Kwiiya Businsimi bwa Daniele
1 Kutalikila munsondo iitalika mu August 4, tuyootalika kwiiya bbuku lya Amububikkile Maanu Businsimi bwa Daniele! ku Ciiyo Cabbuku Cambungano. Ibanji bakalibala kale bbuku eeli likondelezya, pele lino tuyoogwasyigwa mukulibandika mukakamu. Basikumwaya boonse, aabo bajisi luyandisisyo kubikkilizya abana boonse balaangulukide, inzya, boonse bakulwaizigwa kunoojanika ansondo kuciiyo cabbuku lyamu Bbaibbele ilya Daniele.—Dt. 31:12, 13.
2 Mulongo Waziiyo Alimwi Amalailile: Mulimo Wesu wa Bwami ooyu ujisi mulongo woonse waziiyo zyabbuku lya Businsimi bwa Daniele. Amuliyobole pepa lyamulongo ooyu mubbuku lyanu. Ooyu mulongo utondezya cibalo alimwi amincali yamubbuku eeli kubikkilizya atupango twamubbuku lya Daniele twalo tuyoobandikwa muciiyo cansondo imwi aimwi. Majwi aali mubupanduluzi buyungizyidwe atondezya mbwaayelede alimwi anomweelede kwaalanga-langa makani amwi aali mubbuku eeli. Kumamanino aaciiyo cansondo aimwi, sikweendelezya ciiyo antoomwe abaabo bamukakamu kakwe beelede kulanga-langa tupango tugaminide tuzwa mubbuku lya Daniele twalo tubikkidwe amulongo wansondo eeyo. Ikuti ciindi kaciciliko, mulakonzya kubala akutubandika tupango ooto. Tupango tumwi tuyoozumanana amuciiyo cansondo iimbi nkaambo tunooyabulangwa-langwa mbuli mbotuyaabuzuzikizyigwa.
3 Amulibambile Kabotu Ciiyo: Ziiyo zyafwiinsigwa kutegwa kube ciindi cipati cakubandika makani anoolangwa-langwa ansondo. Ziiyo zyone nzifwaafwi ncobeni kwiinda zimwi. Aboobo, kumamanino aaciiyo cansondo ya September 22, sikweendelezya ciiyo ulakonzya kubikkilizya akwiinduluka lugwalo lwa Daniele 2:1-40. Munsondo ya October 13, ulakonzya kwiinduluka lugwalo lwa Daniele 3:1-30. Munsondo ya February 16, weelede kuzibandika kabotu-kabotu zifwanikiso alimwi amagwalo aali apeeji 139. Muciiyo cansondo ya April 6, kweelede kubandikwa ccaati iili amapeeji 188 a 189.
4 Amulibambile kabotu ciiyo cansondo iili yoonse akutola lubazu muciiyo. Amukukkomanine kuyanzana ambunga ya Jehova iiboneka alimwi aluzyibo ndomwajana kubikkilizya abupanduluzi bulimvwisya mbwatupa kwiinda mubananike bakwe basyomeka. (Dan. 12:3, 4) Amubakulwaizye boonse ikunoojanika lyoonse kuciiyo cabbuku. Toonse atulibikkile maanu ijwi lya Leza lyabusinsimi liyubunwidwe mubbuku lya Daniele ligambya.—Heb. 10:23-25; 2 Pet. 1:19.