NCOMUKONZYA KUCITA ZINTU NOZYADULA

Amube Abulangizi

Sena kubusena nkomukkala zintu ziladula kwiinda mali ngomujana? Sena mulalibilika kujatikizya mbomukonzya kupona alimwi akulanganya mukwasyi wanu? Kuti kacili boobo, mulakonzya kulibilika kujatikizya zyakumbele. Nokuba boobo, kuba abulangizi kulakonzya kumugwasya nomuba mubukkale bukatazya kapati.

IKAAMBO NCOCIYANDIKA

Bantu ibajisi bulangizi tabalombozyi buyo zintu zibotu. Pele balaba anguzu zyakubweza ntaamu izyeelede akuzilanga munzila iili kabotu zintu mubukkale mobalijana. Mucikozyanyo, buvwuntauzi bumwi butondezya kuti, ibantu bajisi bulangizi . . .

balaliyumya mubukkale bukatazya
balacinca kweelana abukkale
balasala cabusongo, calo cibapa kupona buumi buli kabotu

NCOMUKONZYA KUCITA

Cakusaanguna, amulange-lange Bbaibbele mbolikonzya kumugwasya. Bbaibbele lilapa mizeezo iikonzya kumugwasya kusala cabusongo ciindi zintu nozyadula. Mizeezo eeyi ilakonzya kumugwasya kuzilanga munzila iili kabotu zintu, kumutondezya ncomukonzya kucita lino alimwi akumbele mwaakulijana mubukkale bukatazya.

“Kuyeeya kabotu kuyookulinda, abwalo bupampu buyookukwabilila.”—Tusimpi 2:11.

Cabili, amulange-lange ncolyaamba Bbaibbele kujatikizya zyakumbele. Ciindi nomubona lulayo lwabusongo ilujanika mu Bbaibbele, inga mwayanda kwiiya zinji kujatikizya ncolyaamba mumakani aazintu ziyoocitika kumbele. Mucikozyanyo, kunze buyo lyakwiiya kuti Leza uyanda kuti mukabe ‘abuumi bwakumbele bubotu alimwi abulangizi,’ pele alimwi uyanda kuti kamujisi twaambo tulimvwisya itweelede kumupa kubusyoma Bwami bwakwe.—Jeremiya 29:11.

INO BWAMI BWA LEZA NINZI ALIMWI INO NCINZI NCOBUYOOCITA?

Bwami bwa Leza nifwulumende iiyakweedelezya nyika yoonse. (Daniele 2:44; Matayo 6:10) Nokuba kuti bunikweendelezya kuzwa kujulu, kunyina muntu uyoopenga naa kucetaala. Aciindi eeco, bantu boonse banooli muluumuno alimwi banoojisi zyoonse nzyobayanda kutegwa kabakkomene kweelana ambwaatondezya magwalo aatobela.

‘Bantu bayookkomana alimwi banookkala kabotu.’—Intembauzyo 128:2.

‘Balelwa ba Bwami, tabakabelekeli maliminya pe.’—Isaya 65:23.

“Kuyooba maila manji anyika.”—Intembauzyo 72:16.

Bantu banji balazisyoma zisyomezyo eezyi alimwi balisinizyide kuti ‘Leza takonzyi kubeja.’ (Tito 1:2) Aboobo tumukulwaizya kunoolibala Bbaibbele. Bulangizi mbolipa Bbaibbele bulakonzya kumugwasya kuba anguzu zyakuliyumya noliba leelyo nozitali kabotu zintu. Kunze lyaboobo, lilakonzya kumupa bulangizi bwakuti zintu ziyooba kabotu kumbele.