Sena Bakamboni ba Jehova Balapa Cakkumi?

Peepe, Bakamboni ba Jehova tabapi cakkumi; mulimo wesu ulagwasyilizyigwa akusanga kwakuliyandila. Ino cakkumi ncinzi, alimwi nkaambo nzi Bakamboni ba Jehova ncobatapedi cakkumi?

Mulawo wakupa cakkumi, naa kusanga cintu comwe azintu zili kkumi nzyajisi muntu, wakali cibeela ca Mulawo wakapedwe bana Israyeli bansiku. Nokuba boobo, Bbaibbele lilasalazya kuti Mulawo ooyu​—kubikkilizya amulawo ‘wakubweza cakkumi’​—taubeleki ku Banakristo.​—Bahebulayo 7:​5, 18; Bakolose 2:​13, 14.

Muciindi cakupa cakkumi alimwi azipaizyo ziyandika, Bakamboni ba Jehova baiya Banakristo bakusaanguna kwiinda mukugwasyilizya mulimo wabo munzila zyobilo: kukambauka akuyiisya kakunyina kubbadelwa, alimwi akusanga kwakuliyandila.

Aboobo, tutobela busolozi bwamu Bbaibbele bupedwe ku Banakristo bwakuti: “Umwi aumwi acite mbuli mbwaasala mumoyo wakwe, ikutali kupa kumoyo kakusiide naa cakusinikizyigwa, nkaambo Leza uyanda muntu uupa kumwi kakkomene.”​—2 Bakolinto 9:7.