Jehova Upa Kuti Bantu Bakwe Bazwidilile
1 “Amubone! Mazuba aleza, mbwaamba Jehova, sikupanda muunda nazooenzya sikutebula, alakwe sikulyataula misaansa uyooenzya sikubyala imbuto.” (Am. 9:13) Amweezeezye kuti—butebuzi mbunji cakuti zimwi zilyo tazina tebulwa ciindi cakulima akusyanga nocisika, eelo kaka nkuzwidilila ooku!
2 Nokuba kuti Jehova ulizyi zintu zyakumubili nzyotubulide mumazubaano aakumamanino, Ijwi lyakwe lilatukulwaizya kuyandisya lukwabililo lwini-lwini akukkomana mukuyaambele kwa kumuuya. (Lk. 12:29-31; 12:16-21; Rom. 12:12) Mbwali Mwami wabu Mesiya, Jesu Kristo wapegwa zintu ziyandika kumeso aa Leza. (Is. 43:4) Mbotuyaabuzuzikizya mulimo wakukambauka “Makani Mabotu aa-Bwami” cabusungu, ‘lubono’ lwakwe lulavwula.—Mt. 24:14; Lk. 12:42-44.
3 Akati kazintu ziyandisi zyakumuuya zili anyika nzyaakapegwa Kristo zibikkilizya maofesi aamitabi, Maanda aa Bwami a Ŋanda ya Miswaangano Mipati yakamanizyigwa ino-ino kuyakwa mu Lusaka. Busena bubotu oobu bwaabilidwe kukukomba Jehova, buli mukugwasyilizya kapati kupilusya “bantu banji kubululami.”—Dan. 12:3.
4 Kumamanino aamyaka yakuma 1990 Kabunga Keendelezya kakazumizya kuti Ŋanda ya Miswaangano Mipati iyakwe mu Lusaka. Kwakayandaulwa busena bubotu bwakali kuyoopa cibaka ciyandika alimwi bwakuti bantu aabo bakali kuyoobelesya busena oobu kabacikonzya kusika. Busena bubotu bwakajanwa mu Lusaka nkoili kujwe.
5 Mbuti Ŋanda ya Miswaangano Mipati mboyakeelede kuyakwa? Babelesi Babelekela Mumasi Aambi bobile, ibaalu bacizyi kabotu kuyaka, bakasalwa kuti beendelezye mulimo abusena bwamayake. Bakabandika amakkampani aali mbwaabede aamayake pele yomwe buyo njiyakasalwa kuti iyake Ŋanda ya Miswaangano Mipati kweelana abubambe bwakazumizyigwa a Kabunga Keendelezya. Mbotuli Bakamboni ba Jehova, tulizyibide kumanizya milimo yamayake mapati aboobo nkaambo nzi ncobakabelesyela kkampani? Cintu cipati ncakuti, kubelesya makkampani mubukkale buli boobu kutupa ciindi cinji cakutola lubazu mumulimo mupati uuyandika kucitwa—wakukambuka “Makani Mabotu aa-Bwami bwa-Leza.”—Lk. 4:43.
6 Mu April 2004 mulimo abusena oobu wakatalika. Bwaanda bulampa mamita obile kuya mujulu alimwi bubalilwa ku kkilomita yomwe mubulamfwu bwakayakwa kuzinguluka busena bwamayake. Zibulo zilema makkilogilamu aali 80,000 zyakabelesyegwa kupanga makkapulosi aaciluli amisemu iitabilila ciluli kuvwumba busena bwaansi bwakasyingululwa asamende busika ku 1,600m2 butayakilidwe mumbali bwalo bujisi mabbenci aakonzya kukkalwa bantu babalilwa ku 3,000. Kumabazu otatwe aali kumbali aaŋanda yamiswaangano, nyika iisyangidwe bwizu yakanyamunwa kutegwa bali munsi batasinkilwi. Aaya mabazu ayungizya aakukkala calo cipa kuti busena boonse kabukonzya kukkalwa bantu babalilwa ku 7,000 kakunyina kwaatikizyanya. Kuli cibumbili cinyantukide naa cili atala, akazyiba kabasikubbapatizyigwa kali kumbali aancico alimwi amuncini wamajwi uulimvwisya kabotu zyalo zyipa kuti basimuswaangano kabakonzya kugwasyigwa amapulogilamu oonse aamiswaangano mipati. Muncini wamagesi uubeleka adizelo iwakabikkwa upa kuti aunka magesi, mapulogilamu kaatanyonganizyigwi.
7 Akati kazintu zyamazubaano zyakabambilwa kugwasya bantu, kwakabikkilwa maanu kapati kuti kube zimbuzi zinji alimwi abusena bwakusambila kumaanza wamana kubelesya cimbuzi. Ŋanda yakabambwa kabotu aansi, iinjizya muuwo mubotu alimwi ibikkilizya zimbuzi zyakugwejula ziinda ku 70 yakayakwa. Kaanda kamulindizi kaayakilwa kumanjililo, mugwagwa wasamende, abusena bwakusiila myootokala zyakabambilwa aantoomwe aŋanda mbotu yaapawidwe muzibeela zyone yakoonena mulangizi wabusena abalangizi beendeenda botatwe.
8 Ziindi zyakubungana aantoomwe kutegwa ‘tumvwe jwi lya Jehova’ ncilongezyo. (Dt. 4:10) Mumasi bukombi mobwakalesyedwe, lwaanguluko lwakubungana caantangalala kuti bakombe Leza ncintu ciyandika calo ncobakansinkilidwe kwamyaka minji. (w75 p. 547.) Mu Zambia, tatukkomanini buyo lwaanguluko lwakukomba pele akuyaambele kuli mukucitwa kwakubambulula maanda eesu aakukombela akuyaka aamwi mapya.
9 Nokuba kuti mubukkale bwa Leza bupya munooli kuyaambele muzintu zyakumubili zyisyomezyedwe, tugaminide buyo azilongezyo zyakumuuya nzyotulangila: Nyika mpya munooli luzyalo, lusyomo, bululami, akuliiba. Notukkomana aceeco cakazuzikizyigwa mukuyaka ŋanda eeyi yakaabilwa kucitilwa miswaangano mipati, tulangila kuyaambele kumuuya kwalo kuli kumbele katusinizyide kuti “Jehova ulapa zibotu.”—Int. 85:10-13.
Cifwanikiso icili apeeji 4]
Kuyaka bwaanda bwamunyinza
Cifwanikiso icili apeeji 4]
Zyuulu zyabasikulisungula bakagwasya, sena inga mwacita oobo?