Bakaalumba Magwalo Aabo
Ba Brooke Mbaakamboni ba Jehova ibakkala ku United States. Lyabulwazi bwa COVID-19, bakali kukambauka kwiinda mukulemba magwalo. Bakali kulemba magwalo manji nsondo ansondo. Nokuba boobo, nokwakainda mwaka omwe acisela, bakatyompwa. Kusikila leelyo, omwe buyo muntu nguwakaingula, alimwi wakabaambila kuti batakamulembeli kabili. Ba Brooke bakayeeya kuti bakali kusowa buyo ciindi.
Pele mukuya kwaciindi ba Kim, Bakamboninyina ibabeleka kubbanki, bakaambila ba Brooke kujatikizya mubandi ngobakajisi amuntu wakaboolede kubbanki. Muntu ooyu wakabaambila kuti kuli lugwalo lwakalembwa amaanza ndwaakatambula kuli umwi wa Bakamboni ba Jehova. Nokwakainda ciindi, kwakajanika kuti wakali kwaamba magwalo ngobakalemba ba Brooke! Nsondo yakatobela, muntu ooyo wakaboola alimwi kubbanki. Ciindi naakali kubandika aba Kim, wakabuzya ikuti naa inga wajanika kumiswaangano yambungano, yalo aciindi eeci iyakali kucitilwa a Zoom.
Nokwakainda buyo ciindi cisyoonto, ba David, Bakamboni bamwi, bakaambila ba Brooke kujatikizya baalumi mbobakali kubeleka limwi, ibakatambula lugwalo kuzwa kuli ba Brooke. Baalumi aaba bakakkomana kapati akaambo kakuti lugwalo lwakalembwa amaanza. Bakaamba kuti: “Inga cabota kuti bantu banji kabababikkila maano bantu bamwi munzila iili boobu.” Ba David bakabelesya coolwe eeci kubaambila zinji zyamu Bbaibbele akubasyomezya kunoobatolela zyakumwaya. Eeci cakabakkomanisya kapati.
Bakamboni ba Jehova balizyi kuti talili lyoonse nobakonzya kuzyiba ciindi noyamena mbuto njobakasyanga mubukambausi. (Mukambausi 11:5, 6) Nokuba boobo, cakabacitikila ba Brooke cakabapa kutatyompwa kucita lubazu lwabo mumulimo wa Bunakristo.—1 Bakorinto 3:6.