Mibuzyo Yotatwe Bantu Njobanga Bayanda Kumubuzya Leza

BA Susan bakatalika kuba amibuzyo iijatikizya Leza nibakajisi myaka iili ciloba, ciindi mweenzinyina Al iwakajisi myaka iili fwuka naakanjila mucibbadela akubikkwa kumuncini akaambo kakuciswa bulwazi bwa polio. Bakalemba kujatikizya cakabacitikila mumuteende uutegwa The New York Times wamu January 6, 2013.

Nobakamuswaya Al mucibbadela, ba Susan bakabuzya banyina kuti: “Nkaambo nzi Leza ncakonzya kucita cintu cili bobuya kumwana muniini?”

Banyina bakaingula kuti: “Bafwundisi balakonzya kwiingula kuti Leza ulijisi twaambo ncaacitila boobu, pele mebo tandituzyi twaambo ooto.”

Nikwakainda myaka yobilo, nkokuti mu 1954, kwakajanika musamu uukwabilila ku polio wa Jonas Salk, aboobo banyina Susan bakaamba kuti andiza Leza nguwakamusololela mukuvwuntauzya kwakwe.

Ba Susan bakaamba kuti: “Anu Leza wakeelede kufwambaana kumusololela Jonas Salk kutegwa Al atabikkwi mumuncini.”

Mubufwaafwi, ba Susan bakalemba boobu kujatikizya cakabacitikila nobakacili mwana: “Al wakafwa nikwakainda myaka iili lusele, aciindi eeci mebo tiindakali kusyoma muli Leza.”

Mbubwenya mbuli ba Susan, bantu banji ibakacitikilwa ntenda naa ibakabona ntenda kaicitika baalilwa kujana bwiinguzi bumvwika kumibuzyo njobajisi kujatikizya Leza. Bamwi balaleka kusyoma muli Leza. Bamwi tabakakili limwi kuti Leza nkwali, pele batalika buyo kudooneka.

Eeci tacaambi kuti bantu batasyomi muli Leza alimwi abaabo ibadooneka buyo tabazyi cicitika mubukombi. Muciindi caboobo, kanji-kanji zicitika mubukombi nzyezibapa kutasyoma muli Leza. Inga balimvwa kuti bukombi bwaalilwa kwiingula mibuzyo iibakatazya bantu. Ino mibuzyo iili buti? Kanji-kanji mibuzyo eeyo njemibuzyo iibakatazya abalo bantu ibalyaamba kuti balasyoma muli Leza. Amubone mibuzyo yotatwe bantu banji njobanga bayanda kumubuzya Leza ikuti bapegwa coolwe, alimwi abwiinguzi Bbaibbele mbolipa.

1 “NKAAMBO NZI NCOLEKELA MAPENZI?”

Ino ncinzi icipa kubuzya mubuzyo ooyu?

Bantu banji baamba kuti ‘Leza siluyando ulakonzya kuzilesya ntenda zicitika mubuumi.’

AMUYEEYE KUJATIKIZYA MAKANI AAYA: Tulakonzya kugambwa kubona zilengwa amicito yabantu bazwa kuzisi zimbi. Cilakonzya kutwaalila kumvwisya mbobacita zintu. Mucikozyanyo, kumasena aamwi bantu bazyi kuti kulangana nomwaambaula ncitondezyo cabulongwe; pele kumasena aamwi citondezya kubula bulemu. Pele kunyina kaambo keelede kutupa kwaamba kuti zilengwa zyabantu bamwi taziluzi. Muciindi caboobo, tuyandika buyo kubamvwisya.

Sena cintu cili boobu cilakonzya kucitika mumakani aakuzyiba Leza? Bantu banji basyoma kuti kupenga ncitondezyo cakuti Leza tako. Nokuba boobo, bamwi ibazyi kaambo Leza ncalekela mapenzi, balaalusyomo lwakuti nkwali.

NCOLYAAMBA BBAIBBELE: Mizeezo ya Leza anzila zyakwe ziliindene azyesu. (Isaya 55:8, 9) Akaambo kaceeci, mbwacita zintu, alimwi atwaambo tumupa kulindila katanacita cintu cimwi, zilakonzya kutugambya.

Nokuba boobo, Bbaibbele talitwaambili kuzumina majwi mbuli aakuti “kunyina muntu uukonzya kumumvwisya Leza.” Muciindi caboobo, litukulwaizya kwiiya zinji kujatikizya Leza, akutugwasya kuzyiba kaambo ncacitila zintu zimwi alimwi aciindi nazicita.a Alimwi buya tulakonzya kuswena kulinguwe.—Jakobo 4:8.

