Kubikkila Maano Kuzintu Zyakumuuya
Kweelana ambotwabona mucibalo cakusaanguna, bantu banji babona Bbaibbele kuti ndibbuku lisetekene. Bajana kuti ciindi nobalibala akutobela busolozi bwandilyo, balimvwa kuba acilongwe a Leza alimwi akuzyiba mpindu yabuumi bwabo.
Bbaibbele libelesya majwi aakuti ‘kubikkila maano kuzintu zyakumuuya’ ikwaamba mbotuzibona zintu zyakumuuya mubuumi bwesu. (Juda 18, 19) Mukwiimpana abantu ibatayandi kusololelwa a Leza balo basyoma maano aabo, aabo ibayanda kusololelwa a Leza balazibikkila maano zyeelelo zyakwe.—Baefeso 5:1.
BULANGIZI
NJIISYO YAMU BBAIBBELE: “Ikuti watyompwa muziindi zyamapenzi, nkokuti nguzu zyako zilaceya.”—Tusimpi 24:10, bupanduluzi buyungizyidwe.
NCOCAAMBA: Kutyompwa kulakonzya kupa kuti tubule nguzu zyakulwana mapenzi aamubuumi. Pele bulangizi bulakonzya kutupa nguzu nzyotuyandika kutegwa tuzumanane kulwana mapenzi. Ikuti katujisi bulangizi, inga tulayeeya kuti bunji bwamapenzi ngotujisi ngaciindi buyo cisyoonto; alimwi buya tulakonzya kulangila kuti amana mapenzi kulaboola cintu cimwi cibotu.
NCOMUKONZYA KUCITA: Amusoleke kuyeeya zintu zibotu iziyoocitika kumbele. Muciindi cakulibilika kujatikizya zintu izikonzya kucitika naa kulindila ciindi zintu zyoonse noziyooba kabotu, amubweze ntaamu yakuzuzikizya mbaakani zyanu. Bwini mbwakuti, “zintu zitalangilwi” zilakonzya kucitika. (Mukambausi 9:11) Pele masimpe ngakuti, kanji-kanji zintu inga zilaakuba kabotu kwiinda mbotwali kuziyeeyela. Nkakaambo kaako, kwiinda mukubelesya maambilambali, Bbaibbele lyaamba kuti: “Kosyanga mbuto zyako cifwumofwumo alimwi utalekeli maanza aako kulyookezya kusikila mane kumangolezya; nkaambo tozyi naa nzili zitiikomene kabotu, ikuti naa nzyeezyi naa nzyeziya, naa zyoonse zyobilo zilakomena kabotu.”—Mukambausi 11:6.
BWIINGUZI KUMIBUZYO IIYANDIKA KAPATI MUBUUMI
NJIISYO YAMU BBAIBBELE: “Kondipa maano . . . Ijwi lyako . . . nkasimpe.”—Intembauzyo 119:144, 160.
NCOCAAMBA: Bbaibbele lilapa bwiinguzi kumibuzyo njobavwula kubuzya bantu banji. Mucikozyanyo, lilaingula mibuzyo mbuli yakuti
Ino twakazwa kuli?
Nkaambo nzi ncotuli waano?
Ncinzi cicitika muntu afwa?
Sena buumi oobu mbobuliko bulikke?
Mamiliyoni aabantu nyika yoonse baba abuumi bubotu kwiinda mukulanga-langa bwiinguzi bwamu Bbaibbele kumibuzyo eeyi alimwi aimbi.
NCOMUKONZYA KUCITA: Amulibalile kutegwa mubone ncoliyiisya Bbaibbele. Amulombe umwi wa Bakamboni ba Jehova kuti amugwasye kumvwisya ncoliyiisya Bbaibbele. Amulange awebbusaiti yesu ya jw.org, naa kuunka kumuswaangano umwi akati kamiswaangano yesu yalo iitabbadelelwi alimwi bantu boonse balakonzya kujanika.
NJIISYO ZIMBI ZYAMU BBAIBBELE
Amweebelele kavidiyo kakuti Nkaambo Nzi Ncomweelede Kwiiya Bbaibbele? ikali a jw.org. Nkokali mumyaambo iinda ku 880
AMUZYIBE ZINTU NZYOMUYANDIKA KUMUUYA.
“Balikkomene aabo bazyi kuti bayandika kusololelwa a Leza.”—MATAYO 5:3.
AMWIIYE ZINJI KUJATIKIZYA LEZA MUKAMWINI BBAIBBELE.
“Amuyandaule Leza . . . akumujana ncobeni . . . tali kulamfwu kuli umwi aumwi wesu.”—MILIMO 17:27.
AMUBALE AKUZINZIBALA KUYEEYA MULUMBE WAMU BBAIBBELE.
“Ulikkomene muntu . . . [uukkomanina] mulawo wa Jehova,a alimwi ulazinzibala kuyeeya mulawo wakwe syikati amasiku. . . . Zyoonse nzyacita ziyoozwidilila.”—INTEMBAUZYO 1:1-3, bupanduluzi buyungizyidwe.
a Jehova ndezina lya Leza kweelana ambolyaamba Bbaibbele.