Sena ‘Balisimpide Miyanda’ Alimwi “Akukkalikila Mulusyomo”?
Nkaambo nzi zisyango zinji ncozijisi miyanda? Miyanda ipa kuti cisyango kaciimvwi. Ilakwela maanzi alimwi abusani kuzwa mubulongo. Miyanda imwi ilasyuuka tusyuukila twalo itukomena akuba tusyango. Sena bantu mbotwiiya limwi Bbaibbele inga twabakozyanisya kuzisyango? Inzya! Tulabeleka katuli babelesinyina a Leza mumulimo wakusyanga mbuto zya Bwami alimwi akuzitilila. Jehova ulacita lubazu lwakwe kwiinda ‘mukuzikomezya.’—1 Ko. 3:6.
Mbubwenya mbuli cisyango iciyaabukomena mbociyandika miyanda iitomene, cilayandika kapati kulibaabo bacili bapya kuba antalisyo mbotu mukasimpe. Bayandika ‘miyanda’ alimwi iyandika kuti ‘kaisimpide’ muli Kristo “akukkalikila mulusyomo” kutegwa baazunde masunko aakonzya kubasikila. (Kol. 2:6, 7; 2 Ti. 3:12; 1 Pe. 5:8, 9) Kuyungizya waawo, kutegwa babayiisye kabotu bamwi, beelede kuti kabajisi “luzyibo lwini-lwini lwakasimpe.” (1 Ti. 2:4) Nokuba kuti bbuku lya Bbaibbele Ncoliyiisya lilagwasya kapati basikwiiya kuzyiba njiisyo zyantalisyo zyamu Bbaibbele, pele bbuku lya Luyando lwa Leza lilabagwasya kumvwisya milawo ya Leza alimwi anjiisyo zyakwe. Ibbuku eeli lyakabambilwa kutugwasya kuba amibandi yakutainda mumbali abasikwiiya Bbaibbele bayaambele kujatikizya makani aansamino akulibamba, kusalala kumubili, zyakulikondelezya, alimwi abalongwe babo.—lv pp. 50-73.
Basikwiiya Bbaibbele bamwi balafwambaana kuyaambele alimwi akubbapatizyigwa mbobamanina buyo kwiiya bbuku lya Bbaibbele Ncoliyiisya. Sena tweelede kuleka kugwasya basikwiiya Bbaibbele aaba ibayaabukomena? Peepe. Amuzumanane kwiiya asikwiiya Bbaibbele uuyaambele kusikila mane akamanizye kwaaiya mabbuku aaya obilo—Ino Ncinzi Cini Bbaibbele Ncoliyiisya? alimwi alyakuti ‘Amuliyobole Muluyando lwa Leza.’—Amubone Kabbokesi Kamubuzyo kali mu Mulimo Wesu wa Bwami wa November 2011, alimwi a March 2009, apeeji 2.
Miyanda yacisyango tailibonyi, pele ilayandika kapati kucisyango nkaambo ipa kuti cisyango kaciimvwi alimwi akucipa busani. Mbubwenya buyo, icikozyanyo ca Kristo alimwi akuyiisya kwakwe zilasimpwa mumizeezo alimwi amumyoyo yabantu balaaluyandisisyo nokuba kuti tazilibonyi kumatalikilo. Mpoonya asyoonto-syoonto zibapa busani bubotu akubayumya. Nobazumizya njiisyo eezyi kweendelezya kuyeeya kwabo, micito yabo alimwi azyintu nzyobasala, balakulwaizyigwa kwaaba buumi bwabo kuli Jehova alimwi akuzumanana munzila yakasimpe. Eeci cituletela lukkomano lwini-lwini.—1 Pe. 2:21; 3 Jo. 4.