MAKANI AAYEEME AMUTWE UULI ACIVWUMBYO | INO NCINZI CIJATIKIZYIDWE MUMASALAMUZI?
Kukwelelezyegwa Amasalamuzi!
“Zyeelo, bantu balisandula kuba banyama, alimwi abantu baungudwe—zyanjililwa busena abantu banjidwe madaimona alimwi abantu batanda madaimona.”—The Wall Street Journal.
BALOZI bana alimwi abapati, alimwi azyeelo ziboneka kabotu—zili akati kazintu zimwi zibelesyegwa mumasalamuzi zyalo zidumide kapati mumabbuku, mumafilimu, alimwi amuzisobano zyamavidiyo. Ino ncinzi cipa kuti kazikwelelezya?a
Syaazibwene mulwiiyo lwa sociology Claude Fischer wakalemba kuti: “Mumyaka iili mbwiibede yainda, mweelwe wabantu basyoma zyeelo wakayungizyika kuzwa amuntu omwe akati kabantu bali kkumi bana America kuya kumuntu omwe akati kabantu botatwe. Mweelwe wabakubusi bana America wiinda acisela camweelwe wabapati balangilwa kuti bakaunka kale kuli basikwaamba zyakumbele, kusyoma mizimo, alimwi akusyoma kuti maanda amwi alijisi madaimona.”
Tacigambyi pe, kuti makani aamba bantu ibanjilwa myuuya mibi atalika kuyoosya alimwi. Mumuteende wakuti The Wall Street Journal ba Michael Calia bakalemba kuti: “Kunjilwa madaimona, muzilengwa zidumide kuswaanganizyigwa abantu bakaungudwe, bantu balisandula kuba banyama alimwi azyeelo zyakaindi.”
Lipooti imwi yakaamba kuti, “mweelwe uubalilwa ku 25 pesenti kusika ku 50 pesenti wabantu nyika yoonse balasyoma muzyeelo, alimwi zyeelo zilaambwa kapati mumabbuku aamuzilengwa zinji.” Alimwi buvwuntauzi ibwakacitwa mu United States abasyaazibwene mulwiiyo lwa sociology ba Christopher Bader alimwi aba Carson Mencken “bwakatondezya kuti mweelwe uugambya wabana America uubalilwa akati ka 70 kusika ku 80 pesenti balasyoma mumusyobo wamasalamuzi nouba omwe.”
Sena kujatikizyigwa amizimo alimwi amasalamuzi nkulikondelezya ikuli buyo kabotu?
a Masalamuzi: Ncintu “citakonzyi kupandululwa abasayaansi naa amilawo yamububumbo.”—Merriam-Webster’s Learner’s Dictionary.