2 “NKAAMBO NZI NCOKULI KUUPAUPA AMESO MUBUKOMBI?”

Ino ncinzi icipa kubuzya mubuzyo ooyu?

Bamwi balakonzya kwaamba kuti: ‘Ikuti Leza naali kubukkomanina bukombi buzwa ansi aamoyo, nibatali kuupaupa ameso aabo ibalyaamba kuti balamukomba.’

AMUYEEYE KUJATIKIZYA MAKANI AAYA: Amweezyeezye mwana musankwa iwakaka kukomezyegwa abausyi munzila iili kabotu pele wasala kuzwa aŋanda akupona buumi bwabutaka. Nokuba kuti bausyi tabayandi, bamulekela kutobela ncaasala. Sena bantu bakonzya kumujana mwana ooyu inga baamba kuti bausyi mwana ooyu bakali babi, naa kuti tanaakajisi buya abausyi? Peepe! Ncimwi buyo, kuupaupa ameso mubukombi citondezya buyo kuti Leza ulabalekela bantu kusala nzila njobayanda mubuumi.

NCOLYAAMBA BBAIBBELE: Leza ulakusulaika kuupaupa ameso mubukombi. (Jeremiya 7:29-31; 32:35) Pele ulabalekela bantu kusala ncobayanda kucita. Bantu banji ibalyaamba kuti balamusyoma Leza basala kutobela njiisyo zyabukombi zyabantu alimwi balalipangila zyeelelo zyambobeelede kulilemeka.—Matayo 15:7-9.

Mukwiimpana, bukombi mbwazumina Leza tabuli bwakuupaupa ameso.b Jesu wakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Johane 13:35) Luyando oolu talweelede kuba “lwakuupaupa ameso.” (Baroma 12:9) Zikombelo zinji zyaalilwa kuzuzikizya ceelelo eeci. Mucikozyanyo, munkondo yaku Rwanda yamu 1994, bantu banji ibakomba bakajaya bantu mbobakomba limwi, akaambo buyo kakuti bantu aabo bakali bamwaambo uumbi. Mukwiimpana, Bakamboni ba Jehova tiibakatola lubazu munkondo eeyi, banji bakabakwabilila basyominyina alimwi abamwi buyo, mane akubikka buumi bwabo muntenda kutegwa babakwabilile. Kulyaaba kuli boobu kutondezya kuti bukombi bulakonzya kuba abantu batali basikuupaupa ameso.

3 “NKAAMBO NZI NCOTULI WAANO ANYIKA?”

Ino ncinzi icipa kubuzya mubuzyo ooyu?

Bantu bamwi balakonzya kulibuzya kuti: ‘Nkaambo nzi bantu ncobapona buyo myaka iili 80 naa 90 mpoonya akufwa? Nkaambo nzi ncotupona myaka misyoonto buyo?’

AMUYEEYE KUJATIKIZYA MAKANI AAYA: Bantu banji batasyomi muli Leza baamba kuti kuli kaambo zintu munyika ncozipangidwe munzila iikatazya kumvwisya. Baamba kuti nyika, mwezi, alimwi amapulaneti aamwi zyakapangwa munzila iili buyo kabotu kutegwa kakuli buumi anyika. Baamba milawo yeendelezya zintu zili mububumbo kuti ili kabotu, alimwi yakabikkwa munzila iilondokede cakuti kucinca buyo asyoonto kulakonzya kupa kuti kutabi buumi anyika.

NCOLYAAMBA BBAIBBELE: Nokuba kuti bantu banji babona kuti kutapona myaka minji anyika ncitondezyo cakuti Leza tako, zilengwaleza zipa bumboni bunji bwakuti kuli Mulengi. (Baroma 1:20) Wakajisi makanze ncaakapangila zintu eezyi, alimwi ikaambo ncotuponena kaleendelana amakanze aakwe. Leza wakalenga bantu kuti kabapona kukabe kutamani anyika, alimwi makanze aakwe taacincide pe.—Intembauzyo 37:11, 29; Isaya 55:11.

Nokuba kuti tulakonzya kuzyiba kuti Leza nkwali akubona bube bwakwe bumwi muzintu nzyaakalenga, Leza tanaakali kuyanda kuti makanze aakwe katwaabona kwiinda munzila eeyi. Kutegwa tuzyibe makanze aa Leza alimwi akaambo ncotuponena, tuyandika kumvwa ncatwaambila Leza. Ulabandika andiswe kwiinda mu Bbaibbele kubelesya mwaambo uutakatazyi kumvwa.c Bakamboni ba Jehova bamutamba kuti mubulange-lange alimwi ibwiinguzi bujanika mu Bbaibbele.