KUBUZYA-BUZYA | HANS KRISTIAN KOTLAR
Syaazibwene Mukwiiya Maseelo Mbwaabeleka Ulapandulula Mbwaakatalika Kusyoma Muli Leza
Ba Dr. Hans Kristian Kotlar bakacita mulimo wabo wakusaanguna mukuvwuntauzya makani aasayaansi kucibbadela ca Norwegian Radium mu 1978, kwalo nkobakaiya kujatikizya bulwazi bwakkansa alimwi abukwabilizi bwamubili. Aciindi eeco, bakaba aaluyandisisyo mumakani aajatikizya matalikilo aabuumi. Balembi ba Sinsimuka! bakababuzya kujatikizya mulimo wabo wabusyaazibwene mumaseelo alimwi alusyomo lwabo.
Ncinzi cakamupa kuba aaluyandisisyo mumakani aajatikizya matalikilo alimwi ampindu yabuumi?
Bataata bakali ba Katolika, mpoonya bamaama tiibakali kunjila cikombelo cili coonse. Icaamba kuti bukombi tiibakali kububona kuti bulayandika. Pele nindakali mukubusi, ndakali kuyeeya kujatikizya mpindu yabuumi, alimwi ndakabala mabbuku aaci Budda, ci Hindu alimwi aaci Mozilemu. Alimwi ndakalomba Leza kuti anditondezye kasimpe.
Kuzikusika muma 1970, buvwuntauzi musayaansi bwakayaambele kapati cakuti ndakayeeya kuti ambweni bulakonzya kuyubununa makani aajatikizya matalikilo aabuumi. Zintu zicitika mumaseelo aapona zyakandikkomanisya kapati, aboobo ndakasala kwiiya zinji kujatikizya ngawo. Nokuba boobo, bunji bwabasyaazibwene mumakani aasayaansi ibakali kundiyiisya bakaamba kuti buumi bwakalitalikila buya, aboobo ndakabasyoma.
Ncinzi cakamupa kuba aaluyandisyo lwamakani aamu Bbaibbele?
Ndakaswaigwa a Bakamboni ba Jehova bobilo. Nokuba kuti bakali bantu bali kabotu, ndakabanyemena akubaambila kuti tiindakali kuyanda kwiiya. Bakaintu bangu bakamvwa ciindi nendakali kubanyemena, aboobo bakandaambila kuti “Eeci ncimwacita tacili kabotu pe, nkaambo lyoonse mwalikuyandisya kuzyiba mpindu yabuumi.” Bakaintu bangu bakaliluzi, aboobo ndakausa kapati akaambo kacintu ncindakacita. Mpoonya ndakazuza akubapilusya alimwi Bakamboni aabo. Notwakali kubandika ambabo, ndakabaambila kuti ndakali kuyanda kuzyiba naa Bbaibbele lileendelana asayaansi.
Ino bakamwiingula buti?
Bakanditondezya ncolyaamba Bbaibbele kujatikizya makani Aamatalikilo aanguzu zilibonya mububumbo. Lugwalo ndobakabala lwaamba kuti: “Amuululale mubone kujulu. Ezi zyoonse nguni wakazilenga? . . . Mubupati bwakwe bugambya, mbwali singuzu, taakwe niiba yomwe iibulika.”a Kaambo aaka kakandikkomanisya kapati. Alimwi, cilalimvwisya kuti alikke buyo Sikutalisya nguzu musongo nguukonzya kuzyiba bweende bwazintu mububumbo.
Sena kuyeeya kwanu kujatikizya makani aakusanduka kwazintu kwakacinca?
Asyoonto-syoonto ndakazyiba kuti buvwuntauzi busiyene-siyene bujatikizya makani aakusanduka kwazintu bwakanyina bumboni bwini-bwini. Masimpe ngakuti, ntwaambo buyo tupandulula mbuli bupange bwazintu zijanika muzilenge zipona mbozikwabilila mubili, alimwi akuti zilabeleka munzila iigambya. Mbondakali kuyaabuyungizya luzyibo lwangu mumakani aabukwabilizi bwamubili, ndakazyiba mbobukatazya kumvwisya alimwi ambobuyandika. Aboobo, buvwuntauzi bwangu bwakandipa kuzyiba kuti buumi bwakalengwa buya a Mulengi sibusongo.
