Kuba Abube Buli Kabotu
Bbaibbele lilatucenjezya kujatikizya bube ibutali kabotu alimwi litukulwaizya kuba abube oobo bugwasya.
KUNYEMA
NJIISYO YAMU BBAIBBELE: “Muntu uumuka kunyema uli kabotu kwiinda muntu singuzu.”—Tusimpi 16:32.
NCOCAAMBA: Tulagwasyigwa ciindi notucikonzya kweendelezya mbotulimvwa. Zimwi ziindi toonse tulakonzya kunyema akaambo katwaambo tulimvwisya, pele kuti katutakweendelezyi kunyema kwesu, kulakonzya kupa kuti tulubizye kapati. Basikuvwuntauzya bamazuba aano batondezya kuti ciindi bantu nobanyemede, inga tabayeeyi kabotu alimwi balakonzya kwaamba naa kucita zintu zibapa kuusa kumamanino.
NCOMUKONZYA KUCITA: Amwiiye kweendelezya bukali bwanu kabutanatalika kumweendelezya. Bantu bamwi bayeeya kuti kunyema ncitondezyo cakuba anguzu, pele mubwini tacili boobo pe. Bbaibbele lyaamba kuti: “Mbuli munzi wapwaigwa, uutajisi bwaanda, mbwabede muntu uutakonzyi kulijata kuti wanyema.” (Tusimpi 25:28) Nzila iigwasya kweendelezya bukali, nkuzyiba cini cakacitika kamutanaamba naa kucita cintu cili coonse. “Bupampu bwamuntu bulamulesya kufwambaana kunyema.” (Tusimpi 19:11) Tweelede kukaswiilila kaambo kumbazu zyoonse zyobilo, calo cikonzya kutugwasya kutafwambaana kunyema.
KULUMBA
NJIISYO YAMU BBAIBBELE: “Amutondezye kuti mulalumba.”—Bakolose 3:15.
NCOCAAMBA: Kwaambwa kuti bantu balumba balikke mbabakonzya kukkomana. Nobaba baabo ibakasweekelwa bayandwa babo naa zintu ziyandisi balakonzya kuzumina kuti aaya masimpe. Bakaamba kuti icakabagwasya kuliyumya nkulumba kujatikizya zintu nzyobakacili kujisi muciindi cakwiile kuyeeya buyo zintu nzyobakasweekelwa.
NCOMUKONZYA KUCITA: Buzuba abuzuba, amulembe mulongo wazintu nzyomulumba. Eeci tacaambi kuti zyeelede kuba zintu zipati buya pe. Amubikkile maano kuzintu noziba zisyoonto, mbuli kupola kwazuba, kuba amubandi mubotu amuyandwa wanu naa kuba buyo abuumi buzuba oobo. Zintu zili boobu zilakonzya kumupa kukkomana kapati ikuti naa kamuzinzibala kuyeeya alimwi akulumba akaambo kanzizyo.
Inga camugwasya kapati kuyeeya cimupa kulumba akaambo kamukwasyi wanu alimwi abalongwe. Ikuti mwakazyiba kaambo kamupa kubalumba bantu bamwi, amubaambile kaambo aako, ambweni cantongolameso naa kubalembela lugwalo, e-mail naa kagwalo kaafooni. Eeci cilakonzya kuyumya cilongwe canu alimwi muyookkomana akaambo kakuti mucitila bamwi zintu zibotu.—Milimo 20:35.
NJIISYO ZIMBI ZYAMU BBAIBBELE
Mulakonzya kudauniloda zyakuswiilila zyakalekkoodwa zyamu Bbaibbele mumwaambo ngomuzyi. Zyakuswiilila eezyi nkozili mumyaambo iibalilwa ku 40 a jw.org
AMWAATIJE MAZWANGA.
“Kutalisya nkondo kuli mbuli kujalwida maanzi manji; kubwesyanya kakutanatalika, kozwa buyo aawo.”—TUSIMPI 17:14.
MUTACIINDIZYI KULIBILIKA KUJATIKIZYA ZINTU ZYAKUMBELE.
“Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo. Buzuba bumwi abumwi bulijisi mapenzi aambubo aakkwene.”—MATAYO 6:34.
AMUSAANGUNE KUYEEYA KAMUTANACITA CINTU CILI COONSE AKAAMBO KAMBOMULIMVWIDE ACIINDI EECO.
“Kuyeeya kabotu kuyookulinda, abwalo bupampu buyookukwabilila.”—TUSIMPI 2:11.