Mubweendelezi bwa Bwami bwa Leza “Luumuno Luyoovwula”

Ino-ino Bwami bwa Leza mbotwali kulindila kwaciindi cilamfwu, nkokuti imfwulumende yanyika yoonse iyakatalisyigwa a Leza, buyoopa kuti bantu kabapona muluumuno alimwi alukamantano. Lugwalo lwa Intembauzyo 72:7 lusyomezya kuti, “luumuno luyoovwula.” Pele ino Bwami bwa Leza buyootalika lili kweendelezya nyika? Ino buyakweendelezya buti? Alimwi ino inga mwagwasyigwa buti abweendelezi bwambubo?

INO BWAMI BWA LEZA BUYOOBOOLA LILI?

Bbaibbele lyakazyaambila limwi zintu izyakali kuyootondezya kuti Bwami bwa Leza bulaboola ino-ino. Zintu zyoonse eezyi nzezipanga “citondezyo” calo cibikkilizya nkondo zyamasi, nzala, malwazi, mizuzumo yanyika minji alimwi akuvwula kwabubi.—Matayo 24:3, 7, 12; Luka 21:11; Ciyubunuzyo 6:2-8.

Businsimi bumwi bwaamba kuti: “Kumazuba aamamanino kuyooba ziindi zikatazya ncobeni. Nkaambo bantu bayooba basikuliyanda, bayandisya mali, . . . batamvwidi bazyali, batalumbi, batasyomeki, batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu, . . . basikulitukumuna, bayandisya zyakulikondelezya kwiinda kuyandisya Leza.” (2 Timoteyo 3:1-4) Bukkale oobu bwali kulibonya lyoonse mubantu bamwi. Pele mazuba aano bulidumide kapati.

Businsimi oobu bwakatalika kuzuzikizyigwa mu 1914. Inzya, basikwiiya zyakaindi, basimapolitikisi balaampuwo alimwi abalembi bakaamba nyika mboyakacinca kuzwa mumwaka ooyu. Mucikozyanyo, sikwiiya zyakaindi waku Denmark uutegwa Peter Munch wakalemba kuti: “Nkondo iyakacitika mu 1914 akaba matalikilo aakucinca kwazintu kupati mubuumi bwabantu. Kautanasika mwaka ooyu, bantu bakali kuyeeya kuti zintu munyika zyakali kuyaabubota, . . . pele kwakatalika mapenzi, zintu ziyoosya alimwi akusulaikana cakuti kwakanyina kuliiba nyika yoonse.”

Cikkomanisya ncakuti, zyaakwiinda zintu eezyi kuyooba luumuno. Alimwi zitondezya kuti Bwami bulaafwaafwi kutalika kweendelezya nyika. Mane buya, Jesu wakakabikkilizya kaambo aaka kakulwaizya naakali kwaamba citondezyo cijatikizya mamanino naakati: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Makani mabotu aaya ngomulumbe mupati ngobakambauka Bakamboni ba Jehova. Alimwi buya, magazini yabo iimwaigwa kapati iitwa kuti Ngazi Yamulindizi Yaambilizya Bwami bwa Jehova. Lyoonse ibandika zintu zibotu Bwami bwa Leza nzyobuyoobacitila bantu alimwi anyika.

INO BWAMI BWA LEZA BUYOOTALIKA BUTI KWEENDELEZYA NYIKA?

Bwiinguzi kumubuzyo ooyu bubikkilizya twaambo ootu tone tuyandika kapati:

1. Bwami oobu kunyina nobuyoobelesya basololi bamapolitikisi bamunyika iino.

2. Basololi bamapolitikisi bamunyika tabakayandi kuleka kweendelezya, aboobo cabufwubafwuba bayootalika kulwana Bwami bwa Leza.—Intembauzyo 2:2-9.

3. Bwami bwa Leza buyooyandika kunyonyoona mami aamunyika alo aayanda kuzumanana kudyaaminina bantu. (Daniele 2:44; Ciyubunuzyo 19:17-21) Nkondo eeyi yamamanino yanyika yoonse iitwa kuti Amagedoni.—Ciyubunuzyo 16:14, 16.

4. Boonse aabo ibalibombya ku Bwami bwa Leza bayoofwutuka lya Amagedoni akunjila munyika mpya yaluumuno. Bayoopanga nkamu eeyo Bbaibbele njoliita kuti “nkamu mpati,” balo ibabalilwa kumamiliyoni.—Ciyubunuzyo 7:9, 10, 13, 14.

INO INGA MWAGWASYIGWA BUTI ABWEENDELEZI BWA BWAMI?

Ntaamu yakusaanguna yakuba mulelwa wa Bwami bwa Leza, nkwiiya. Mane buya, Jesu wakaamba boobu mumupailo kuli Leza: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Ciindi bantu nobamuzyiba mbwabede Jehova Leza, balagwasyigwa munzila zinji. Amubone buyo nzila zyobilo eezyi: Yakusaanguna njakuti, balaba alusyomo luyumu mulinguwe. Lusyomo oolo, iluyeeme abumboni lubapa kusinizya kuti Bwami bwa Leza mbwancobeni alimwi akuti bweendelezi bwambubo bulaafwaafwi. (Bahebrayo 11:1) Yabili njakuti, luyando lwabo kuli Leza alimwi akubantu lulakomena. Luyando ndobajisi kuli Leza lubapa kumumvwida camoyo woonse. Mpoonya luyando ndobajisi kubantu lubapa kutobela majwi aa Jesu alo aamba kuti: “Mbubonya mbomuyanda kuti bantu bamucitile, andinywe amubacitile mbubonya.”—Luka 6:31.

Mbubwenya mbuli usyi siluyando, Mulengi wesu uyanda kuti zintu kazitweendelela kabotu. Uyanda kuti katupona buumi bwalo Bbaibbele mboliita kuti “buumi bwini-bwini.” (1 Timoteyo 6:19) Buumi bwamazuba aano tabuli “buumi bwini-bwini.” Kubantu banji, buumi bwabo mbwamapenzi alimwi lyoonse mbwakuwayawaya. Kutegwa mubone kadyonko buyo ‘kabuumi bwini-bwini’ oobu, amubone zintu zimwi zitaliboteli Bwami bwa Leza nzyobuyoobacitila balelwa bambubo.