Mbomukonzya Kuyumya Cikwati Canu

BUYUMUYUMU

Mubuzuba mbomwakakwatana, mwakakonka. Cikonke eeco cakali cakuti munooli angomukwetene limwi lyoonse ziyume zitete alimwi akuti muyoolanganya mapenzi ngomuyoojana.

Nokuba boobo, kwamyaka minji lino kuzwangana kwanyonganya cikwati canu. Sena mucilimvwa kuti mucimuyanda kapati ngomukwetene limwi?

NCOMWEELEDE KUZYIBA

Kuyumya cikwati ngomusamu, talili ndepenzi pe. Bantu banji mazuba aano babona kuti inga tiibacikonzya kuyumya cikwati cabo. Bamwi balakonzya kweezyanisya kuyumya cikwati kukwaangililwa kucintu cimwi kutegwa batanjili mumapenzi. Muciindi caboobo, kuyumya cikwati mweelede kukubona kuba ngobyo iikonzya kupa kuti cikwati citazungaani. Mukaintu uukwetwe wazina lya Megan waamba kuti: “Cintu cibotu kujatikizya kumvwana mucikwati ncakuzyiba kuti nokuba kuti mwazwangana taakwe uukonzya kusiya mweenzinyina.”a Kuzyiba buyo kuti cikwati taciko kumana nokuba kuti zintu zimwi tazili kabotu, kulakonzya kugwasya kulanganya mapenzi aanu.—Amubone kabbokesi kakuti “Kuyumya Cikwati Alimwi Akusyomeka.”

Masimpe ngakuti: Ikuti kamujisi mapenzi mucikwati canu, ecino nceciindi cakuyumya cikwati canu muciindi cakulanga-langa kuti nguni uutacibikkili maano cikwati. Ino inga mwacita buti oobo?

NCOMUKONZYA KUCITA

Amulange-lange mbomucibona cikwati. “Taakwe kulekana.” Sena kaambo aaka kamupa kulimvwa kwaangwa, naa kamupa kulimvwa kukwabililwa? Ciindi nokwaba mapenzi, sena inga musaanguna kuyeeya makani aakulekana? Kutegwa muyumye cikwati canu, cilayandika kuti kamubona cikwati kuti tacili cintu ceelede kumana pe.—Njiisyo yamu Bbaibbele: Matayo 19:6.

Amulange-lange mbomwakakomena. Zintu zyakacitikila bazyali banu zilakonzya kumupa kwaabona munzila imwi makani aakumvwana mucikwati. Mukaintu uutegwa Lea waamba kuti: “Bazyali bangu bakalekana ciindi nondakacili mwana, eeci cindipa kulibilika kuti ambweni icakabacitikila inga candipa kutaabona kabotu makani aakuyumya cikwati.” Nokuba kuti cili boobo, amusyome kuti mulakonzya kucinca zintu mucikwati canu. Takuli kuti zyakacitika kubazyali banu ziyoocitika akulindinywe!—Njiisyo yamu Bbaibbele: Bagalatiya 6:4, 5.

Amulange-lange majwi ngomubelesya. Ciindi nomuzwangana angomukwetene limwi, mutanikwaambi zintu zikonzya kumupa kuusa kumbele mbuli majwi aakuti “Ndilakusiya!” naa “Ndilajana buyo muntu uumwi uukonzya kundiyanda!” Majwi aali boobu taayumyi cikwati, apa buyo kuti muzumanane kutukilana muciindi cakumana penzi lyabuka. Muciindi cakubelesya majwi aatali kabotu, mulakonzya kwaamba majwi mbuli aakuti: “Ndilizyi kuti toonse tulinyemede. Ino inga twacita nzi kutegwa tumane penzi eeli?”—Njiisyo yamu Bbaibbele: Tusimpi 12:18.

Amucite zintu zitondezya kuti muyanda kuyumya cikwati. Amubikke cifwoto cangomukwetene limwi atebulu lyanu kumulimo. Kamwaamba zintu zibotu kujatikizya ngomukwetene limwi kubantu bamwi. Amube acilengwa cakumutumina fooni ngomukwetene limwi ciindi nomutali antoomwe. Lyoonse kamwaamba kuti “swebo” akubelesya mabala mbuli aakuti “mebo abakaintu bangu” naa “mebo abalumi bangu.” Kwiinda mukucita boobo, muyootondezya bamwi kuti mulamuyanda ngomukwetene limwi.

Amwiiye baabo ibajisi cikozyanyo cibotu. Amwiiye kubanabukwetene basimide ibazwidilila mukulanganya mapenzi aabo. Amubabuzye kuti, “Ino mwaabona buti makani aakuyumya cikwati, alimwi mbuti mbocamugwasya mucikwati canu?” Bbaibbele lyaamba kuti: “Mbubonya butale mbobukwenga butalenyina, awalo muntu ulasensemuna mweenzinyina.” (Tusimpi 27:17) Kwiinda mukubelesya njiisyo eeyi, mulakonzya kugwasyigwa alulayo ndobakonzya kumupa aabo ibazwidilila mucikwati cabo.