Zyakwaambilizya

◼ Mabbuku aakumwaya mu January 2008: Ibbuku lili lyoonse lyamapeeji aali 192 naa lyakamwaigwa kautanasika mwaka wa 1991. Imbungano zitajisi mabbuku aaya inga zyamwaya bbuku lya Luzibo (ikuti kaliliko) naa broshuwa ya Amulangile Lyoonse! February: Is there a Creator Who Cares About You? naa Inzila Yakujana Lukkomano Mumukwasyi. March: Ino Ncinzi Cini Bbaibbele Ncoliyiisya? Kamubikkila maano kutegwa mutalisye ciiyo ca Bbaibbele. April: Ngazi Yamulindizi a Awake. Kuya kubikkwa bubambe bwakuswaya bantu aabo bayanda kwiiya kasimpe ibakajanika ku Ciibalusyo akumakani aalubazu pele batajaniki-janiki kumbungano. Ikaambo kapati kakubaswaila batana talika kwiiya nkakutalisya ciiyo ca Bbaibbele.

◼ Mbwaanga mwezi wa March ujisi nsondo zyosanwe, inga waba mwezi mubotu wakucita bupainiya bwakugwasilizya.

◼ Kutalikila mu February kusikila mu March 2, imakani aabuleya abalangizi babbazu ayakuba aakuti, “Ino Nkuli Nkomukonzya Kujana Lugwasyo Muziindi Zino Zikatazya?”

◼ Imbungano ziyandika kulibambila kabotu kwaakujanika ku Ciibalusyo camwaka uno ciyakucitika mu Mujibelo, mu March 22 mangolezya. Nokuba kuti makani inga atalika kufwambaana, ikwiinzya zitondezyo kulakonzya kulindila kusikila zuba lyabbila. Mulakonzya kubuzya ciindi cini nolibbila zuba kuli baabo babelekela kulubazu oolu kubusena nkomukkala. Imbungano aimwi iyandika kucita Ciibalusyo yelikke. Nokuba boobo, eeci tacikonzyeki lyoonse. Ooko mbungano zinji nkozibelesya Ŋanda ya Bwami yomwe, inga cainda kugwasya kuti imbungano yomwe naa ziinda aawo zyayandaula masena aamwi aakubelesya buzuba oobu imasiku. Naa cilakonzyeka, mulakonzya kusiilana ciindi cakwaanzyanya ndiza cisika kumaminiti aali 40 kutegwa boonse bagwasigwe wamana muswaangano wa Ciibalusyo. Alimwi ciyandika kubikkilwa maano cimwi nkukooko kubikwa myootokala alimwi awaawo abusena mpobacaalila akubwezelwa baboola ku Ciibalusyo. Kabunga kabaalu kalakonzya kusala cikonzya kubeleka mucilawo cabo.

◼ Ima Bbaibbele eesu ayandika kubikkilwa maano kapati. Ino mbuti mbotukonzya kucita oobo? Tulakonzya kucita oobo kwiinda mukupa buyo abo basikwiiya Bbaibbele bakonzya kubala alimwi ibajanika kumiswaangano. Taali aakupa buyo bantu kufwumba mbotujana mumulimo wamumuunda.

◼ Ikanji-kanji izyakwaambilizya ziyandika kapati zilabikkwa mu Mulimo Wesu wa Bwami izitondezya bubambe buyandika kutobelwa ambwaakonzya koodwa mabbuku. Nkooku kuyeekezya: Aabo boonse ibabelekela kumabbuku bayandika kupegwa Mulimo Wesu wa Bwami mbuwasikila buyo kumbungano. Bayandika kuzizyiba kabotu zyaambilizigwa kutegwa kabatobela kabotu kabotu.

◼ Mulangizi weendelezya weelede kuti kabona kuti Mulimo Wesu wa Bwami uutambulwa ulakonzya kubakkwana aabo bayandika kupegwa, akucaala amapakkopi masyoonto buyo. Ikuti naa mulaakutambula makoopi manji aa Mulimo Wesu wa Bwami, imbungano ilakonzya kucesya oda yabo kwiinda mukubelesya foomu ya Maoda Aambungano M-202. Naa ilaakutambula Mulimo Wesu wa Bwami musyoonto inga mwayungizya. Boonse basikumwaya beelede kupegwa. Aabo ibajanika lyoonse kumuswaangano wamulimo alimwi batondezya kuti bali aluyandisisyo lwakucita mulimo wamumuunda, inga bapegwa abalo. Kamusiya Mulimo Wesu wa Bwami omwe wamu laibbulali ku Ŋanda ya Bwami. Aabo bagusidwe tabayandiki kupegwa Mulimo Wesu wa Bwami. (Amubone Mulimo Wesu wa Bwami wamu February 1987.)

◼ Mbuli mbukwakaambilizigwa mu Mulimo Wesu wa Bwami wamu December, ividiyo mpya iili amutwe wakuti Pursue Goals That Honor God—aa DVD (dvpsg) nkoili lino. Eeyi vidiyo ijisi cisobano cakaliko amuswaangano wacooko cakatondezegwa mu 2005, citondezya buyumu-yumu mbobajana bakubusi kuti naa basala kuzumanana kubelekela Leza mubuumi bwabo boonse. Mucisobano Timoteo waambila mukwesu mukubusi mbwakonzya kuzumanana kubeleka mumulimo waciindi coonse nokuba kuti kuli buyumu-yumu, wakacita oobo kwiinda mukumwaambila cakamucitikila. Kuyungizya aali ceeco, bakubusi baya kwaamba mbobayungwa abazyali batali Bakamboni naa beenzinyina. Pele amubone Timoteo mbwaakagwasigwa kapati kwiinda mukumvwana amwaapostolo Paulo iwakasimide. Eeyi DVD taikabagwasyi buyo kuzumanana kuba mukasimpe bakubusi, pele iyakubagwasya akuba ambaakani yakubeleka mulimo waciindi coonse. Eeci cisobano cili buyo mu Cingisi.

◼ Kutalikila munsondo ya August 4, 2008, tunakubelesya bbuku lya Amububikkile Maanu Businsimi bwa Daniele! ku Ciiyo Cabbuku Cambungano.