Mubili Mboucikonzya Kuponya Zilonda

KULI zintu zinji izipa kuti bantu kabapona. Mucikozyanyo, mubili ulaponya zilonda alimwi akubambulula ma tissues. Eeci cilatalika kucitika mbokwabeda buyo cilonda.

Amulange-lange cicitika: Kupona kulacitika akaambo kakubeleka kwamaseelo manji munzila iigambya:

• Cibeela cipa kuti bulowa kabwaangana cilanamatila kuma tissues aali acilonda, akupa kuti bulowa bwaangane alimwi akusinka nsinga zyabulowa izyanyonyooka.

• Ikuzimba kukwabilila kuti malwazi atanjili alimwi akugwisya tombe lili lyoonse akaambo kakulicisa.

• Mumazuba buyo masyoonto, mubili ulatalika kubamba ma tissues mapya, kujala cilonda alimwi akubambulula nsinga izinyonyookede.

• Kumamanino, kuli ma tissues aabambulula akuyumya busena aali cilonda.

Kwiinda mukubona mbobwaangana bulowa, basikuvwuntauzya bali mukupanga ma plastic aakonzya kulibambulula kuti naa anyonyooka. Ma plastic aayo aakonzya kulibambulula ajisi tupaipi itubambene itujisi ma chemicals obilo aazwa ikuti kuli aanyonyooka. Ciindi ma chemicals aaya obilo naasangana, apanga mulolo walo iwuunka abusena ibwanyonyooka, akujala waawo aali lwaanzi naa tupulo. Mulolo waangana, upa kuti aawo aanyonyookede ayume mbuli mbwaalibede kumatalikilo. Sikuvwuntauzya umwi wakaamba kuti nzila eeyi yakupona kucitika kuzintu zyama plastic njobacilanga-langa nkoili kale muzintu zipona.

Ino muyeeya buti? Sena mubili mboucikonzya kuponya zilonda ncintu cakaboola akaambo kakusanduka naa cakalengwa buya?