Mulimo Uukkomanisya Kapati
1. Mulimo nzi wakusilika kumuuya uucitwa mazuba aano?
1 Mumwaanda wamyaka wakusaanguna, aabo bakabona bantu bakali kusilikwa malwazi bakakkomana kapati. (Lk. 5:24-26) Mazuba aano, tulikkomene kubeleka mulimo wakusilika bantu kumuuya. (Ciy. 22:1, 2, 17) Eelo kaka cilakkomanisya ikubala zyakuluula zyaamba mbuli mbolyakabacinca bantu bamwi Jwi lya Jehova amuuya uusalala! Pele cikkomanisya kapati nkutola lubazu mumulimo ooyu kwiinda mukweendelezya ciiyo ca Bbaibbele cicita kabotu kumuuya.
2. Ncinzi cikonzya kutukkomanisya notuyiisya muntu umwi kasimpe?
2 Ino Leza nguni zyina lyakwe? Ino nkaambo nzi ncalekelede kuti katupenga? Ino ncinzi Bwami bwa Leza ncobuyoocitila bantu? Citukkomanisya kapati takuli kwiingula buyo mibuzyo eeyi pele nkubona sikwiiya Bbaibbele mbwakkomana akaambo kakuzyiba kasimpe. (Tus. 15:23; Lk. 24:32) Mbwayaabuya ambele mukwiiya, sikwiiya Bbaibbele ulakonzya kutalika kubelesya zyina lya Jehova, kucinca akutalika kusama kabotu akulibamba, kucileka micito mibi akutalika kukambaukila bamwi. Ikuti walyaaba akubbapatizyigwa, ulaba mukwesu alimwi mubelesima. Ntaamu imwi aimwi njabweza yeelede kutukkomanisya.—1 Te. 2:19, 20.
3. Nintaamu nzi nzyotweelede kubweza kutegwa tutalisye ciiyo ca Bbaibbele?
3 Sena Inga Mwatola Lubazu? Ikuti naa mulayanda kutola lubazu mumulimo ooyu uukkomanisya kapati, amumulombe Jehova kutegwa amugwasye kweendelezya ciiyo ca Bbaibbele, alimwi amucite kweelana amipailo yanu. (1 Jo. 5:14) Kamukambaukila nkobakonzya kujanika bantu alimwi aaciindi nobajanika. Amutalisye ciiyo ca Bbaibbele kufwumbwa ciindi nocikonzyeka. (Muk. 11:6) Kuti naa mwajana bantu balaaluyandisisyo mpoonya mwasyanga mbuto yakasimpe, mweelede kupilukila kuti mukatilile.—1 Ko. 3:6-9.
4. Ino nkaambo nzi ncotweelede kubikkila maano kweendelezya ziiyo zya Bbaibbele?
4 Kuli bantu banji bafwide nzala anyota yabululami. Ino nguni uuyoobagwasya kukkutila kumuuya kwiinda mukuba aciiyo ca Bbaibbele ambabo? (Mt. 5:3, 6) Atulisungule camoyo woonse kuti tumanizye mulimo wakukambauka akugwasya bamwi kuba basikwiiya, mulimo ooyu wakutebula noutanamana.—Is. 6:8.