Kabbokesi Kamubuzyo
◼ Sena “muzike musyomesi uucenjede” ulazuminizya tukamu twa Bakamboni kuswaangana kutegwa kabakazyanya naa kuvwuntauzya makani aamu Magwalo?—Mt. 24:45, 47.
Peepe, tazumizyi. Pele mumbazu zimwi zyanyika, bantu basyoonto bayanzana ambunga yesu babamba tukamu kutegwa tuvwuntauzye makani aajatikizya Bbaibbele. Ibamwi babamba kakamu kaiya magwalo aa Cihebrayo a Cigiliki kutegwa babone naa Ibbaibbele lya New World Translation lililuzi. Bamwi balavwuntauzya makani aasayaansi aajatikizya Bbaibbele. Babamba mapulogilamu aa Intaneti amaanda aakubandikila kabajisi makanze aakwaamba akukazyanya mizeezo njobajisi. Alimwi balacita miswaangano akulemba mabbuku kutondezya nzyobakajana mukuvwuntauzya alimwi akulembulula twaambo tuyiigwa kumiswaangano yesu ya Bunakristo alimwi amumabbuku eesu.
Munyika yoonse, bantu ba Jehova balapegwa malailile aakumuuya manji alimwi akukulwaizigwa nobaswaangana kumiswaangano yambungano, yabbazu ayaalubazu, alimwi ayacooko, kubikilizya amabbuku aabelesyegwa mumbunga ya Jehova. Kwiinda mukusololelwa amuuya uusalala a Jwi lyakwe lyakasimpe, Jehova watupa nzyotuyandika kutegwa toonse tobantu ba Leza tube “alukamantano lwamoyo omwe alwamiyeeyo yomwe” alimwi akuti ‘tuliyumye mumakani aalusyomo.’ (1 Kor. 1:10; Kol. 2:6, 7) Masimpe tulalumba akaambo kazintu zyakumuuya Jehova nzyatupa mumazuba aano aamamanino. Aboobo, “muzike musyomesi uucenjede” tazumizyi mabbuku aali oonse, miswaangano naa mapulogilamu aa Intaneti aatalembwi naa kweendelezyegwa kwiinda mububambe mbwabelesya.—Mt. 24:45-47.
Bantu bamwi beelede kulumbaizyigwa akaambo kakubelesya maanu aabo kutegwa batole ambele makani mabotu. Nokuba boobo, kunyina zintu zyakumubili zyeelede kulesya zintu eezyo Jesu Kristo nzyazuzikizya mumbungano yakwe yaanyika mazuba aano. Mumwaanda wamwaka wakusaanguna, mwaapostolo Paulo wakacenjezya kujatikizigwa mumakani aaminya, aamanina ciindi, aali mbuli “zyamankwangwaalizya nituba tunsiyansiya twamazyalani-zyalani, nkaambo aya makani alaleta inkazyanyo buyo, taakonzyi kuyaka lusyomo lwesu lwakusyoma Leza.” (1 Tim. 1:3-7) Banakristo bonse tabeelede kujatikizigwa mutwaambo ‘twaŋomboombo atwaambo twamazyalani aamikowa akuzwangana akuoombolozya mulao, nkaambo ezi tazikwe ancezigwasya, nzyabuyo.’—Tit. 3:9.
Kulibaabo bayanda kucita ciiyo ca Bbaibbele akuvwuntauzya akumbi, tubakulwaizya kuti balange-lange mabbuku aa Insight on the Scriptures, “All Scripture Is Inspired of God and Beneficial,” amabbuku aambi mbuli yaayo aabandika businsimi bujanika mumabbuku aamu Bbaibbele aa Daniele, Isaya alimwi a Ciyubunuzyo. Mabbuku aaya abandika makani manji aajatikizya kwiiya Bbaibbele akuzinzibala kuyeeya cakuti tulakonzya ‘kuzuzyigwa luzibo lwakuziba makanze aa [Leza] mbwaabede, akuba abusongo bunji bwakumvwisya makani aamuuya, kuti tweende munzila iielede cakubotezya Jehova muziyanza zyoonse, akuzyala micelo yamilimo mibotu yamisyobo yoonse akuya bukomena lyoonse mumakani aakuziba Leza.’—Kol. 1:9, 10.