Kabbokesi Kamubuzyo
◼ Ino mbuti mbotukonzya kubutobela ibubambe bwakutugwasya mumulimo wamumuunda?
Ibalangizi Banakristo mbabasololela mumulimo wabukambausi, mbeembezi bankutwe alimwi balabagwasya aabo bakompeme. Eelyo nobalanga busungu bwesu alimwi akukompama kwesu, balacita bubambe bwakutugwasya. Bubambe oobu bulabikkilizya akubeleka andiswe mumulimo.—km 9/96 p. 3 munc. 7; w85 8/1 p. 20 munc. 18.
Mulangizi wa Ciiyo Cabbuku Cambungano ulabikkila maano ikapati kukuyaambele kwesu kumuuya. Ilyamuswaangano wakuya mumulimo wamumuunda, ulapa nzila alimwi azitondezyo mbuli mbolikonzya kubelesyegwa Bbaibbele mubukambausi. Alimwi ulapa lugwasyo lugaminina kuli sikumwaya aumwi. Atubasikile beembezi basiluyando aabo ‘bagwasya aciindi ceelede.’—Is. 32:1, 2; Heb. 4:16.
Iciindi balangizi beendeenda nobaswaya mbungano, bakwesu, bacizyi alimwi abana, balakulwaizyigwa kucita bumbambe bwakuti babeleke anguwe alimwi amukaintu wakwe mumulimo wamumuunda. Elo kaka bubambe oobo bulapa kukulwaizyanya! Tweelede kuzumanana kuzibona kabotu nzila zipegwa zitugwasya kumuuya.—om pp. 49, 52.
Tulizyi kuti Jehova ulamulanganya muntu aumwi. (1 Pet. 5:7) Imulimo wa Jesu wakakankaizya mbuli Leza mbwamubikkila maano umwi aumwi wandiswe. (Lk. 12:6, 7) Balangizi balabikkila maano alimwi balaa luyandisyisyo lwakutugwasya. Tulakonzya kumana kuyeeyela nkobajisi bamwi eelyo balangizi nobacita bubambe bwakubeleka amucizyi naa mukubusi akubayeekezya kaambo ncobabikkilwa alimwi akuzyiba nguzu zyobajisi aabo babeleka kabali baalu.—1 Pet. 5:2; Tit. 1:7-9.
Toonse buya tulakonzya kubelesya busongo kwiinda mukutacita zintu zinga zyapa bantu bamwi kutuyeeyela. Kabbokesi Kamubuzyo mu Mulimo Wesu Wabwami wamu May 1997, kakapa lulayo lubotu kuli baabo babeleka antoomwe amuntu uutali musimbinyina naa musankwanyina mumulimo. Kabbokesi aaka kakati: “Nokuba kuti basikumwaya balakonzya kubeleka antoomwe abatali basimbinyina naa basankwanyina zimwi ziindi, inga eeci cilainda kubota kuti kabali banji.” Amubone kwaamba kuti icikankaizyigwa nkubeleka kabali banji naa kabali munkamu. Ooko kukonzya kujanika bantu banji naa mumasena aabuleya mbuli mumugwagwa alimwi amubukambausi bwakuŋanda aŋanda. Aboobo icikankaizyigwa ncakuti tuleke kucita bubambe bwakuti caba cilengwa buya cakubeleka amuntu ooyo, nkaambo eeci ciyootuletela masunko naa kuyeeyelwa kwalo kwateelede kuba.—Tus. 22:3.