Amube Alusyomo Lwakuti Muyookwabililwa Bweende Bwazintu Oobu Nobuyoomana

Ino-ino kukkazika moyo kwa Jehova kujatikizya nyika eeyi kuyoomana. Bukombi bwakubeja buyoonyonyoonwa, nkamu yazisi iyoobukila bantu ba Leza, kumane Jehova uyoobanyonyoona bantu babi lya Amagedoni. Banakristo balangila ciindi noziyoocitika zintu eezyi ziyandika kapati alimwi zikkomanisya.

Mubwini, tatutuzyi twaambo toonse tujatikizyidwe kujatikizya mapenzi mapati. Mucikozyanyo, tatucizyi ciindi cigaminide nayootalika. Alimwi tatuzyi twaambo ntobayoopa beendelezi bamfwulumende ncobayoobulwana bukombi. Kuyungizya waawo, tatuzyi bulamfwu bwaciindi bantu ba Leza ncobayoolwanwa azisi naa zintu zinoojatikizyidwe. Kunze lyaboobo, tatuzyi cini Jehova ncayoobelesya kunyonyoona basizibi lya Amagedoni.

Nokuba boobo, Magwalo alatwaambila makani oonse ngotuyandika kutegwa tube alusyomo alimwi abusicamba kujatikizya zintu ziyoocitika kumbele. Mucikozyanyo, tulizyi kuti tupona kumamanino ‘aamazuba aamamanino.’ (2Tim. 3:1) Kuyungizya waawo, tulizyi kuti mazuba aakulwanwa kwabukombi “ayoofwiinsyigwa” kutegwa bukombi bwakasimpe butakanyonyoonwi. (Mt. 24:22) Kunze lyaboobo, tulizyi kuti Jehova uyoobafwutula bantu bakwe. (2Pet. 2:9) Alimwi tulizyi kuti Ooyo Jehova ngwasalide kunyonyoona basizibi, akufwutula bankamu mpati lya Amagedoni mululami alimwi ngusinguzu.—Ciy. 19:11, 15, 16.

“Bantu bayoonetuka akaambo kakuyoowa” zintu ziyoocitika kumbele. Nokuba boobo, kwiinda mukubala alimwi akuzinzibala kuyeeya Jehova mbwaakafwutula bantu bakwe kaindi, alimwi azintu nzyaayubununa kujatikizya kumbele, tulakonzya ‘kwiimikila akulanga mujulu,’ katujisi lusyomo lwakuti lufwutuko lwesu luli afwaafwi.—Lk. 21:26, 28.