Kabbokesi Kamubuzyo

◼ Mbuti mbotukonzya kwiilanganya milimo yamumbungano?

Kweenda kwakuccililana kwazintu mumbungano yabantu ba Jehova, kulakonzyeka akaambo kakubeleka caantoomwe. (1 Kor. 14:33, 40) Amuyeeye buyo makani aalanganizyigwa mumuswaangano buyo omwe wambungano. Kunze lyapulogilamu, kuli alimwi milimo iindene-indene icitwa kaitana talika anoyamana miswaangano. Bakwesu alimwi abacizyi balalanganya milimo minji. Alimwi aimwi milimo iilanganizyigwa iitakonzyi kubonwa abamwi ayalo ilayandika. Mbuti aumwi wesu mbwakonzya kugwasya kububambe oobu?

Amulyaabe. Aabo bajisi muuya wakulisungula bayooba azintu zinji zyakucita. (Int. 110:3) Amubabikkile maano baciswa alimwi abacembeede. Amugwasyilizye mukusalazya Ŋanda ya Bwami. Tulakonzya kucita milimo minji iigwasya kakunyina kutulomba buya kucita boobo. Tuyandika kuba aluyandisyisyo lwakugwasya.

Kubeleka Cakulibombya. Bantu balibombya balakkomana kubelekela bamwi. (Lk. 9:48) Kulibombya kuyootugwasya kutatambula milimo minji njotutakonzyi kucita. Ikuyungizya waawo, kulibombya kuyootupa kutalisumpula naa kwiindilizya nguzu zyesu mpozyitakozyi kusika.—Tus. 11:2.

Amusyomeke. Musa wakakulwaizyigwa kusala “bantu basyomeka” kuba amikuli mu Israyeli yansiku. (Kul. 18:21) Ibube mbubonya oobu bulayandika asunu. Amulomye kuulanganya mulimo aumwi ngomwapegwa. (Lk. 16:10) Ikuti kamutakonzyi kuulanganya mulimo, amubone kuti mwacita bubambe bweelede bwakuti muntu umwi kalanganya mulimo ooyo nomutako.

Amubeleke camoyo omwe. Banakristo bakulwaizyigwa kubeleka camoyo woonse anomuba mumilimo yakulembwa yakumubili. (Kol. 3:22-24) Kuli kaambo kapati kakucitila boobo notubeleka kutola ambele bukombi bwakasimpe. Noliba leelyo mulimo noulibonya kuti tauyandiki kapati, mbungano ilagwasyigwa ikuti wacitwa kabotu.

Aumwi mulimo utupa coolwe cakutondezya luyando lwesu kuli Jehova alimwi akubakwesu. (Mt. 22:37-39) Cakusyomeka, atwiilanganye kufwumbwa milimo njotupegwa.