Amujane Ciindi Cakugwasya Bambi Kuba Basikwiiya
1. Ino nkuli nkobakonzya kujanwa basikwiiya bapya?
1 Paulo a Banakristonyina bakasoleka kugwasya bantu kuba basikwiiya kwiinda mukukambauka kuŋanda aŋanda, mumisika alimwi anobakali mulweendo—atwaambe kuti koonse-koonse. Mbomuli similimo wa Bwami musungu uuyandisya kugwasya bantu kuba basikwiiya, sena mulakonzya kuyungizya nzyomucita mumulimo wenu wamumuunda? Sena mulakonzya kucibelesya kabotu ciindi kutegwa muyandaule baabo ibeelela alimwi akubakambaukila? Ino ninzila nzi basikumwaya iba makani mabotu nzyobabelesya kujana basikwiiya?
2. Ino ncakuluula nzi ncomukonzya kwaamba ikutondezya mbocigwasya kubikkila maano kunzila ziindene-indene zyakukambauka?
2 Banji balazwidilila akaambo kakutobela malailile aakukambaukila bantu kufwumbwa nkobabede. Basikumwaya bamwi balakambauka kumasena nkobabelekela. Royd, walo iwakali kubeleka mumigodi wakali kubelesya ciindi cakulyookezya masikati kubuzya basimilimonyina nzyobayeeya kujatikizya magwalo aaindene-indene. Wakali kubabuzya mibuzyo mbuli yeeyi yakuti:“Ino muyeeya kuti ‘mwala’ waambwa kuli Matayo 16:18 nguni?” Naa “Ino ‘bbwe lilebya’ ililembedwe kulugwalo lwa Ba-Roma 9:32 nguni?” Babelesi bamumugoti banji bakali kubungana kutegwa bamvwe bupanduluzi bwamu Magwalo. Akaambo kamibandi eeyi yamukwiizya, basimilimonyina Royd banji bakayaambele kumuuya, bakalyaaba alimwi akubbapatizigwa. Aboobo, ikucita boobu kwakapa kuti acikonzye kukambauka makani mabotu.
3. Ino ninzila nzi bunji bwaziindi iizwidilila mukutalisya ziiyo zya Bbaibbele zyaaŋanda?
3 Bamwi basikwaambilizya Bwami bajana kuti, kusaanguna kwaamba bubambe bwaciiyo ca Bbaibbele kupa kuti bacikonzye kutalisya ziiyo zya Bbaibbele. Imafwumofwumo amwi basikumwaya bamumbungano iijisi basikumwaya bali 105 bakasola canguzu kwaamba bubambe bwaciiyo ca Bbaibbele kuli aumwi mukamwiniŋanda ngobakajana. Basikumwaya bali 86 bakatola lubazu mumulimo wamumuunda, alimwi nokwakainda mawoola obile kabali mumulimo wakukambauka, bakajana kuti ziiyo zya Bbaibbele zipya izili 15 zyakatalisyigwa.
4. Ino malailile nzi aayandika ngaakapa Jesu ngotweelede kubikkila maano lyoonse, alimwi ino ncinzi ncotweelede kukanza kucita kutegwa tuzuzikizye makanze aayo?
4 Amuzumanane Kuyandaula Beelede: Mbomuli basikwaambilizya Bwami, inga mwayanda kusola nzila zyaambwa mucibalo eeci. Masimpe, inga cabota kubikkila maano kuzilengwa zyakubusena nkomuzwa ciindi nomuyeeya nzila zyabukambausi. Icipati ncakuti, tweelede kubikkila maano lyoonse kumalailile aa Jesu aakuti tuyandaule beelede alimwi akubagwasya kuba basikwiiya.—Matayo 10:11; 28:19.