Bbuku Lyakaindi Iligwasya Mubuumi Mazuba Aano
Bantu banji balalilemeka Bbaibbele akaambo kakuti ndibbuku lisetekene. Nokuba boobo, kuli azimbi zinji nzyolitwaambila kunze buyo lyakutwaambila mbotweelede kumukomba Leza. Lilatupa lulayo lugwasya kujatikizya mbotweelede kupona mubuumi bwabuzuba abuzuba.
Mucikozyanyo, amubone bantu bamwi ncobakaamba kujatikizya mbobakagwasyigwa akaambo kakubala Bbaibbele akutobela nzyolyaamba mubuumi bwabo.
“Buumi bwangu buli kabotu lino. Zintu ndizilanga munzila yeelede. Aboobo ndilikkomene kapati.”—Ba Fiona.
“Akaambo kakwiiya Bbaibbele, buumi bwangu bulaampindu lino.”—Ba Gnitko.
“Buumi bwangu bwacinca kapati. Mazuba aano tandicibeleki mawoola manji, aboobo ndilijisi ciindi cinji cakuba antoomwe amukwasyi wangu.”—Ba Andrew.
Kuli zyakuluula azimbi zinji izili mbuli zeezyi. Bantu banji nyika yoonse mboizulwa bajana kuti Bbaibbele lilagwasya kapati mubuumi bwabuzuba abuzuba.
Atulange-lange Bbaibbele mbolikonzya kubagwasya bantu . . .
Kupona buumi buli kabotu kumubili
Kuba abube buli kabotu
Mumukwasyi alimwi akusala balongwe bali kabotu
Kwaabelesya kabotu mali
Kubikkila maano kuzintu zyakumuuya
Zibalo zitobela zilatondezya kuti Bbaibbele ndibbuku lyakazwa kuli Leza lyalo likonzya kumugwasya munzila ziindene-indene mubuumi bwanu bwabuzuba abuzuba.