Nguni Wakatalisya Mbunga ya Bakamboni ba Jehova?

Mbunga yamazuba aano ya Bakamboni ba Jehova yakatalika kumamanino aamyaka yamuma 1800. Aciindi eeco, kabunga kasyoonto kabasikwiiya Bbaibbele bakali kukkala afwaafwi a Pittsburgh, Pennsylvania, ku United States, bakatalika kuvwuntauzya Bbaibbele cakusitikila. Bakeezyanisya njiisyo zyakali kuyiisyigwa muzikombelo acini ncoliyiisya Bbaibbele. Nzyobakayiya bakatalika kuzilemba mumabbuku, mumiteende, alimwi amumagazini lino iitwa kuti Ngazi Yamulindizi—Yaambilizya Bwami bwa Jehova.

Akati kabasikwiiya Bbaibbele aabo basungu, kwakali mwaalumi wakali kwiitwa kuti Charles Taze Russell. Nokuba kuti Russell nguwakali kweendelezya mulimo wakuyiisya Bbaibbele aciindi eeco alimwi nguwakali wakusaanguna kulemba Ngazi Yamulindizi, taakatalisya mbunga mpya. Makanze ngaakajisi Russell a Basikwiiya Bbaibbele bamwi, kweelana ambokakali kwiitwa kabunga aaka aciindi eeco, akali akusumpula njiisyo zya Jesu Kristo alimwi akutobela micito ya mbungano ya Banakristo bamumwaanda wamyaka wakusaanguna. Mbwaanga Jesu nguwakatalisya Bunakristo, tumubona kuti nguwakatalisya mbunga yesu.—Bakolose 1:18-20.