“Tatulengaani Pe”

4:16-18

Amweezyeezye mikwasyi yobilo iikkala aŋanda yomwe, mpoonya ŋanda eeyo njakaindi alimwi tiilibonyi kabotu. Akaambo kaceeci, mukwasyi umwi ulityompedwe kapati. Pele cigambya ncakuti, mukwasyi uumbi ooyu ulikkomene. Nkaambo nzi? Akaambo kakuti mukwasyi ooyu wabili uyoolongela kuŋanda mpya alimwi mbotu kapati.

Nokuba kuti “zilenge zyoonse zilatongela lyoonse alimwi zilaamacise caantoomwe kusikila lino,” babelesi ba Leza balijisi bulangizi ibubayumya. (Rom. 8:22) Tulizyi kuti mapenzi ngotujisi lino, naaba yaayo aali kutupenzya kwamyaka minji, “ngakaindi buyo kaniini alimwi mauba-uba,” tweezyanisya abuumi butamani mbotuyoopona munyika mpya ya Leza. Kubikkila maano kuzilongezyo zya Bwami zyakumbele kuyootugwasya kuba alukkomano alimwi akutatyompwa.