Mbwabede Leza

Ino Leza Ujisi Mubili Uuli Buti?

“Leza Muuya”—Johane 4:24.

NCOLYAAMBA BBAIBBELE Bbaibbele lyaamba Leza kuti muuya. (2 Bakolinto 3:17)

Akaambo kabube oobu, ulisumpukide kapati kwiinda ndiswe alimwi kwiinda mizeezo yesu yoonse. Lugwalo lwa 1 Timoteyo 1:17, lwaamba kuti Leza “Mwami walyoonse alyoonse, uutalibonyi.” Bbaibbele alimwi lyaamba kuti: “Kunyina muntu wakamubona kale Leza.”—1 Johane 4:12.

Mulengi wesu ulisumpukide kapati cakunga tatukonzyi kuyeeyela mbwalibonya. Lugwalo lwa Isaya 40:18 lwaamba kuti: “Lino Leza mulamukozyanya ani? Mulamweelanya acikozyanonzi?” Nobuba bubumbo bupati bwajulu bulibonya tabukonzyi kweelanisyigwa a Singuzuzyoonse.—Isaya 40:22, 26.

Nokuba boobo, kuli zilenge zikonzya kumubona Leza, nokuba kwaambaula anguwe mulomo mpande. Munzila nzi? Nkaambo azyalo myuuya, alimwi zikkala kujulu. (1 Bami 22:21; Bahebulayo 1:7) Kujatikizya zilenge eezyi zyamuuya, zyalo ziitwa kuti bangelo, Jesu Kristo wakaamba kuti: “Balabubona busyu bwa Taata uuli kujulu.”—Matayo 18:10.

Sena ulajanika koonse-koonse?

“Mboobu mbomweelede kupaila: ‘Taateesu ooli kujulu.’”—Matayo 6:9.

NCOLYAAMBA BBAIBBELE

Bbaibbele kunyina nolyaamba kuti Leza ulajanika aali woonse kufwumbwa ciindi. Mukwiimpana, mbubwenya mbuli majwi aa Jesu aali mulugwalo lwa Matayo 6:9 alimwi a 18:10 mbwaatondezya, Leza muntu—ngu “Taata”—alimwi ukkala kujulu, ‘kumakkalilo aakwe aakujulu.’—1 Bami 8:43.

Kumamanino aabuumi bwakwe, Jesu wakaamba kuti: “Lino ndilaisiya nyika akuunka kuli Taata.” (Johane 16:28) Kristo naakafwa wakajisi mubuli wanyama, mpoonya wakabusyigwa kali cilenge camuuya akuunka “kujulu kwini buya, kutegwa lino akalibonye kumbele lya Leza.”—Bahebulayo 9:24.

Twaambo ootu tujatikizya Leza tulayandika kapati. Nkaambo nzi? Kaambo kamwi nkakuti, Leza muntu, aboobo tulakonzya kwiiya kujatikizya nguwe alimwi akuba acilongwe anguwe. (Jakobo 4:8) Ikambi nkakuti, kuzyiba kasimpe kujatikizya Leza kulatukwabilila kubukombi bwakubeja, mbuli kukomba zibumbwa. Lugwalo lwa 1 Johane 5:21 lwaamba kuti: “Nobana bangu bayandwa, amwiitantamuke mituni.”

Mbuti Bantu Mbobakalengwa Mucinkonzya ca Leza?

“Leza wakalenga muntu mucinkozya cakwe. Wakamulenga mucinkozya ca-Leza. Wakabalenga baalumi abanakazi.”—Matalikilo 1:27.

NCOLYAAMBA BBAIBBELE

Mbotuli bantu, tulakonzya kubutondezya bube bwa Leza, mbuli luyando, bululami, alimwi abusongo. Bbaibbele lyaamba kuti: “Amwiiye Leza, mbomuli bana bayandwa, alimwi kamuzumanana kweenda muluyando.”—Baefeso 5:1, 2.

Leza wakatulenga katujisi nguzu zyakulisalila zyakucita, zyalo zitupa kucikonzya kusala cibi acibotu alimwi akutondezya luyando kuli bamwi munzila ziindene-indene. (1 Bakolinto 13:4-7) Alimwi tulacikonzya kupanga zyintu, alimwi akweebela bubotu bwanyika. Kwiinda zyoonse, twakatambula bube bwakumuuya, luyandisisyo lwakwiiya kujatikizya Mulengi alimwi amakanze ngajisi kujatikizya ndiswe.—Matayo 5:3.

Mbokakonzya kumugwasya kasimpe kamu Bbaibbele. Mbotuyaabuzumanana kwiiya kujatikizya Leza, tuyoopona kweelana ambwayanda. Akaambo kaceeci, tuyooba aalukkomano mubuumi, kukkutila kwini-kwini, alimwi aluumuno. (Isaya 48:17, 18) Inzya, Leza ulizyi kuti bube bwakwe bukkomanisya bulabasika amoyo bantu, ulakwela babombe myoyo alimwi akubasololela kunzila iitola kubuumi butamani.—Johane 6:44; 17:3.