Icakapa Mufwundisi Kusiya Cikombelo Cakwe

Amutwaambile mbomwakakomena.

Ndakazyalilwa ku Italy mu 1943. Ndakakomena antoomwe abanabokwesu basankwa abasimbi kumunzi, alimwi bataata bakali balimi alimwi bakali babezi. Bazyali besu bakatukomezya katuli ba Katolika bayumu.

Nkaambo nzi ncomwakayanda kuba mufwundisi?

Nindakacili mwana, ndakali kuyanda kuswiilila bafwundisi mucikombelo. Majwi aabo alimwi azilengwa zigambya nzyobakali kucita zyakali kundikkomanisya. Aboobo ndakali kuyanda buyo kuba mufwundisi. Nindakakkwanya myaka iili 13, bamaama bakanditola kucikolo cabbodiŋi cakali kugwasya basankwa kulibambila lwiiyo lwaatala lwabufwundisi kumbele.

Sena lwiiyo lwanu lwakali kubikkilizya akwiiya Bbaibbele?

Asyoonto buyo. Nindakakkwanya myaka iili 15, mwiiyi wangu umwi wakandipa bbuku lya Makani Mabotu—zibalo zyabuumi bwa Jesu alimwi amulimo wakwe—alimwi ndakalibala bbuku eeli ziindi zinji. Nindakakkwanya myaka iili 18, ndakaunka ku Rome kuyakwiiya kumayunivesiti aayendelezyegwa abapaapa. Ndakaiya Chilatini, Chigiriki, makani aakaindi, busongo bwabantu, mbobayeeya bantu, alimwi amakani aabukombi. Nokuba kuti twakali kupeta tupango twamu Bbaibbele akuswiilila kuzibalo zyamu Bbaibbele nozibalwa mu Nsondo kucikombelo, mubwini tiitwakali kwiiya Bbaibbele.

Mwakaba bafwundisi, sena eeci cakali kubikkilizya akuyiisya?

Kanji-kanji mulimo wangu wakali wakweendelezya. Pele ndakali kuyiisya malailile aakali kuzwa ku Second Vatican Council.

Nkaambo nzi ncomwakatalika kucidooneka cikombelo?

Kuli zintu zyotatwe izyakandikatazya. Cikombelo cakali kujatikizyigwa mutwaambo twacisi. Basololi alimwi abasicikombelo tiibakali kupegwa mulandu akaambo kakutalilemeka. Alimwi njiisyo zimwi zyaba Katolika tiizyakaluzi. Mucikozyanyo, mbuti Leza siluyando mbwakonzya kusubula bantu bafwide lyoonse mane kukabe kutamani? Alimwi sena Leza uyanda kuti katwiinduluka mipailo ziindi zinji kumwi katujisi lozali?a

Aboobo ncinzi ncomwakacita?

Ndakapaila kulomba busolozi kumwi misozi kayeenda. Alimwi ndakaula Bbaibbele lyaba Katolika litegwa Jerusalem Bible, ilyakazwide akumwaigwa lyamuci Italian, alimwi ndakatalika kulibala. Mpoonya buzuba bumwi mu Nsondo mafwumofwumo nindakali kwaanzika zisani noyakamana Misa, baalumi bobilo bakaboola kukkoleji. Bakandaambila kuti Mbaakamboni ba Jehova. Twakabandika kwaciindi cilamfwu makani aamu Bbaibbele alimwi ancolyaamba kujatikizya zitondezyo zyabukombi bwakasimpe.

Ino mwakalimvwa buti kujatikizya beenzu?

Ndakamvwa kabotu mbobakali kwaambaula cakusinizya alimwi cakuliiba nobakali kwaamba zibalo zyamu Bbaibbele lyaba Katolika. Mukuya kwaciindi, Mario, Kamboni uumbi wakatalika kundiswaya. Wakali kukkazika moyo alimwi akusyomeka—lyoonse mu Mujibelo mafwumofwumo, kunyina makani ambobwaca, wakali kulizya kalangu kaamulyango wakukkoleji aciindi ca 09:00hrs.

Ino bafwundisi bamwi bakalimvwa buti kujatikizya kuswaigwa ooku?

Ndakali kubatamba kumibandi yesu, pele kunyina wakali kubikkila maano kuciiyo ca Bbaibbele. Pele mebo ndakali kukkomana. Ndakali kwiiya zinji zikondelezya, mbuli kaambo Leza ncazumizya bubi akupenga—ikaambo kakandikatazyide kwaciindi cilamfwu.

Sena balupati-pati tiibakasola kumukasya kwiiya Bbaibbele?

Mu 1975, ndakaswaya ku Rome ziindi zinji kutegwa ndibaambile mbondakali kulimvwa. Balupati-pati bakasola kucinca kuyeeya kwangu, pele kunyina wakabelesya Bbaibbele. Aboobo, mu January 9, 1976, ndakabalembela baku Rome kuti tiindakacili wa Katolika. Nikwakainda mazuba obilo, ndakazwa akkoleji akutanta citima kutegwa ndikajanike kumuswaangano wa Bakamboni ba Jehova ciindi cakusaanguna, ndakajana kuti kuli muswaangano mupati wakali kubikkilizya mbungano zinji. Kumuswaangano, zintu zyoonse izyakali kucitika, zyakaliindene azyondakazyibide. Kamboni umwi aumwi wakajisi Bbaibbele alimwi akubatobelezya baambi nobakali kubandika makani aaindene-indene.

Ino bamukwasyi wanu bakaamba nzi kujatikizya makani aaya?

Ibanji bakandikazya citaambiki. Pele ndakajana kuti musyoonto wangu musankwa wakali kwiiya a Bakamboni ku Lombardy, busena ibuli ku Italy nkoili kunyika. Ndakaunka kumubona, alimwi Bakamboni bakooko bakandigwasya kujana mulimo abusena bwakukkala. Mumwaka nguwenya ooyo ndakabbapatizyigwa akuba umwi wa Bakamboni ba Jehova.

Sena muluuside?

Peepe! Lino ndilimvwa kuba afwaafwi ncobeni a Leza, akaambo kakuti zintu nzyondizyi kujatikizya nguwe ziyeeme a Bbaibbele, kutali abusongo bwabantu naa zilengwa zyacikombelo. Alimwi ndilakonzya kuyiisya bamwi calusinizyo alimwi kuzwa ansi aamoyo.