Sena Mulizyi?

Mumwaanda wamyaka wakusaanguna, ino bapaizi atempele bakali kubusowa buti bulowa bwabanyama ibakali kutuulwa?

MWAKA AMWAKA, bapaizi bamu Israyeli yansiku bakali kutuula banyama banji acipaililo icakali mutempele. Sikwiiya zyakaindi mu Juda wazina lya Josephus wakalemba kuti mwaka amwaka lya Pobwe Lyakwiindilila, kwakali kutuulwa bana bambelele bainda ku 250,000 calo icakali kupa kuti kakuli bulowa bunji bwalo ibwakeelede kusoogwa. (Lev. 1:​10, 11; My. 28:​16, 19) Aboobo ino bulowa oobo bwakali kusoogwa buti?

Basikuvwukkula zyakaindi bakajana mugelo mupati iwakali kwiinda atempele ilyakaliko mumazuba aa Jesu alimwi iwakali kubelesyegwa kusikila tempele nolyakanyonyoonwa mu 70 C.E. Kweelede kuti mugelo ooyu wakali kubelesyegwa kusowa bulowa ibwakali kuzwa mutempele.

Amubone zintu zyobilo izyakali kupa kuti cipaililo kacisalala:

• Zipulo kunsi aacipaililo: Bbuku limwi lyakaindi ilyaamba milawo alimwi atunsiyansiya twaba Juda lyalo ilyakalembwa nowakainda mwaka wa 200, lyaamba kuti kwakali zipulo zyobilo kukkona limwi lyacipaililo. Aboobo bulowa bwazipaizyo alimwi ameenda aakali kubelesyegwa kusalazya cipaililo akali kwiinda muzipulo eezyo amumigelo kuunka ku Kkuti lya Kidroni. Bbuku limwi ilyaamba makani aakaindi aaba Juda lyamazuba aano, alyalo lilaamba kujatikizya migelo njobakajana basikuvwukkula zyakaindi. Kweelana anzyobakajana, basikuvwukkula zyakaindi balazumina kuti zipulo eezyo amigelo ambweni nzizyakali kubelesyegwa kusowa bulowa.

• Meenda manji: Bapaizi bakali kuyandika meenda manji kutegwa cipaililo mpocili aansi alimwi amugelo kazisalala. Aboobo meenda ngobakali kuyandika bapaizi bakali kwaajana mumunzi wa Jerusalemu. Kwakali kubelesyegwa tugelo alimwi anzila zimwi kutola meenda kutempele. Kumane mazyiba alimwi amigoti zyakali kubelesyegwa kuyobweda meenda. Sikuvwukkula zyakaindi wazina lya Joseph Patrich wakaamba kuti kulibonya kuti aciindi eeco, kwakanyina tempele ilyakali mbuli leeli ilyakajisi nzila mbotu yakupa kuti kakuli meenda mutempele alimwi akusowa meenda aali aadooti.