Buvwuntauzi bwangu bwakapa kuti nditalike kusyoma kuti buumi bwakalengwa buya a Mulengi sibusongo
Sena kuli bumboni bwazilenge mbomukonzya kutwaambila?
Bukwabilizi bwamubili bupangidwe munzila iigambya alimwi iikatazya kapati bwalo butukwabilila kwiinda mukulwana tuzunda tusiyene-siyene tutayandiki mumubili. Oobu bubambe, bulakonzya kubikkwa muzibeela zyobilo zibelekela antoomwe. Cibeela cakusaanguna cilalwana tuzunda mumawoola buyo masyoonto. Mpoonya cibeela cabili cilatola mazuba aali mbwaabede kutegwa cilibambile, pele cilabeleka kabotu kapati kulwana tuzunda twamusyobo uugaminide. Alimwi cibeela eeci cabili tacilubi kufwambaana, calo cigwasya kuti naa kumbele tuzunda twamusyobo ooyo twaakutalika alimwi, cilakonzya kutulwana cakufwambaana. Zibeela zyoonse eezyi zibeleka kabotu kapati cakuti kanji-kanji inga tamukonzyi kuzyiba kuti naa mwali kulwanwa atuzunda alimwi akukwabililwa. Acimwi cigambya kapati, ninzila bukwabilizi bwamubili mbobucikonzya kuzyiba zintu zyeenzu izinjila mumubili alimwi amisyobo iisiyene-siyene yamaseelo aali mumubili.
Amutwaambile, ncinzi cicitika kuti mumubili kwanjila tuzunda?
Tuzunda tulakonzya kunjila mumubili kwiinda mumuya ngotuyoya, muzyakulya, mulukanda alimwi amuzizo zimwi zyamubili. Ciindi bukwabilizi bwamubili nobwazyiba kuti kuli cintu ceenzu icanjila mumubili, bulatuma ma proteins manji kubusena oobo aabambilidwe kulwana cintu eeco. Cibeela cili coonse cama proteins cilatalika kubeleka kutegwa cilibambile kulwana tuzunda ooto. Eelo kaka oobu bubambe bulakatazya kumvwisya!
Sena lino inga kwaambwa kuti, luzyibo lwanu musayaansi lwakayumya lusyomo lwanu muli Leza?
Inzya! Mbobupangidwe alimwi ambobubeleka bukwabilizi bwamubili wesu bulatondezya kuti kuli Mulengi sibusongo alimwi siluyando. Alimwi kwiiya sayaansi akwalo kwandigwasya kuyumya lusyomo lwangu mu Bbaibbele. Mucikozyanyo, lugwalo lwa Tusimpi 17:22, lutwaambila kuti: “Moyo uukondwa musamu mubotu.” Basikuvwuntauzya bakajana kuti bube bwamizeezo yesu bulakonzya kubujatikizya bukwabilizi bwamibili yesu. Mucikozyanyo, kukatala kulakonzya kupa kuti bukwabilizi oobu butabeleki kabotu.
Beenzinyoko banji tabasyomi muli Leza, ino nkaambo nzi?
Kuli twaambo twiindene-indene. Bamwi, mbubwenya mbuli ndime, basyoma buyo zintu nzyobakayiisyigwa. Ambweni basyoma kuti njiisyo yakusanduka kwazintu ilagwasyilizyigwa asayaansi. Ibamwi tababikkili maano kujatikizya buumi mbobwakatalika. Eelo kaka eeci cileetezya! Alimwi ndiyeeya kuti beelede kuyiisyigwa makani manji.
Nkaambo nzi ncomwakaba Kamboni wa Jehova?
Ndakakulwaizyigwa kapati akusamausya beenzu nkobacita Bakamboni alimwi ndakabona lusyomo ndobajisi muzisyomezyo zya Mulengi kujatikizya buumi bubotu kumbele.b Alimwi lusyomo oolo, luyeeme abuvwuntauzi bulimvwisya alimwi busyomeka, kutali mumakani aakubeja naa aakuyeeyela buyo.c