Kulanga-langa Zicitika Mu Asia

Luzyibo Lulabakwabilila Bana

Basyaazibwene mumakani aamilawo baku China baamba kuti bana balalangilwa kutundululwa ikuti bazyali babo baalilwa kubayiisya makani aakoonana nobacili baniini. Basimilawo baku China bakalanganya milandu iibalilwa ku 8,000 iijatikizya bana bakatundululwa mumakani aakoonana mumyaka yone yainda. Syaazibwene umwi waku Beijing Normal University waamba kuti bana “bali muntenda alimwi ncuuba-uba kujatwa. Kuba aluzyibo nenzila imwi mbobakonzya kulikwabilila kubantu bayanda kubatundulula mumakani aakoonana.”

NCOLYAAMBA BBAIBBELE: Bazyali basongo balabayiisya bana babo mbobakonzya kulikwabilila “kumuntu waamba zintu zitaluleme.”—Tusimpi 2:1, 10-12.

Bantu Ibafwa Lyainda Guwo Litegwa Typhoon

Kweelana abuvwuntauzi bumwi, mweelwe wabana basimbi baku Philippines ibafwa mumwaka kwainda guwo ulainda amweelwe wabantu bajaigwa aguwo lini. Kulangilwa kuti kubula mulimo lyainda guwo, mali aayandika mukuyakulula, alimwi ambobapegwa mali bana basimbi, kubikkilizya azyakulya alimwi ambobalanganizyigwa nzezipa kuti cibe boobu.

NCOLYAAMBA BBAIBBELE: ‘Umupe cakulya muntu uufwide nzala, bacete alimwi abantu batajisi kwakukkala ubatambule muŋanda yako, wabona muntu uuli amantanda, umupe zisani zyakusama.’—Isaya 58:7.

Bacembeede Ibalijaya ku South Korea

Mu 2011, akati kabantu bakalijaya ku South Korea, ibainda ku 25 pesenti mbantu balaamyaka iili 65 akwiinda. Basikuvwuntauzya baamba kuti cili boobo akaambo kakuti bacembeede tabalanganizyigwi kabotu alimwi akuti mali alakatazya kujana—bana South Korea babalilwa ku 50 pesenti mbacete. Bantu batasiki kucisela baku South Korea bayeeya kuti bana mbabeelede kulanganya bazyali babo bacembeede.

NCOLYAAMBA BBAIBBELE: “Lemeka bauso abanyoko.” —Baefeso 6:2.