. 7:40; Mt. 7:13, 14) Nokuba kuti wakalizyi kuti bamwi bayootondezya buyo “ciwa cabukombi,” Jesu wakalisinizyide kuti bamwi bayoobujana akubutobela bukombi bwakasimpe.—2 Tim. 3:5; Joh. 4:23.
2 Ino mbuti bamwi mbobanga baiya kasimpe ka Leza akumukomba munzila iitambulika? Imazwanga aazikombelo alakonzya kumanizyigwa caluumuno ikuti naa zikombelo zyakuzumina ikuzwa kasimpe keni-keni ka Mulengi wesu. Ikuzwa kasimpe aako, muu Bbaibbele. (Joh. 17:17) Nokuba kuti bantu banji batobela bukombi bwabazyali babo naa oobo bujanwa mumunzi mobakkala, nkwiinda buyo mukulilingauda Magwalo akutobela nzyobaiya ikukonzya kugwasya babombe myoyo ‘kuswenena kuli Leza.’ Ikwiinda mukucita boobo, balakonzya kujana nguzu zyiyandika kuti baleke bukkale boonse butamukkomanisyi Leza.—Jak. 4:8.
3 Ibroshuwa ya Sena Mwakaijana Kale Inzila Iisololela Kubuumi Butamani?, ilanga-langa njiisyo azilengwa zidumide. Ikwiinda mukweelanya njiisyo azilengwa eezi ku Jwi lya Leza, ibantu babombe myoyo bayookulwaizyigwa kuzwa mubukombi bwakubeja nokuba kuti balasungilizyigwa abantu mumunzi abamumukwasyi.—Mt. 10:36; 2 Kor. 6:17, 18.
4 Izibalo zyakusaanguna zyobilo mubroshuwa zilapa twaambo ncotweelede kulisyoma Bbaibbele alimwi akulizumina kalili ceelelo cabukombi bwakasimpe. Zibalo 3, 4 a 5 zyaamba Magwalo ncaamba kujatikizya bakkala mubusena bwamyuuya, ibafwide akusyoma mizimo. Izibalo zyasyaala zigwasya ibajisi luyandisyisyo ikuzyiba bukombi buzuminwa akubakulwaizya kuzibelesya nzyobaiya. Izifwanikiso zilibonya kabotu zitondezya zintu zinyenzi amitwe yamakani yaambwa abuzuba zikankaizya mbwaali masimpe makani aabandikwa. Izyakabacitikila aabo bakaleka bukkale bubyaabi zilasyomezya kuti Jehova uyoobagwasya aabo balombozya kucita zintu ziluleme akuleka kucita zibyaabi.—Flp. 4:6; Jak. 4:7.
5 Ibantu munyika yoonse bali mukuzumina ikutambwa kuti ‘banjile mumulyango uumanikide’ akweenda munzila iisololela kubuumi butamani. Tulijisi twaambo tubotu tutupa kuzumanana kuulanga kabotu mulimo wesu alimwi anguzu zya Jwi lya Leza zyakukonzya kucinca buumi bwabantu. Kwiinda mumajwi eesu amukulilemeka kabotu, atutondezye bantu ibusongo bwakuba mubukombi bwakasimpe kutegwa abalo babe azilongezyo zya Jehova kukabe kutamani.—Mt. 7:13, 14; 2 Kor. 10:4, 5; Int. 37:29.