2. Sena Ndiswe Tweelede Kupegwa Mulandu Akaambo Kakupenga Kwesu?
Ikaambo Ncociyandika
Ikuti naa bwiinguzi mbwakuti inzya, nkokuti inga twacikonzya kukucesya kupenga.
Ncomweelede Kuyeeya
Mbuti bantu mbobatola lubazu mukuleta kupenga kutobela?
Kutundululwa.
Mbunga ya World Health Organization (WHO) iyeeyela kuti muntu omwe mupati akati kabantu bone wakatundululwa kumubili aciindi cimwi naakacili mwana alimwi akuti mukaintu omwe akati kabamakaintu botatwe ulatundululwa kumubili naa mumakani aakoonana (naa zyoonse zyobilo) aciindi cimwi mubuumi bwakwe.
Kufwidwa Bayandwa.
Kweelana alipooti ya World Health Statistics 2018, iyakalembwa aba WHO, “kwakafwa bantu babalilwa ku 477,000 nyika yoonse mu 2016.” Ooyu mweelwe uumbi kuyungizya aamweelwe wabantu basika ku 180,000 ibayeeyelwa kuti bakajaigwa munkondo alimwi amazwanga mumwaka ngomunya ooyu.
Kuciswa.
Mucibalo cimwi camumagazini iitegwa National Geographic, mulembi wazina lya Fran Smith wakaamba kuti: “Bantu bainda ku 1 bbiliyoni balafweba, alimwi tombwe uli akati kazintu zyosanwe zileta malwazi aapa kuti bantu kabafwa: malwazi aamoyo, situloko, malwazi aamucamba, bulwazi bwamapunga butasilikiki alimwi akkansa yamapunga.”
Kwiindana Kwabukkale.
Syaazibwene mumakani aakwiiya mbobayeeya bantu, Jay Watts wakaamba kuti: “Bucete, kucitilwa cakutalulama akaambo kabukkale bwamuntu, kusalululwa akaambo kamusyobo, kuteendelezyegwa kabotu akaambo kakuba musankwa naa musimbi, kutija kumasena aabo alimwi akuzundana mumakani aamakwebo zyoonse eezyi zipa kuti bantu baindile kuba amapenzi aamumizeezo.”
AMWIIYE ZINJI
Amweebelele kavidiyo kakuti Ino Leza Wakailengela Nzi Nyika? ikali a jw.org.
Ncolyaamba Bbaibbele
Bunji bwamapenzi aaliko munyika mazuba aano mbantu baaleta.
Bunji bwamapenzi aaya alaletwa amfwulumende zyabantu izidyaaminina, zyalo izipa kuti buumi bwabantu aabo mbobaamba kuti mbobabelekela buyume citaambiki.
‘Muntu weendelezya muntunyina munzila iimuletela mapenzi.’—MUKAMBAUSI 8:9.
Mapenzi alakonzya kucesyegwa.
Njiisyo zyamu Bbaibbele zipa kuba abuumi buli kabotu alimwi akukkala muluumuno abantu.
“Moyo uukkede upa buumi kumubili, pele munyono upa kuti mafwuwa abole.”—TUSIMPI 14:30.
“Amuzisowe zintu zyoonse eezyi, kulutila, bukali, kunyema, kubwenta alimwi amajwi aakusampaula antoomwe abubi buli boonse.”—BAEFESO 4:31.