Nzila Yatatu: Kubelekela Antoomwe

“Bantu bobile mbabotu kwiinda omwe . . . Na umwi wawa, mweenzinyina ulamubusya.”—Mukambausi 4:9, 10.

Ncocaamba eeci. Banabukwetene ibazwidilila mulukwatano lwabo balabulemeka bubambe bwa Jehova bwabusilutwe ibulembedwe mu Bbaibbele. (Ba-Efeso 5:22-24) Nokuba boobo, mulumi amukaintu babona lukwatano lwabo kuti ndulwabo boonse kutali kuti ndwamuntu buyo omwe. Ikuti banabukwetene kababelekela antoomwe, tabaciti zyintu mbuli bantu batakwete naa batakwetwe. Baba “nyama yomwe”—majwi aazwa mu Bbaibbele aatondezya kuti banabukwetene tabeelede kulekana alimwi beelede kuti kabamvwana kapati.—Matalikilo 2:24.

Ino nkaambo nzi ncociyandika eeci? Ikuti nywebo angomukwetene limwi kamutabelekeli antoomwe, tuntu tusyoonto tulakonzya kuleta manyongwe mulukwatano lwenu cakunga aumwi wenu inga watalika kulwana mweenzinyina muciindi cakulwana penzi. Kulubazu lumwi, ikuti nywebo angomukwetene limwi kamubelekela antoomwe mulakonzya kuba mbuli basikweenzya ndeke bobile ibabelekela antoomwe kweenzya ndeke yomwe, kutali basikweenzya ndeke bobile ibali mundeke ziindene alimwi iziyanda kupwayana. Ikuti mwaimpana, amujane nzila zigwasya zyakumana penzi muciindi cakugama kutamikizyanya.

Amusole nzila eeyi. Kwiinda mukubelesya mibuzyo eeyi iitobela, amulilingule kutegwa mubone naa mubelekela antoomwe.

◼ Sena ndilimvwa kuti mali ngondivwola “ngaangu ndelikke” nkaambo ndime ndaabelekela?

◼ Sena ndilabatantamuka basazinyina ngotukwetene limwi nokuba kuti walo ulamvwana ambabo?

◼ Sena ndikonzya buyo kulikkomanisya ciindi nonditali angotukwetene limwi?

Amusale cakucita. Amuyeeye nzila yomwe naa zyobile mbomukonzya kutondezya kuti muyanda kubelekela antoomwe angomukwetene limwi.

Mulakonzya kumubuzya ngomukwetene limwi kuti aambe mbwayeeya.

[Cifwanikiso icili apeeji 5]

Kubelekela antoomwe caamba kuba mbuli basikweenzya ndeke bobile ibabelekela antoomwe kweenzya ndeke yomwe