“Amusowe Baleza Boonse Bakubeja”

Jakobo wakalizyi kuti Jehova nguweelede buyo kukombwa alikke, nokuba kuti tanaakaningabikka mulawo uukasya kukomba mituni. (Kul. 20:3-5) Aboobo ciindi Jehova naakamwaambila kuti ajokele ku Beteli, Jakobo wakaambila bantu boonse mbaakali limwi kuti baisowe mituni yabo. Mpoonya Jakobo wakaisowa mituni, kubikkilizya amasikkiyo aakumatwi, alo aalangilwa kuti akali kusamwa kutegwa kaabapa coolwe naa kubakwabilila. (Matl. 35:1-4) Cakutadooneka, Jehova wakakkomana akaambo kancaakacita Jakobo.

Mazuba aano, ino mbuti mbotukonzya kukomba buyo Jehova alikke? Cintu cimwi ciyandika kapati ncotweelede kucita nkweeleba micito iili yoonse iiswaangene amituni naa mizimo. Eeci inga cabikkilizya akusowa cintu cili coonse cijatikizya mizimo alimwi akulanga-langa zyakulikondelezya zyesu. Mucikozyanyo, amulibuzye kuti: ‘Sena ndilaakkomanina mabbuku naa mafilimu aajatikizya zintu mbuli zyeelo naa masalamuzi? Sena kuli cakulikondelezya cimwi ncondikkomanina icitondezya kuti masalamuzi, ziposo naa kusinganya nzintu buyo zili kabotu izyakulikkomanisya? Tweelede kuzitantamuka zintu zyoonse nzyasulide Jehova.—Int. 97:10.

AMWEEBELELE KAVIDIYO KAKUTI “AMUMUKAZYE DIABOLOSI,” MPOONYA MWIINGULE MIBUZYO IITOBELA:

• 

  Ino ndipenzi nzi ndyaakajana mubuumi bwakwe sikwiiya Bbaibbele uutegwa Palesa?

• 

  Nkaambo nzi ncocili cabusongo kulomba lugwasyo lwabaalu mumakani aajatikizya mizimo?

• 

  Ikuti katuyanda kuti Jehova atukwabilile, ino nzintu nzi nzyotweelede kusowa?

• Ino nintaamu nzi njobakabweza ba Palesa?

• Kubusena nkomukkala, ino ninzila nzi zimwi nzyomukonzya kutobela kutegwa mutayungwi amadaimona?