Nzila Yakusaanguna: Zyintu Ziyandika Kapati
‘Amusale zyintu ziinda kubota.’—Ba-Filipi 1:10.
Ncocaamba eeci. Muciindi cakubikkila buyo maano kuzyintu nzyobayanda balo, mulimo, beenzinyina alimwi abasazinyina, banabukwetene ibazwidilila mulukwatano lwabo babikkila kapati maano kuzyintu nzyayandika ngobakwetene limwi. Mulumi amukaintu balajana ciindi cinji cakuba aantoomwe, alimwi acakuba abana babo. Boonse bobile balilibambilide kuliimya zyintu zimwi kutegwa balanganye kabotu mukwasyi wabo.—Ba-Filipi 2:4.
Ino nkaambo nzi ncociyandika eeci? Ibbaibbele litondezya kuti mukwasyi ulayandika kapati. Nkakaambo kaako imwaapostolo Paulo wakalemba kuti muntu uutabapi nzyobayandika bamumukwasyi wakwe “ulaindilila akuliyooyo uutazumina.” (1 Timoteo 5:8) Nokuba boobo, mukuya kwaciindi, zyintu muntu nzyabikkila kapati maano zilakonzya kucinca. Mucikozyanyo, mwaalumi umwi, syaazibwene mukulaya banabukwetene, wakajana kuti bunji bwabantu ibakajanika kumuswaangano ngwaakeendelezya bakali kubikkila kapati maano kumilimo yabo kwiinda mikwasyi. Wakaamba kuti bakali kuyeeya kuti balaiya nzila mbobakonzya kumanizya mapenzi aamumukwasyi cakufwambaana kutegwa bakonzye kubikkila maano kumilimo yabo. Ino nciiyo nzi ncotwiiya? Ncuuba-uba kwaamba kuti tulaubikkila maano mukwasyi, pele cilakatazya kucitondezya eeci muzyintu nzyotucita.
Amusole nzila eeyi. Kwiinda mukubelesya mibuzyo eeyi iitobela, amulilingule kutegwa mubone ncomubikkila kapati maano.
◼ Ikuti ngotukwetene limwi naa imwanaangu kayanda kubandika andime, sena ndilafwambaana kumupa ciindi?
◼ Ciindi nondaambaula abantu kujatikizya zyintu nzyondicita, sena bunji bwaziindi ndaamba zyintu nzyotucita amukwasyi wangu?
◼ Sena ndilakaka kupegwa mikuli aimwi (kumilimo naa kumwi buyo) kutegwa ndijane ciindi cakuba amukwasyi wangu?
Ikuti naa mwavwiila kuti inzya kumibuzyo iili atala, mulakonzya kuyeeya kuti mulaubikkila kapati maano mukwasyi wenu. Pele ino ngomukwetene limwi alimwi abana benu balo baamba buti kujatikizya zyintu nzyomucita? Ikuyeeya kuti tulazibikkila maano zyintu ziyandika kapati takwaambi kuti masimpe mbotucita oobu. Alimwi njiisyo eeyi ilabeleka amunzila zimbi zitiibandikwe mumapeeji aatobela.
Amusale cakucita. Amuyeeye nzila zyobile mbomukonzya kutondezya kuti mulaubikkila kapati maano mukwasyi wenu. (Mucikozyanyo: Amuyeeye mbomukonzya kucesya zyakucita kutegwa kamujana ciindi cakuba angomukwetene limwi alimwi abana benu.)
Mulakonzya kwaambila mukwasyi wenu zyintu nzyomwasala kucita. Ikuti omwe mumukwasyi wazumina kucinca, abalo bamwi balakonzya kucita mbubwenya.
[Cifwanikiso icili apeeji 3]
Muzyali uuzwidilila ulamubikkila kapati maano ngobakwetene limwi alimwi abana bakwe