Amusalale Mubukkale Bwanu Boonse
1. Ino nkaambo nzi ncociyandika kusalala mubukkale bwesu boonse?
1 Mbotuli babelesi ba Jehova Leza uusalala, tulasolekesya kusalala mubukkale bwesu boonse. (1 Pet. 1:15, 16) Eeci caamba kuti tulasolekesya kutobela zyeelelo zya Jehova mubukkale bwesu boonse. Muswaangano wacooko wamwaka uuno uyootupa coolwe cilibedelede cakutondezya bukkale busalala.
2. Ino mbuti mbotukonzya kubamba busena bwamuswaangano kuti kabusalala?
2 Busena Bwakuswaanganina Bweelede Kusalala: Kulabelekwa mulimo mupati wakubamba masena aakuswaanganina alimwi akwaasalazya kautanatalika muswaangano. Kufwumbwa zintu nzyotwaletelezya mubusena bwamuswaangano, tweelede kuzigusya kubikkilizya azipepa zyakunyamwida zyakulya zitajisi zintu alimwi amabbodela. Ikuti naa tulakonzya kuletelezya zintu eezyi eelyo nozyabikkide zintu, mmasimpe tweelede kuzigusya aleelyo notwamana kuzibelesya.
3. Ino ncinzi cipa kuti kube tombe alimwi ino mbuti mbolikonzya kusoogwa amuswaangano?
3 Kumiswaangano imwi mikwasyi balida zyakulya zyabo mubusena mucitilwa muswaangano alimwi eeci cilakondelezya kapati, pele tatweelede kusiya tombe kusikila kumamanino aapulogilamu. Bamana kulya cakulya camasyikati, aumwi mukwasyi ulijisi mukuli wakusalazya kufwumbwa tombe liliko. Amubone kuti takusyaali mabbodela aatajisi zintu, tusinsyo twamabbodela, tufwefwelenga twazyakulya, tupulasitiki twakubikkila zintu, mapepa aakucimbuzi, mapepa aakulembela twaambo alimwi notuba tupepa twapulogilamu yamuswaangano katwaalabene ansi ciindi pulogilamu yakumazuba noyatalika. Twamana kulya cakulya camasyikati, atuzibwezelele zyoonse zili afwaafwi andiswe akuzisowa. Mulakonzya kuletelezya kasaka naa kapepa oomo bamumukwasyi mobakonzya kusowela tombe kuti likasowegwe muzingungulu naa mudindi libambidwe amuswaangano. Mwalombwa kutasiya mabbodela aajisi zintu naa aatajisi zintu kaalabene, alakonzya kuleta ntenda alimwi apa kuti busena kabutalibonyi kabotu. Ikuti katujisi kaanda naa kadumba kumuswaangano, amubone kuti busena buzingulukide bulasalala. Bana balakonzya kuyiisyigwa kukukula alimwi akuyoosowa tombe kubusena bubikkidwe ibweelede kusowela tombe.
4. Ino milawo nzi mu Israyeli yakali kuyandika kutegwa bantu babe abuumi bubotu, alimwi nciiyo nzi sunu ncobakonzya kwiiya bantu ba Jehova?
4 Sena mulabona kuti zimbuzi zilasiigwa atombe cakuti inga cakatazya kuzibelesya akaambo kakutazisalazya akutabikkila maanu twamana kubelesya? Kusiya cimbuzi kacisalala notwamana kucibelesya mbumboni bumwi butondezya kuti ‘tucitila bantu boonse milimo mibotu.’ (Gal. 6:10) Mulawo wa Leza kubana Israyeli kujatikizya tubi twabantu ulisalede alimwi muuba-uba kuutobela. Bbuku lya Lukkomano Mumukwasyi lipandulula kuti: “Umwi mulawo akati kayeeyo wakali kujatikizya kusowa tubi twamuntu, twalo twakeelede kuzikkwa kulaale acilawo kutegwa abusena aakkala bantu atasofwaali.” (Amubale Deuteronomo 23:12, 13) Mulawo ooyu wakapegwa kaindi ulabeleka asunu alimwi tulakonzya kuba abuumi bubotu ikuti naa twatobela njiisyo zyamulawo ooyo. Kusyomeka kuzyeelelo zya Jehova kujatikizya kusalala lyoonse kuletela zilongezyo alimwi kulatwaandaanya kunyika eeyi.—Dt. 28:9, 10.
5, 6. Ino mbuti luyando mbolukonzya kutukulwaizya kuba balondo?
5 Luyando ndotujisi kubakwesu luyootukulwaizya kubalanganya. “Luyandisyo . . . talukwe cisapi, talulilangilili cintu.” (1 Kor. 13:4, 5) Tacipi bulemu kusiya tombe abusena mbotukkede akaambo kakuti kuli bamwi bakkede munsi lyesu. Tacipi bulemu kutacibamba kabotu cimbuzi akaambo kakuti kuli bambi baciboola kuti bacibelesye. Aboobo atutondezye luyando kuli basimukoboma.—Joh. 13:35.
6 Tulaakkomanina masena eesu aakukombela alimwi tulalumbwa akaambo kakubamba masena aaya kuti kaasalala. Toonse atuzumanane kubeleka canguzu kutegwa “tulisonzole busofwaazi boonse nibuba bwamubili nibuba bwamoyo, atulondole busalazi bwesu cakuyoowa Leza.” (2 Kor. 7:1) Amwiiye bulondo kuŋanda alimwi akuyiisya bana kutola lubazu kwiinda mukubamba ŋanda kuti kiisalala. Amube balondo ku Maanda aa Bwami eesu alimwi aleelyo notuswaangana antoomwe kumiswaangano mipati, kuswaangana kwesu akutondezye zyeelelo zisumpukide zya Leza wesu Jehova Uusalala.—Is. 60:2.
7. Ino mbuti bukkale bwesu kumuswaangano wacooko mbobumulemeka Leza?
7 Bukkale bwesu bulatwaandaanya kubantu bamwi alimwi bulamulemeka Leza wesu. (1 Pet. 2:12) Kumuswaangano, milimo ya Bakamboni ba Jehova inoolibonya antangalala. Aboobo, amube balondo kumubili, kubamba cilawo cesu kuti kacisalala alimwi akusalala mubukkale bwanu boonse.
[Kabbokesi kali apeeji 5]
Amube Abukkale Busalala
◼ Amube balondo
◼ Amubabikkile maanu bana
◼ Amubalanganye bantu