Twakamulemeka Leza Wesu
Icibalo cakuti, “Atugwasyanye Ikubeleka Lyoonse” icili mu Mulimo Wesu Wabwami wa July, cakatukulwaizya kapati kuumanizya kabotu mwaka wamulimo wa 2003 katujisi “mpuwo mbotu yakuba basungu mukubelekela Jehova.” Notulanga-langa mbotwakawoonda mulimo mucisi cesu, atubikkilizye amilimo yakacitwa ambungano yesu. Eeci ceelede kutukulwaizya kuzumanana kulemeka Leza wesu notubeleka cakumaninina mumulimo wa Bwami.
Imweelwe wabasikumwaya waakati-kati mu Zambia ngu 114,757 kweelana awamwakali wakali 110,443. Icaamba kuti kwakaba kuyungizyigwa a 4 pesenti. Ino mbungano yanu yakayungizyigwa amapesenti ongaye nomweelanya? Pele, kwakaba kuyaansi kumweelwe wabantu bakabbapatizyigwa kuzwa ku 10,941 mwaka wamana kusikila ku 8,930 mwaka uuno, nokuba kuti mweelwe waziiyo zya Bbaibbele zyakasololelwa wakayungizyigwa a 5 pesenti.
Sena mwakeendelezya ciiyo comwe naa ziinda aawo akati kaziiyo zya Bbaibbele zyaaŋanda izili 172,914 zyakalipootwa mwaka wamulimo wamana? Ikuti naa mwakacita oobo, sena mbomuyiisya Bbaibbele aaba bali mukuyaambele kukulyaaba akubbapatizyigwa ikutegwa balemeke Jehova bweelede? Sena ambweni muyandika kucinca mbomuyiisya ziiyo zya Bbaibbele zyaaŋanda? Ncoolwe alimwi mmukuli mupati ikuyiisya bantu ikutegwa babe babelesi ba Jehova. Tweelede kulibambila alimwi akuyiisya ziiyo zya Bbaibbele zyaaŋanda kusikila mpotugolela.—1 Tim. 4:15,16.
Imawoola akabelesyegwa mumulimo wamumuunda, nyendo zyakupilukila, mamagazini amabbuku akaabilwa zyakainda-inda kumweelwe wamwaka wamana. Nokuba boobo, imbungano zili mbozibede zyakayeezyegwa ziindi zinji kutegwa zitumine malipooti aazyo. Tulabalumbaizya kapati ibali mutubunga twabaalu tunji balo cakusyomeka ibasololela, ibabunganya alimwi akulemba akutumina malipooti aambungano zyabo kuofesi yamutabi cakufwambaana.
Kufwumbwa naa mwakatola lubazu nzi cakusyomeka nobasikumwaya alimwi abapainiya mukukambauka makani mabotu mumwaka wamulimo 2003, masimpe mwakagwasyilizya mukupa kuti lipooti ibote. Lino mbotulangila mwaka wamulimo wa 2004, toonse tobasikumwaya alimwi ambungano zyoonse tweelede kulipoota mulimo wesu lyoonse. Atuyaambele lino kumalailile ngotupedwe ‘aakugwasya bantu kuba basikwiiya,’ ikubayiisya ‘kulemeka Leza akumupa bulemu.’—Mt. 28:19; Ciy. 14:7.